ประวัติอำเภอแม่ออน(อย่างย่อ)

[เครือออน]

ขอยอหัตถา ตั๋วข้าม่อนน้อย ขอจ๋ารค่าวสร้อย เป็นถ้อยแถลง
“แม่ออน”ก่อนนั้น มันเป๋นจื้อแขวง อยู่สันกำแปง ป่าไผ่แหล่งหล้า
ลุปี๋พอศอ สองสี่สี่ห้า หมู่เงี้ยวมันมา เข้ายึด

เผาตี้ทำก๋าร ไฟผลาญทึดทึด ยึดเผาโฮงเหล้า วอดวาย
ตางก๋ารจึ่งย้าย ออกไปบ่อไกล๋ ตางเหนือขึ้นไป หล่ายออนว่าอั้น
จื้อ”สันกำแปง” นามแขวงใหม่มั่น เจริญเร็วพลัน สรรพเสร็จ

สามสิบเมษา สองห้าสามเจ็ด แยกเขตออกหั้น ปกครอง
จื้อกิ่งใหม่นั้น เจื้อมั่นตังผอง “แม่ออน”หมายปอง จองจื้อเก่าเกื้อ
ออนหลวยโฮงเฮียน จำเนียรเข้าเอื้อ อาคารหลังเหนือ หื้อใจ๊

ถัดมาแหมปี๋ ย้ายตี้ใหม่ไซร้ วันตกแจ่งใต้ งามแดน
มากึดมาไค้ ดั่งได้แก้วแหวน หมู่เก้าในแดน ออนกล๋างแหล่งหล้า
สามสิบแปดปล๋าย ในสองปันห้า กล๋างเดือนตุลา คมตั๊ด

ขนย้ายเข้ามา หัวหน้าเคร่งครัด จัดกั๋นเป็นห้อง ทำงาน
สมใจ๋เจ้นล้ำ ได้ตี้ทำก๋าร มากหลายอาคาร สถานใหม่มั่น
ลุเถิงดิถี วันตี้แปดอั้น เป็นโสรีวาร จื้นจ๊อย

มาศว่ากันยา สองปันห้าร้อย ปล๋ายห้าสิบหย้อย วันดี
ทำบุญเสร็จสรรพ นับเป๋นดิถี ฤกษ์งามยามดี ทั่วไทยไกล๋ใกล้
หมู่เฮาสุขี ยินดีตี้ได้ เลื่อนสูงขึ้นไป ฐานะ

ยกเป็นอำเภอ เสนอก๋าละ เฉลิมองค์พระ ราชัน
วโรกาสไท้ ธได้สุขสันต์ แปดสิบครบครัน พรรษาว่าอั้น
แม่ออนกำเนิด เกิดได้แม่นมั่น เป็นอำเภอพลัน ปี๋นั้น

ขอหื้อสุขี อยู่ดีปันจั๊น หื้อฮักกั๋นด้วย ดวงมาลย์
ร่วมใจ๋ร่วมจิต ร่วมคิดสืบสาน ร่วมก๋ารร่วมงาน วงศ์วานหนุ่มเฒ่า
สืบฮีตสืบฮอย ป๊อยละแบบเบ้า สืบวัฒนธรรมเฮา อย่าละ

รัตนะสาม สยามเทวะ พระฮักษาอั้น แม่ออน
ขอจบตอน กล๋อนสาส์นค่าวสร้อย ข้าน้อยขอวางลง ก่อนแลนายเหย.

[คำผง]

ได้ฟังกล๋อนสาร ต่ำนานวาทะ กาละเมื่อตั้ง เมืองออน
หล่ำดับหล่ำดา เดินมาเป๋นต๋อน อำเภอแม่ออน ก่ำเหนิดขึ้นได้
ผดาเขื่อนเขา ลำเนาเหนือใต้ เลยก่ำแปงไป หลายปู้น

จักว่าอยู่ใกล้ ก่าบ่าไค่กู้น สีไกล๋อาละ จอยวอย
จักว่าอยู่ไกล๋ หายแส็บหายสอย ก่าเลยม่อนดอย นี้ไปเท่าอั้น
ขึ้นโตยน้ำทา เป๋นขั้นเป๋นขั้น จักผดก่จา ปี้น้อย

อยู่กล๋างต่าตาง กาว่าอยู่ซ้อย ขอตั๋วปี้หน้อย บอกกำ
ลุกจากเจียงใหม่ จักไปฮอดต๋ำ ขอบอกซักกำ ไปตางใดเจ้า
ตางสันก่ำแปง กาว่าเมืองป๊าว กาว่าหละปูน บ้านธิ

หนตางดีก่อ ป้อดอกหมะลิ ขอบอกข้าหน้อย เป๋นยา
สักกี่นาที ตี้จักไปหา ใจ้เวลา ม้อกใดปี้อ้ายฯ

[เครือออน]

ปี๋ติยินดี ค่าวนี้บ่หม้าย คำผงปี้จาย จ้วยตั๊ก

จึงขอขานไข หื้ออ้ายตี้ฮัก ฮู้จักแถมหน้อย แม่ออน
วันออกเนอครับ ลับหลืบสิงขร จ๊วยเหนือนคร เจียงใหม่ตี้หั้น
หนตางนั้นเนอ ซุปเปอร์ว่าอั้น สะดวกทุกกาล เจิญครับ

สี่สิบกิโล ปฐโมนับ จากตั๋วเมืองหั้น ออกไป
สันก่ำแปงล้ำ เลยไปบ่ไกล๋ สิบกิโลไทย ปล๋ายหื้อแถมห้า
สี่สิบนาที รี่ไปบ่ถ้า จากเจียงใหม่นา เกยนับ

คำผงปี้จาย เจิญไปเน้อครับ ยินดีต้อนฮับ สู่เมือง
แอ่วน้ำพุฮ้อน หินคลอนเหล่าเขื่อง โคนมรุ่งเรือง เหมืองผาน้ำดั้น
ถ้ำดอยศิลา ผาตั้งธาตุหั้น คู่บ้านคู่เมือง เก่ากี๊

น้ำตกตาดเหมย คนเอ่ยกล่าวจี๊ จ้าดม่วนตี้นี่ วังเย็น
ก่ำปองแห่งนั้น หมู่บ้านตี้เป๋น โฮมสเตย์เจน จัดพักแขกบ้าน
อาบน้ำแร่ แจ้น้ำนมหั้น มีหื้อจุวัน น้ำพุ

จักอู้ไปหลาย กลั๋วอ้ายว่าจุ๊ สามคุมาได้ เปลือกเดย
บ่ใจ้ว่าต๊า ดีกว่าเฉลย ไปลองผ่อเลย เอ่ยเจิญเน้อเจ้า

[พูนอุดม]

อ่านค่าวม่วนล้ำ เป๋นเส้นเป๋นสาย เครือออนป้อจาย ได้แต่งค่าวสร้อย
ได้เล่าประวัติ ม่วนงันบ่หน้อย อำเภอแม่ออน งามล้ำ

อำเภอตั้งใหม่ ไผตึงช่วยก๊ำ บ่หื้อต่ำต้อย เนอนาย
คำผงแหมนั้น แต่งค่าวม่วนหลาย สำนวนป้อจาย ม่วนงันแต๊เจ้า
เจิญตึงญิงจาย หื้อมาแวะเข้า อ่านค่าวคำงาม วันนี้

บ่ดีหนีหาย มาจ๋ากล่าวจี๊ อู้กั๋นตี้หนี้ สักกำ
ถึงอยู่ไกล๋ล้ำ บ่ได้หันกั๋น เล่าค่าวหื้อฟัง ก็ผ่อหันได้
แต่งค่าวหยาดยาย ขึ้นเหนือล่องใต้ เข้ามาอ่านกอย แต๊นั้น

อันเมืองล้านนา มีหลายหลืบจั๊น ไปแอ่วว่าอั้น ม่วนดี
บ่ดีละไว้ เมืองงามสุขศรี ขอเจิญคนดี แวะแอ่วกั๋นได้..

[เครือออน]

อันเมืองล้านนา มีหลายหลืบจั๊น ไปแอ่วว่าอั้น ม่วนดี
บ่ดีละไว้ เมืองงามสุขศรี ขอเจิญคนดี แวะแอ่วกั๋นได้..

มวลหมู่พสก เหนือตกออกใต้ เจิญท่านเข้าไป แอ่วแวะ

หลายหลืบหลายจั๊น ดั่งท่านกล่าวแนะ แวะแอ่วกั๋นได้ ล้านนา
ผืนแผ่นดินนี้ มีขษัตถา ศาสน์เจ้าพุทธา ภาษาแบบเบ้า
สืบเจ้นครรลอง ของคนแก่เฒ่า สู่ลูกหลายเฮา ทั่วพร้อม

ค่าวใจ๊ค่าวธรรม ขอจ๋ำใฝ่น้อม ค่าวกล๋างค่าวก้อม จรรโลง
ค่าวเล่าซอจ๊อย ค่าวสร้อยประสงค์ แถมบทกะโลง จำนงสืบสร้าง
ขอหื้อจักสม อารมณ์ใฝ่อ้าง แม่ออนกำลัง ทำนุ

เริ่มตี้ชมรม ผู้สูงอายุ รวบรวมครุ ปัญญา
ครูค่าวครูจ๊อย ค่าวสร้อยภาษา พื้นเมืองล้านนา นัดมารวมถ้อย
สังคายนา กั๋นทีละหน้อย ท่านเจ้าวัดดอย เริ่มริ

นิมนต์ไหว้วาน ท่านเจ้าสิริ สุตานุสิฐ พระครู
ท่านมาเป็นเก๊า แบบเบ้าสวยหรู ตั๋วเมืองฟื้นฟู อ่านฮู้เขียนได้
ส่วนค่าวฝึกฝน คนบวกแย่งใต้ ศิริพงศ์,วงศไชย จ้วยก๊ำ

หนึ่งวันอบรม สมใจ๋เจ้นล้ำ จ๋ำจื่อไว้ได้ หลายคน
แม้นตั๋วข้านี้ ร่วมจี้ฝึกฝน ฝึกหัดนิพนธ์ คนหนึ่งว่าอั้น
ครูพักลักจ๋ำ ครูนำสอดดั้น ครูปัจจุบัน เร่งรัด

ได้นำมาเขียน จำเนียรประวัติ แม่ออนว่าอั้น อำเภอ
ดั่งค่าวขี้ไร้ ตี้ได้เสนอ ตางบนนั้นเนอ เลอล้วนขี้เมี่ยง

[เครือออน]

คำขวัญอำเภอแม่ออน
"ผาตั้งธาตุคู่เมือง รุ่งเรืองฟาร์มโคนม รื่นรมย์น้ำพุร้อน เมืองออนถ้ำแสนงาม"

สวัสดี เจ้าปี้นายน้อง หนุ่มเฒ่าสาวย้อง เพื่อนพ้องตังหลาย
ค่าวสร้อยบทนี้ จักจี๊ขยาย แหล่งท่องเที่ยวไทย ในแม่ออนหั้น
เมืองออนอยู่ใน เจียงใหม่ว่าอั้น เฉียงเหนือตะวัน ออกทิศ

ห่างจากตั๋วเมือง เจียงใหม่ไปนิด คิดได้สี่สิบ กิโล
ซุปเปอร์ล้วนล้วน ทางด่วนบ่โหล ทุกก๋าลก๋าโล แล่นโร่ถึงได้
ขอเจิญว่านเครือ เหนือตกออกใต้ จั๊กจวนกั๋นไป พบปะ

จุดแรกเป็นศรี สะหรีเต๋จ๊ะ พระธาตุผาตั้ง คู่เมือง
น้อมสักก๋าระ พระธาตุองค์เหลือง แล้วก้อยแอ่วเมือง แม่ออนแหล่งหล้า
บูรณะไว้ หลายปี๋ก่อนหน้า เจ้นศรีวิไจยา เจ้าตุ๊

ออกจากวัดไป เบื้องซ้ายบรรลุ แหล่งบรรจุอั้น นมโค
รวมน้ำนมดิบ หลายสิบหลายโหล หลายหมื่นกิโล นมโคเสริมสร้าง
วิสาหกิจ โคนมผาตั้ง แถมหลายตี้ตาง จ้าดนัก

น้ำพุร้อน เมืองออนฮ้องตั๊ก สันก๋ำแปงอั้น จื้อเดิม
พักเฮือนจุดเน้น พักเต็นท์จัดเสริม แจ้น้ำฮ้อนเติม เสริมสระน้ำว่าย
จักจัดเดย์แคมป์ พักแรมก็ได้ เล่นรอบกองไฟ ม่วนล้ำ

ถ้ำดอยศิลา นมผาหยาดน้ำ เป๋นธาตุในถ้ำ งามดี
พระลับลี้พักตร์ ก้อกหมากฤๅษี หัวนาคนาคี วารีไหลดั้น
หินงอกหินย้อย ใหญ่หน้อยก่อกั้น ล่อแสงระวรรณ วาววับ

ยังมีแถมหลาย มากมายเกินนับ จักกลับมาอู้ แถมรา
หมดเวลา ลงเพียงเต้าอี้ เต้านี้ขอวางลง ก่อนแลนายเหย.

[เจมส์]

เเ

ได้ฟังกล๋อนสาร ต่ำนานวาทะ กาละเมื่อตั้ง เมืองออน
หล่ำดับหล่ำดา เดินมาเป๋นต๋อน อำเภอแม่ออน ก่ำเหนิดขึ้นได้
ผดาเขื่อนเขา ลำเนาเหนือใต้ เลยก่ำแปงไป หลายปู้น

จักว่าอยู่ใกล้ ก่าบ่าไค่กู้น สีไกล๋อาละ จอยวอย
จักว่าอยู่ไกล๋ หายแส็บหายสอย ก่าเลยม่อนดอย นี้ไปเท่าอั้น
ขึ้นโตยน้ำทา เป๋นขั้นเป๋นขั้น จักผดก่จา ปี้น้อย

อยู่กล๋างต่าตาง กาว่าอยู่ซ้อย ขอตั๋วปี้หน้อย บอกกำ
ลุกจากเจียงใหม่ จักไปฮอดต๋ำ ขอบอกซักกำ ไปตางใดเจ้า
ตางสันก่ำแปง กาว่าเมืองป๊าว กาว่าหละปูน บ้านธิ

หนตางดีก่อ ป้อดอกหมะลิ ขอบอกข้าหน้อย เป๋นยา
สักกี่นาที ตี้จักไปหา ใจ้เวลา ม้อกใดปี้อ้ายฯ

[เครือออน]

ปี๋ติยินดี ค่าวนี้บ่หม้าย คำผงปี้จาย จ้วยตั๊ก

จึงขอขานไข หื้ออ้ายตี้ฮัก ฮู้จักแถมหน้อย แม่ออน
วันออกเนอครับ ลับหลืบสิงขร จ๊วยเหนือนคร เจียงใหม่ตี้หั้น
หนตางนั้นเนอ ซุปเปอร์ว่าอั้น สะดวกทุกกาล เจิญครับ

สี่สิบกิโล ปฐโมนับ จากตั๋วเมืองหั้น ออกไป
สันก่ำแปงล้ำ เลยไปบ่ไกล๋ สิบกิโลไทย ปล๋ายหื้อแถมห้า
สี่สิบนาที รี่ไปบ่ถ้า จากเจียงใหม่นา เกยนับ

คำผงปี้จาย เจิญไปเน้อครับ ยินดีต้อนฮับ สู่เมือง
แอ่วน้ำพุฮ้อน หินคลอนเหล่าเขื่อง โคนมรุ่งเรือง เหมืองผาน้ำดั้น
ถ้ำดอยศิลา ผาตั้งธาตุหั้น คู่บ้านคู่เมือง เก่ากี๊

น้ำตกตาดเหมย คนเอ่ยกล่าวจี๊ จ้าดม่วนตี้นี่ วังเย็น
ก่ำปองแห่งนั้น หมู่บ้านตี้เป๋น โฮมสเตย์เจน จัดพักแขกบ้าน
อาบน้ำแร่ แจ้น้ำนมหั้น มีหื้อจุวัน น้ำพุ

จักอู้ไปหลาย กลั๋วอ้ายว่าจุ๊ สามคุมาได้ เปลือกเดย
บ่ใจ้ว่าต๊า ดีกว่าเฉลย ไปลองผ่อเลย เอ่ยเจิญเน้อเจ้า

ดวงจิตเกษม น้องเจมส์แวะเข้า ยกเอาค่าวเดิม มาตั๊ก
เจมส์อยู่ที่ไหน ศิษย์ใดสำนัก เจมส์ฮักค่าวสร้อย ก่อจา
ค่าวสร้อยบทนี้ มีตอบแล้วหนา จึงยอกเอามา เจี๋ยรจ๋าตอบถ้อย.

[หรรษา]

อารมณ์สลวย ไต่ตวยค่าวสร้อย ได้แวะมากอย มวลมิตร

ติดต๋ามเสียงสาน วอนวานใฝ่คิด ใจ๋จิตม่อนข้า ลอยมา
เพราะมีใจ๋ฮัก ใฝ่สิเนหา ยังค่าวล้านนา อู้จ๋าม่วนถ้อง
ได้หันสร้อยจ๋า วาจาในห้อง มาวาดทำนอง บ่น้อย

หลายผู้แต๊หนา หรรษาหลิ่งค้อย อ่านค่าวซอถ้อย สำฮาน
หวานคำยิ่งนัก ของมักกลอนสาร ค่าวสารวงศ์วาน ผสานเรียงถ้อย.

[เครือออน]

ฟังคำเจ๋รฺจ๋า หรรษาบ่าวหน้อย เอ่ยถ้อยลำนำ ค่าวไว้

ข้าแสนยินดี ที่มีคนไง้ ค่าวขึ้นมาได้ แถมรา
ยิ่งมีคนฮัก มากนักหนำหนา ค่าวสร้อยล้านนา จักถาอยู่ได้
สมัยนี้นา บ่ว่าไกล๋ใกล้ ต่อค่าวกั๋นไป ในเน๊ต

ช่วยกั๋นเต๊อะหนา เชื่อว่าสำเร็จ เบ็ดเสร็จสืบได้ ค่าวซอ
อันตั๋วข้านี้ ม่อนมีคำขอ ช่วยกั๋นเต๊อะนอ มาต่อค่าวสร้อย.

[หรรษา]

บ่ถ้ากลั๋วเกร๋ง ยำเกรงว่าด้อย ขอเพียงมากอย เอ่ยตั้ก

เฮาบ่ว่ากั๋น ปงปันตี่ฮัก สำนักค่าวหนี้ ลำนำ
มาเต๊อะมาเต๊อะ เจ้าแม่งามขำ มาเอ่ยระบำ เพลงฮำค่าวถ้อง
ละอ่อนสมัย ใจ๋มันบ่ข้อง เรื่องค่าวทำนอง ซ้ำฮ้าย

กลั๋วมันสลาย มลายโยกย้าย หนีไกล๋ต่องพ้าย เมืองเฮา
มาเต๊อะปี่น้อง เปื่อนป๊องอย่าเหงา ของดีเมืองเฮา มาค้นสืบแถ้ง.

[บุคคลทั่วไป]

ย้อนว่าจ๊ะต๋า ผญ๋าด้องแด้ง กั๋วบ่มีแฮง จ้วยยู้

คันบ่ว่าสัง บ่จังกำฮู้ ขอมาฟู่อู้ โตยคน
อยู่เดวโต๋เต๋ หละเวเหหน มนุษย์เมืองคน สังมาง่อมใบ้
หันเพิ่นสุกเสิน จ๋ำเริญไจ้ไจ้ ตั๋วเฮาหมองดาย โศกตุ๊ก

โหน่ยเดวโต๋งเต๋ง ขอเลงเข้าปุ๊ก ขอเข้าหมู่ห้อม ตอมคัว
จ๋าติว่าฮับ ข้าจักกลับตั๋ว บ่หื้อหมองมัว กับตั๋วปี้อ้าย

[หรรษา]

ไผไหนจาหา วาจ๋าดั่งด้าย สอยมัดเส้นใย เรียงร้อย

มาเรียงผสาน เป๋นหนานหรือน้อย สำนวนบ่ด้อย เนอนาย
เป๋นเรื่องดีแต๊ มาแก้ขยาย ค่าวล้านนาไทย ดีใจ๋บ่หน้อย
มาเต๊อะมาแถม มาแอมแซมสร้อย จ่วยวาดฮีดฮอย อย่าคร้าน

หื้อค่าวเมืองเหนือ ดังเหลือสะต๊าน หื้อจาวต่างบ้าน ลือจา
หมู่หัวกะทิ อย่าลี้หนีหนา ขะใจ๋ปันมา ล้านนาค่าวถ้อง.

[เขียดด้อง]

ตั๋วข้านี้หนา จื้อว่า"เขียดด้อง" เป็นคนเมืองยอง ก่อนนั้น

บ่าเด่วยะก๋าน ทำงานหลายจั๊น อยู่กรุงเทพหั้น เมืองไทย
ย้อนยังสำนึก กึ้ดถึงความหมาย เจิงล้านนาไทย ป้อหม่อนแม่เฒ่า
จึ่งได้เสิกสา ต่ำฮาแบบเบ้า ยังแบบลำเนา ค่าวเจื๊อ

กำลังหัดเขียน ป้ำเปียรเข้าเนื้อ หวังว่าจักได้ ตำนอง
วันนึ่งมาป๊บ ยังเจ้าตังผอง บ่าหน้อยเมืองยอง สังจุ้มใจ๋ใบ้
นึ่งก่าไค่หัว นึ่งก่าไค่ไห้ เขียนไปเขียนไป บ่เพราะ

ขอเจ้าตังหลาย จ๋าไปฟังเยาะ ใส่ตั๋วข้าหน้อย มอยดำ
คันบ่ถูกเนื้อ บ่าเขือยำผำ ขอจ้วยสักกำ สอนหื้อข้าหน้อย

[หรรษา]

อะและอะและ จ่างแก๊ะแทะอ้อย มาวาดฮีดฮอย หวานนัก

ลูกบ่มสุกใส หวานในคนมัก มีดฝักสอดด้าม คมดี
เขียดด้องมายู๊ กระทู้บ่หนี สำนวนเปิ่นดี วาตีกล่าวอ้าง
คารมจั้นเจิง มาเปิงเสริมสร้าง อ่านแล้วบ่วาง ม่วนแต๊

หรรษาบ่าวจ๋น เรรนยอมแป๊ เพราะบ่จ่างแก้ กำใด
เขียดด้องอ้ายนั้น มาจากแดนไกล๋ ซ้ำเก่งซอใย เปิงใจ๋แห่งข้า
หรรษานี้หนา กำจ๋าบ่กล้า ดั่งสกุณา นกน้อย

ก่ำลังหัดขัน ตึงวันค่าวจ๊อย ปีกยังอ่อนด้อย จักบิน
จึงเข้ามาฝึก เจ๊าดึ๊กอาจิ๋นต์ ย้อนกลั๋วโบยบิน ตกลงน้ำกว้าง.

[เขียดด้อง]

นกน้อยบินจ๋ร ค่ำนอนก่าค้าง อยู่กล๋างดงดำ ป่าลึก

คันมีกะหลา กู้จ๋าสำนึก ฝึกกั๋นเทื่อหน้อย กอยบิน
นกหังตั๋วน้อย ต่ำก๊อยโผผิน ทะแล็ดเปียงดิน แล้วบินขึ้นตั้ง
ต่างโตะต่างต๋อม หอมในไฝ่อ้าง บ่เมินบ่นาน สมคิด

ก้อยบินถะหลา ซ้ายขวาขึ้นควิด ติดต๋ามเป๋นกู้ หมู่จุม
นกน้อยหมู่นี้ เป๋นหมู่นกหูม มาเกาะมากุม มาแป๋งค่าวสร้อย

[เครือออน]

บุคคลทั่วไป ได้มาเสริมถ้อย มาร้อยมาเรียง อักขระ

เขียดด้องมาเสริม มาเติมวาต๊ะ อรรถะรสะ ลวดลาย
ยินดียิ่งแล้ว มิตรแก้วสหาย เพิ่มแถมสองราย มาหมายแต่งแต้ม
เครือออนหรรษา บ่าตันได้แอ้ม เขียดด้องมาแซม ครูจั๊น

ได้อ่านค่าวของ เขียดด้องแล้วนั้น เหมือนเกลี๋ยวเชือกฝั้น ถูกลาย
ตรีโทเรียบร้อย รสถ้อยเหลือหลาย ศัพท์แสงแห่งจาย ลื่นไหลหล้องหล้อง.

[เขียดด้อง]

เป๋นวาสนา ได้จ๋าได้ถ้อง ป้อเครือสีออน อ้อดฮ้อด

เขียดด้องสดใส หัวใจ๋ลั่นค้อด มันเป๋นสันนี้ เฮาเฮย
เหมือนงัวได้ฮอก เหมือนดอกได้เผย สีบัวเจย ม่วนใจ๋เสี้ยงหั้น
ได้อู้กำเหนือ ได้เฝือกำต้าน เฝิกสมองยาน เค่งกั๊บ

ยกมือวันตา ไหว้สาคำนับ กำใดบ่จับ สุมมา
ลางเทื่อป่องแป๊ว แล้วแต่ภาษา เป๋นกล๋อนปามา จ๋าบ่ถูกต้อง

[หรรษา]

ความฮู้เปิ่นหลาย มากมายลั่นป้อง ป๋านสายน้ำนอง ไหลปั้ด

แม่น้ำห้าสาย หลากหลายเซซัด เอ่อล้นถั่งขึ้น เนืองนอง
ตี๋ฟองเยือกย๊าว ตั่วด้าวตังผอง เปรียบเหมือนทำนอง ของอ้ายเขียดด้อง
ขอนับถือสา โมตนาหย้อง เปิ่นจากเมืองยอง ถิ่นนั้น

มาวาดเสียงสาน กังวานหลืบจั๊น หยั่งลึกถึงหั้น ระบำ
หายากแต๊ครับ คำนับหนาหนำ แต่งค่าวเพลงฮำ ระบำม่วนสู้.

[เพลงซอ]

คารมคมคาย ของจายจ๋าอู้ หนี่งในตองอู ม่วนเพราะ

เสียงเอกโทตรี วาทีต่องเตาะ สอดเลาะเลี้ยวลด ไปมา
ภาษาเก่งล้ำ ลำนำหรรษา ค่าวซอล้านนา เขียดคาเขียดด้อง
ว่าตั๋วอยู่ไก๋ แต่ใจ๋อยู่ห้อง ซ้ำเป็นคนยอง ก่อนนั้น

ยะการอยู่ไก๋ ปากไทยปี้จั้น ยังบ่ลืมอั้น กำเมือง
คารมวาทะ ว่าได้ไปเปลื๋อง ขอหื้อรุ่งเรือง ยังเมืองก่อนเกื้อ

[หรรษา]

เมืองยองแดนไกล๋ แต่ใจ๋มันเือื้อ เป๋นวงศ์ญาติเครือ ล้อนๆ

คนเมืองเหมือนกั๋น ปงปันยอดม๊อน ไทยใหญ่ขอดข้อน เครือเฮา
ไทยลื้อม่านเงี้ยว กอดเกี้ยวบ่เหงา ตึงเปิ่นตึงเฮา ก๋วนเก๋ากอดเกี้ยว
คนยองเหมือนกั๋น เครือวัลย์หวันเกี้ยว เครือสายมัดเรียว ขึ้นไม้

เหมือนดอกในขัน หลายพันธุ์นั้นไซ้ อยู่ตวยกั๋นได้ งามดี
หลากสีหลากเจื๊อ ก่อเกื้อบ่หนี ดูสวยงามดี ย้อนสีแต่งส้อม
ไทยเฮาตังหลาย มายายนั่งต้อม เกลี๋ยวเจือกมัดฮอม ผูกฮัด

ปี่น้องวงศ์ศา ล้านนาแน่ชัด เกลี๊ยวฮัดเจือกเส้น วงศ์เดียว
เส้นฝ้ายเจือกมัด ผูกฮักกล๋มเกลี๋ยว มัดกั๋นเตื่อเดียว กล๋มเกลี๋ยวเต่าเฒ่า.

[เขียดด้อง]

สะมึ้งกำเดว เตวไปกิ๋นเข้า ผากดหมู่เฮา ทึดๆ

เขียดด้องแล้วใจ๋ ปายในเฮ่งกึ้ด จักตอบสังได้ ไดดี
สมองซีกซ้าย ปอย้ายตั๋วหนี ซีกขวายูยี กึ้ดสังบ่ได้
ม่วนล้ำม่วนเหลือ สามเขือปี้อ้าย ปากั๋นมายาย ต้อนฮับ

คนยองคนเถว อยู่เดวกีดกั๊บ หมดเสี้ยงกำอู้ จูเจย
วันนี้บ่ต๊า วันหน้าปี้เหย จักมาจูเจย เป๋นเขยฮ่วมห้อง

[หรรษา]

มันบ่เป๋นหยั๋ง กาอ้ายเขียดด้อง เพราะอ้ายช่ำชอง ค่าวจ๊อย

ถ้าว่างวันไหน เร็วไวปี่น้อย มาขานต่อถ้อย ตึงดี
เปื่อหื้อค่าวนี้ บ่ลี้หลีกหนี คนบทก็ดี อย่าหนีหายจ้อย
ส่วนผมหรรษา นั้นนายังหน้อย สีผิวดำมอย เยาว์น้อย

อายุซาวปี๋ บ่าวจี๋ชะม๊อย เป๋นละอ่อนหน้อย แต๊นา
หันอ้ายมาฮ้อง ว่าปี่หันสา ตี่แต๊นั้นนา ผมยังหนุ่มหน้อย.

[เพลงซอ]

บ่ไหวกาหา เขียดคาตั๋วจ้อย บ่มีบัวลอย ห้องนี้

จักมาเป็นเขย อ้ายเลยขอจี้ บ่หมีนารี คนงาม
ป้อจายทั้งนั้น หันเป็นสี่สาม มองพิมนงราม นมหลามเหี่ยวแห้ง
มองพิมขะใจ๋ อ้ายบ่ได้แกล้ง ขะใจ๋มาแยง บ่าวเจื้อ

เปิ้นขอเป็นเขย มาเจยหน่อเนื้อ หื้อน้องจุนเจือ สักกำ
หรรษาเพลงซอ เครือออนปอหวาม น้องพิมคนงาม ข่ามมาจ่วยอ้าย ...

[หรรษา]

มองพิมพ์สาวจี๋ นารีดอกฝ้าย ไผหันฟูมฟาย ร่ำร้อง

ไห้หาคนสวย คนตวยแซ่ซ้อง คนหวันจีบถ้อง นางงาม
ป้อจายบ่าวเคิ้น เก่าเนิ้นหลายหลาม บ่าวจี๋บ่าวงาม ติดต๋ามจีบถ้วน
ถ้าใคร่เป๋นเขย อย่าเลยขาดด้วน หมั่นมาเวียนวน บ่อยครั้ง

อย่าได้ลาสา ตุมลาพักยั้ง เขียดด้องใจ๋ตั้ง คำจาย
หมั่นมาไจยเต๊อะ อย่าเพ๊อะหนีหาย เผื่อตั๋วอ้ายนาย จะได้หันหน้า.