ค่าวยาบ้า ( พ่ออุ๊ยบุญตัน )

โฮงเฮียนค่าวออนไลน์

ค่าวยาบ้า ( พ่ออุ๊ยบุญตัน )

Postโดย พูนอุดม » Mon Jul 09, 2007 8:19 am

ค่าวยาบ้า แต่งโดย..พ่ออุ๊ยบุญตัน เชียงราย


ยาบ้ายาบอ ปอเต๊อะปี้น้อง อย่าไปเกี่ยวข้อง มันเลย
ทางที่ดีนั้น ควรอยู่เฉยเฉย อย่าแวะเวียนเลย ยาม้ายาบ้า
คนกิ๋นจ่างต๋าย คนขายถูกฆ่า ขอกรุณา ปี้น้อง

บ่ใจ่ของกิ๋น แตนข้าวอิ่มต๊อง บ่ใจ่เครื่องหย้อง ในกาย
หากเป๋นยาพิษ ที่ผิดกฎหมาย สังคมวุ่นวาย เดือดร้อนจาวบ้าน
เฮามาจ่วยกั๋น ปราบปรามต่อต้าน อย่าได้รำคาญ เน่อครับ

ไผฮู้หันไหน แจ้งตำราจยับ จับขังคอกได้ ไปเลย
หมู่เฮาปี้น้อง บ่ต้องนิ่งเฉย ปล่อยปะละเลย เปิดเผยบ่กล้า
อนาคตเฮา ลูกหลานไปหน้า จักเป๋นขี้ยา ยากไร้

ตกเป๋นทาสยา ขี้ข้าเปิ้นใจ๊ เปิ่งหยังบ่ได้ สักอัน
แนวทางชีวิต มืดมิดมนต์ตั๋น ต๋ายผ่อนรายวัน มันเป๋นไปได้
ขอเตือนลูกหลาน อย่าเข้าไปใกล้ สิ่งที่เป๋นภัย ชั่วร้าย

ทำดีได้ดี ทำฮ้ายได้ฮ้าย เป๋นผลตอบส้าย ทันใด
เฮามีอายุ ยืนยาวก้าวไกล๋ สร้างโลกต่อไป ในวันข้างหน้า
อย่ามาหลงตาง ยาม้ายาบ้า กับเหล้าสุรา น้ำพิษ

อันที่บ่ดี นั้นจะไปคิด มันผิดเน่อเจ้า ญิงจาย
ร่างก๋ายชีวิต บ่มีซื้อขาย อย่าหลงงมงาย สิ่งที่หวงห้าม
กำป้อแม่สอน จะไปล่วงข้าม ต๋ามใจ๋ตั๋วเอง มากนัก

อย่าเอานิสัย เหมือนเผตเหมือนยักษ์ จักพบแต่อั้น เภทภัย
หื้อมีสำนึก ทางด้านจิตใจ๋ ฮ้ายใดดีใด อดไว้เน่อเจ้า
อย่าได้พึ่งพา ยาบ้าและเหล้า เป๋นของมืนเมา ชั่วร้าย

จักได้เสียใจ๋ เมื่อลุนปุ๋นต๊าย สูญเสียว่าอั้น เวลา
เสียอนาคต หมดวาสนา เป๋นคนปาลา มาตกต่ำต้อย
บ่มีศักดิ์ศรี ความดีสักหน้อย สังคมเปิ้นคอย ด่าซ้ำ

ศีลข้อสุรา อย่ามาล่วงล้ำ จ๋ำไว้เน่อเจ้า ญิงจาย
จักว่าไปนัก ปั๋ญญาบ่หลาย จักขอระบาย อารมณ์เต้าอี้ ก่อนแหล่นายเหย
พูนอุดม
 
ตอบ: 1002
สมัครสมาชิก: Mon Oct 06, 2003 11:25 pm
ที่อยู่: จ. สุรินทร์

กลับไปหน้า กระดานค่าว

ผู้ที่กำลัง online

ผู้ที่กำลังอ่าน forum นี้: สมาชิก Bing [Bot] และ ผู้เยี่ยมชม 3 คน