กราบตักแม่

โฮงเฮียนค่าวออนไลน์

กราบตักแม่

Postโดย เฒ่าค่าว บ่าวกะโลง » Thu Aug 10, 2006 5:45 pm

Image
กราบตักแม่

จ๋ำปี๋จ๋ำป๋า ถะหวากาบย้อย มะลิร้อยสร้อย เป๋นมาลัยก๋ร
กราบพระแม่รัก บนตักสมร อันลูกเกยนอน ร้องร่ำออดอ้อน
ลูกดูดดื่มนม แม่ชมปั๋นป้อน กู้เจ๊าแลงตอน แต๊นั้น

เมื่อลูกจักนอน บัวซอนแม่จั๊น ขับกล่อมเพลงหั้น อือจา
ว่าคิ่นหน่อน้อย ม่อยหลับเต๊อะหนา โศรกตุ๊กข์ไดนา อย่ามีหม่นเศร้า
เอามือลูบหัว สายบัวลูกเต้า ปลอบประโลมเอา บ่เว้น

เมื่อยไข้ก๋ายา แม่มาบีบเฟ้น ลูกเหงาแม่เล่น ตวยนาย
บุญคุณแม่ไท้ ยิ่งใหญ่เหลือหลาย เกิ๋นจักบรรยาย พรรณณาได้
สองมือสลอน ยอก๋รตั้งไหว้ ดวงดอกมาลัย ไคว่ครบ

ใจ๋ก๋ายวาจ๋า ปู๋ชานอบนบ เคารพยอดเจ้า มารดา
ความผิดครุ ลหุโทษา ก๋รรมกิริยา ตังมวลเกิดขึ้น
ทำแม่เสียใจ๋ จิตในสะอื้น วอนแม่บุญยืน ปล่อยไว้

ตั๋วบาปละอาย ตังก๋ายนั้นไท้ อันบุตรลูกได้ กระทำ
สองแข้งยันยก จ่าวจ๊กถีบต๋ำ บ่ตันแยงยำ เหตุว่าลูกหน้อย
เขี้ยวขบหัวนม อุดมยอดสร้อย อกแม่เป๋นรอย ข่วนช้ำ

เส้นผมบนหัว ลืมตั๋วล่วงล้ำ เอามือก๋ำมั่น จั๊กมา
แม่ร้องอ่าละ ลูกจ๊ะลูกจ๋า ไปย่ะอั้นนา แม่เจ็บเน้อหล้า
ลูกเล่นตึ๋งตั๋ง เสียงดังปากอ้า สนุกเฮฮา เดือดซ้าว

ก้มกราบขมา บุพพานี้เล้า สาแม่ปิ่นเกล้า อภัย
วจี๋พลาดพลั้ง สลั้งหลงใหล ปากม่อออกไป สติด่วนสั้น
อู้จ๋ากำแรง เสียดแทงจะอั้น เถียงแม่เร็วพลัน ต่ำจ๊า

ก๋รรมแต่วาที ราคีอ่อนล้า อันเป๋นเมฆฝ้า มาบัง
อู้บ่ไพเราะ ม่วนเพราะโสตั๋ง จุหล่ายเสียยัง เรื่องราวเหนือไต้
ลูกหากกลั๋วก๋รรม อธรรมบอดไบ้ ขอแม่ดวงทัย ร่ำงับ

แม้นมโนมัย แควบในใจ๋กั๊บ หากนับตีบตั้น ขุ่นมัว
ลืมใจ๋ยั้งคิด เป๋นพิษติดตั๋ว ปทุมดอกบัว แม่ตรมหมองเศร้า
จิตอกุศล มืดมนงำเข้า หื้อหลงมัวเมา ต่ำก๊อย

มานะทิฏฐี อวดดีด่างพร้อย หันผิดจากถ้อย กองธรรม
แม่สอนสั่งไว้ บ่ใส่จดจ๋ำ ละปล่อยทิ้งกำ ที่แม่บอกสร้าง
บุตรหากลาสา ปัญญากระด้าง เหลือกว่าแนวทาง กล่าวจี๊

ผิดถูกอันได ลูกไหว้แม่นี้ อดซึ่งเสียหนี้ ก๋รรมเวร
เปิกเป๊อะต๋มนั้น น้ำหากพาเป๋น วอนแม่ใจ๋เย็น อภัยหน่อเหน้า
สาธุไหว้วอน ขอพรคุ้มเกล้า มงคลงามเงา เลิศนั้น

มธุวาจ๋า มาต๋าเจื่องจั๊น จักเป๋นบุญกั้น โภยภัย
หื้อลูกหมดตุ๊กข์ อยู่สุขแจ่มใส อันตรายใด บ่มากล๋ายใกล้
คุณแม่เสถียร ดั่งเทียนแสงไต้ ส่องลูกก้าวไป แต๊ตั๊ก

ระนึกพระคุณ แม่หนุนมากนัก แม่รักอุ้มเอื้อ อาทร
กราบตักมารดร สุดต๋อนมอกอี้ เท่านี้สู่กั๋นฟัง ก่อนแลนายเหย...............

เฒ่าค่าว บ่าวกะโลง
Image
บทประพันธ์ คืองานที่กวีคิดขึ้นและสรรสร้างต๋ามจิ๋นตนาก๋าร
User avatar
เฒ่าค่าว บ่าวกะโลง
 
ตอบ: 67
สมัครสมาชิก: Fri Dec 16, 2005 8:29 am

Postโดย เพลงซอ » Fri Aug 11, 2006 1:20 am

:-D ยินดีจ๊าดนักครับอ้ายเฒ่าค่าว บ่าวกะโลง อ่านแล้วน้ำต๋าปอไหลครับ :-D ออกอากาศวันเสาร์ที่ 12 เน้อครับเวลา 13.00-1500 และก็วันติ๊ดเวลา 18.00-19.00 ตางคลื่น 97.5 MHz หรือ วิทยุอินเตอร์เนตล้านนา http://www.cm77.com
เพลงซอ
 

Postโดย ปี้สาวมองพิม » Sat Aug 12, 2006 2:51 am

อ่านแล้วซาบซึ้งขนาดเจ้า แต่ป้สาวก่ยังแต่งบ่ะออกอยู่ดีเจ้า เดวจะถ้าฟังวิทยุวันพูกเจ้า
ปี้สาวมองพิม
 

ค่าวม่วนขนาดเจ้า

Postโดย gottosan » Tue Aug 15, 2006 3:57 am


ลุงเฒ่าค่าวแต่งค่าวได้ม่วนขนาดเจ้า แต่งได้ซึ้งใจ๋ดีแต้ๆๆ ส่วนอ้ายป๊อบก็จ๊อยได้ไพเราะบ่แพ้กั๋นเจ้า ขอชื่นชมทั้งสองคนด้วยใจ๋จริงเจ้า
คารวะศิษย์พี่ทั้งสอง ด้วยชาเขียวหนึ่งกล่อง อิอิ
...จั๊กกิ้มเจ้า...
User avatar
gottosan
 
ตอบ: 34
สมัครสมาชิก: Thu Mar 02, 2006 9:43 am
ที่อยู่: ท่ามกล๋างหุบเขา ใต้เงาผ้าห่มปก...

Postโดย noina » Mon Oct 30, 2006 2:53 am

อ่านแล้วกั๋ดอกกั๋ดใจ๋แต๊ว่าเจ้าพระคุณของแม่มีล้นเหลือเจ้าแม้ว่าเอาเงินเอาทองมากองเต๋าสุงท่วมหัวกอใจ๊พระคุณแม่อันใหญ่หลวงนี้บ่าเสี้ยงเจ้าในจ๊าดนี้เจ้าแม่ที่รักแต๊ของลูกเจ้า :D :D :D
noina
 

ค่าววันแม่

Postโดย Guest » Fri Aug 10, 2007 1:39 pm

ใกล้วันแม่เข้ามาแล้ว เซาะเอาค่าวเรื่องแม่ซึ้งๆขึ้นมาอ่านแหมสักรอบน่าจะดีบ่หน้อยเลยเนาะเจ้า
Guest
 

Postโดย ละอ่อนเมืองฝาง » Fri Aug 10, 2007 3:06 pm

อ่านค่าวแล้วกึ๊ดเติงหาแม่ แต่ก็ม่วนขนาด
ละอ่อนเมืองฝาง
 

Postโดย November » Thu Oct 11, 2007 7:34 am

อ่านแล้วก่าเศร้าเจ้า น้องฟาร์กึ๊ดไว้ว่าจะบ่าปิ๊กบ้าน (ถ้าบ่าจ๋ำเป๋น) เพราะเป๋นลูกตี้เปิ้นบ่าฮักปิ๊กไปแล้วก่า มีแต่เสียน้ำต๋าทุกครั้งตี้ปิ๊ก
November Angel : ริมฟ้า
User avatar
November
 
ตอบ: 436
สมัครสมาชิก: Wed Feb 09, 2005 6:01 am
ที่อยู่: Sukhothai

Postโดย เครือออน » Fri Oct 12, 2007 1:03 am

บุญแต้บุญตั๊ก กุณนักกุณหนา กุณแม่มารดา หาเตียมบ่อได้
ตั้งแต่มีต๊อง หน่องหนักแต้ใบ้ เตวไปตางใด อึดอัด
จะกิ๋นสังจา ต้องมาเคร่งครัด กลั๋วซัดลูกน้อย ในครรภ์
เกิดออกมาแล้ว บ่แคล้วแผกผัน จุบเลี้ยงจีวัน ลูกพลันใหญ่กล้า เจริญไปหน้า
ฮู้จักอยู่ ฮู้จักกิ๋น ฮู้จักใช้ / อยู่เท่าที่ดิน กิ๋นเท่าที่ได้ ใช้เท่าที่มี
User avatar
เครือออน
 
ตอบ: 856
สมัครสมาชิก: Fri Sep 14, 2007 8:58 am
ที่อยู่: อำเภอแม่ออน จังหวัดเชียงใหม่

Postโดย Guest » Fri Oct 12, 2007 1:27 am

+_+
Guest
 

Re: กราบตักแม่

Postโดย แวะเข้ามาแอ่วครับ » Thu Aug 07, 2008 4:20 am

ดีใจจ๊าดนัก ดีใจจ๊าดหลาย ที่ได้มากลาย มาแอ่วมาอู้
ได้รู้ได้อ่าน ค่าวสารกลิ่นกู้ เป็นของควรคู่ ล้านนา
ม่วนงันแต่เล้า แม้เศร้าหนักหนา กึดเถิงมาดา แท้ทัก...
...วันนี้งานนัก ช่วงพักบ่หลาย จะขอลาไป เท่านี้ ก่อนแล..นายเฮย..
แวะเข้ามาแอ่วครับ
 


กลับไปหน้า กระดานค่าว

ผู้ที่กำลัง online

ผู้ที่กำลังอ่าน forum นี้: สมาชิก ไม่มีสมาชิก และ ผู้เยี่ยมชม 2 คน