ประวัติอำเภอแม่ออน(อย่างย่อ)

[หรรษา]

ก็ลักสงสัย ใยบ่มาถ้อง ว่าหลงหมายปอง สาวน้อย

หมู่เฮาตังผอง นึกตรองคะค้อย หลายถ้อยต่างอู้ นานา
ตี่แต๊ลุงล้อ ก๋ารนักแต๊หนา เขยมรณา ล่วงลากว่าจ้อย
เป๋นธรรมดา สัตต๋าใหญ่หน้อย มัจจุราชมากอย แน่แล้ว

ย่อมบ่มีไผ อยู่ได้คลาดแคล้ว ต๋ามก๋รรมสะแหว้ว ปาไป
หายโศกตุ๊กข์แล้ว ก่อยมาขานไข อู้จ๋ากั๋นไป วันหน้าก็ได้.


ขอแสดงความเสียใจ๋ตวยครับ

[ล้อเลื่อน]

สังขารสังเข้บ ก๋ารเจ้บป่วยไข้ บ่มีคนใด หนีป๊น

บุญป๋าระมี ความดีหยู้หย้น เปื้อหื้อหลุดป้น วังวล
ยังบ่หม้วยหม้าง หมั่นสร้างกุศล หวังหื้อบันดล เกิดผลภายหน้า
กั๋มดีกั๋มเสีย เป๋นเรือล่องหล้า เป๋นยานนำพา ท่องภพ

โลกตี้ว่างาม เป๋นสนามรบ สยบตี้เส้น ชั่วดี
เกิดมาผ่อฟ้า ตั้งท่าวิ่งหนี วิ่งสุดชีวี ก็หนีบ่ป้น

[หรรษา]

จักคาดสินบน เอาต๋นถีบหย้น ซื้อชีวิตคน ยืดเยื้อ

มัจจุราชเหย บ่เกยเอื้อเฟื้อ สำหรับไผผู้ ใดเลย
มีเงินร้อยล้าน ยังก๊านแต๊เหย ความต๋ายบ่เกย ผาณีไผได้
มีลมหายใจ๋ รีบไวเข้าใกล้ สร้างบุญกันไป อย่าละ

หมั่นเข้าหาสงฆ์ ดำรงค์กำพระ รัตนะเจ้า ดวงบาน
เอาสามแก้วไท้ เปิ่งไหว้สาสาน จักจื่นเจยบาน ยามต๋ายขว้ำหน้า

[เครือออน]

บุรุษอิตถี บุญมีแก่กล้า หลังมรณา ป๊นตุ๊กข์

เครือออนใจ๋แป๋ว กึ๊ดแล้วขนลุก สนุกอยู่ได้ วันวัน
บ่ฮู้จักตุ๊กข์ สนุกสุขสันต์ จีวิตเมามัน บ่สรรค์แต่งสร้าง
หากมรณา จักหาใดอ้าง เพื่อเปิดหนตาง ขึ้นฟ้า

มีแต่บาปกั๋มม์ ระยำต่ำจ๊า มีสิทธิ์บ่ายหน้า โลกันตร์
ต้องปรับจีวิต จากผิดคืนหัน ทำดีทุกวัน นิปปานฮอดจั้ง.

[หรรษา]

ใจ๊ธัมข่มใจ๋ ยามเมื่อสลั้ง สติอย่าปัง แตกม้าง

หื้อฮู้ตั๋วต๋น ยามเมื่อหลงค้าง ตกหลงน้ำกว้าง วังวน
ยามมีราคะ ตั๋ณหาในต๋น สติเข้าจน ฮู้ต๋นหื้อได้
ระลึกในใจ๋ ท่องไปไจ้ไจ้ บ่หลงลืมไป กำพระ

สติหื้อจ๋ำ สัมปะชัญญะ เปิ่งปะไจ้ไจ้ ตึงดี
สติมีแล้ว จักบ่ตุ๊กขี แป๋งใจ๋หื้อดี สุขขีอยู่หน้า.

[ล้อเลื่อน]

อันบุญกุศล เป๋นผลต้นกล้า นำพาชีวา ป๊นตุ๊กข์

เมื่อมีสังขาร มวลมารรบรุก สติมุ่งมั่น หมั่นตรอง
สัมปะชัญญะ ชนะทั้งผอง เพียงแต่ประคอง ใจ๋ต๋นหื้อได้
อย่าเอาใจ๋ต๋น ลอยบนโลกใต้ หลงในกามา ราคะ

ฮู้สึกบาปก๋ำ จ๋ำเอาคำพระ ธรรมมะตั้งหมั่น ครรลอง
สมัยใหม่นี้ อยู่ตี้สมอง จะนั่งทับทอง ฤก๋องกาบกล้วย

[เครือออน]

ทำซื่อทำดี อย่ามีโก๊งส้วย บุญจักอำนวย สู่ฟ้า

สวรรค์นิปปาน โลกอันสง้า จักถ้าอยู่หน้า ตางไป
ศีลห้าข้อนั้น ถือมั่นด้วยใจ๋ ธัมม์ห้าฝังใน จิตใจ๋เนอเจ้า
หื้อฮักครอบครัว ผัวเมียลูกเต้า มัธยัสถ์เอา จ่ายซื้อ

จักกิ๋นจักตาน ผะหมานจุ้มื้อ ขออย่าได้หื้อ เกินมี
สุจริตไซร้ ก๋ายใจวจี๋ มัคคะตางดี สุคติห้อง.

[หรรษา]

สาธุไหว้สา ต่านตี่เกี่ยวข้อง ขอไขทำนอง เล็กน้อย

มวลมิตรซอสาส์น เจือจานค่าวจ๊อย ม่อนมาเอ่ยถ้อย ทักทาย
หลายวันล่องลับ ตี่ผมหนีหาย เป๋นเพราะเจ้านาย สั่งก๋ารหลายถ้าน
ตึงวันก๋วนเก๋า มัวเมาจุ้นจ้าน เวียกก๋ารเรื่องงาน สัปปะ

ช่วงเทศก๋าล ปี๋ใหม่นั่นละ สว๊ะตึงบ่ได้ เลยงาน
สัพเพเหระ ธุระเรื่องก๋าร ขอลาวงศ์วาน เยี๊ยะก๋ารก่อนเจ้า.

[เครือออน]

ปี๋ใหม่สังขานต์ สงกรานต์แบบเบ้า ล้านนาของเฮา ผ่านแล้ว

ขอหื้อมีไจย โพยภัยคลาดแคล้ว สมพรพระแก้ว ปุ๊ทธา
แต่หรรษานั้น ไปไหนกาหา บ่เสร็จเตื้อกา ก๋ารงานของเจ้า
หรือปี๋ใหม่เมือง ได้เรื่องก้าเหล้า เจ็บเกล้าเมาเวียน ศีระษ์

หรรษาห่างเหิน ไปเมินแต๊ละ เหล่าเพื่อนเพิ่นถ้า เนอนาย
เครือออนเลื่อนล้อ หน้อยต๊ะสหาย ง่อมเหงาเปล่าดาย ขะไจ๋หรรษ์หล้า.

[หรรษา]

เวียกก๋ารนี้หนอ มัดคออยู่ถ้า แก้คว่างแล้วกา บ่เมี้ยน

ซ้ำมาหวันขา บ่กลาแผกเพี้ยน ดั่งเสี้ยนต๋ำหั้น มือเฮา
กว่าจักสำเร็จ ก็เหน็ดอับเฉา อิ๊ดเหนื่อยบ่เบา มัวเมาเหี่ยวห้อย
สำหรับสุรา นั้นกามีหน้อย ก็มอกเอ็นจอย คึกคัก

บ่ปอกิ๋นหลาย มากมายตึ้กตั้ก ก๋ารนักอยู่ถ้า ยังเฮือน
ส่วนในวันนี้ ก็ปอแฉเฉือน ก๋ารเริ่มลางเลือน ทุเลาแล้วเจ้า.

[เครือออน]

ยินดีษาหรร ยะก๋ารได้เป้า อยู่เหย้ายังเฮือน ก็ยะ

เป๋นก๋ารใดจา ไค่ฮู้อะละ ยะก๋ารหยังเจ้า ยังเฮือน
ก๋ารวาดก๋ารคัด ก๋ารดัดหื้อเหมือน ก๋ารยะยังเฮือน ก๋ารหยังกาเจ้า
เจียงใหม่เมืองไกล๋ สั่งได้ก่อเจ้า สั่งได้จะเอา ไปใจ๊

เป๋นปู๋นเป๋นหิน เป๋นดินเป๋นไม้ เป๋นกระดาษฝ้าย ไหมพรม
ของกิ๋นของใจ๊ ของใหม่ผสม ของเก่านิยม บอกผมสักหน้อย.

[หรรษา]

หลายวันนั้นหนา หรรษาอ่อนด้อย ติดว่าวโคมลอย เหนื่อยล้ำ

ร้อยห้าสิบดวง เสร็จเมี้ยนเสี้ยงซ้ำ เปิ่นย้ำด่วนหื้อ ไวไว
เปื่อเอาไปใจ๊ งานปอยศรีใส วัดแม่คีใน ยกฉัตรว่าอั้น
ขึ้นสู่บนปล๋าย เจดีย์แม่นหมั้น ก๋ารเปิ่นสำคัญ ยิ่งนัก

ผมเลยอิ๊ดหลาย บ่มายจะพัก เลยลักหายหนี้ หลายวัน
เนอเจ้าป้อไท้ ขออย่าว่ากั๋น ป้อศรีสุพรรณ เครือออนป้อเจ้า.

[เครือออน]

หรรษาสุขขี เพิ่นมีงานเข้า ติดว่าวโคมลอย ล่องฟ้า

คงเป๋นโคมลม นิยมสง้า วัดวาปล่อยหั้น เมื่อวัน
โคมแก่นหนึ่งนั้น สี่เหลี่ยมกล๋มผัน ใจ๊กระดาษมัน กี่แผ่นกั๋นเจ้า
ขายแก่นเท่าใด คงได้ต๋ามเป้า รายได้บ่เบา รวยทรัพย์

ส่วนว่าวโคมไฟ เขาใจ๊ก่อครับ สำหรับปล่อยเหล้น เมื่อคืน
ปล่อยว่าวเคารพ เสียงถบเสียงปื๋น เลยวันเลยคืน ม่วนชื่นตื่นเต้น.

[ล้อเลื่อน]

งานเข้าเหลือหลาย บ่ใจ้ของเล่น ยะก๋ารจ๋นเอ็น ขอดข้ด

หันว่าวโคมไฟ ลอยไปส้ดส้ด ผ่อแล้วตื่นเต้น แต๊นา
ก่เพิ่งได้ฮู้ ฝีมือหรรษา เปิ่นมีวิชา ปั๋ญญารอบด้าน
ป้อยอดกะถิน กิ๋นได้ทั้งก้าน หยังมาชำนาญ ก๋ารนัก

หันบ่นนักหนา ว่าบ่ได้พัก ขะมักเขม้น เน้นงาน
รายได้เดือนนี้ บ่มีคนหาร ในธนาคาร คงมีบ่หน้อย

[เครือออน]

อ้ายล้อเลื่อนจ๋า ข้าขอเสริมถ้อย ใบร้อยใบปัน เป๋นปึ๊บ

เหรียญเงินเหรียญทอง นั้นก๋องขะลึบ ทุกหลืบทุกห้อง เต๋มเฮือน
หมั่นหาอย่างนี้ บ่มีใผเหมือน เร่งปี๋วันเดือน เหมือนมีงานใกล้
เปิ้นจะหมั้นหมาย กับสาวบ้านใต้ แม่จันเจียงฮาย ปู๊นละ

งานใกล้มาถึง จึงมุมานะ หาสตางค์หั้น ตึงวัน
บอกกั๋นโตยเน้อ อย่าเผลอลืมกั๋น แต่งปี๋เดือนวัน หรรษาบอกหน้อย.

[หรรษา]

ขออู้เอ่ยเสริม เพิ่มเติมสักถ้อย แก้ค่าวโคมลอย แห่งนี้

ตี่ป้อเครือออน เจ้ามอนกล่าวจี๊ บ่เป๋นว่าอั้น ความจริง
ว่าหาเงินใจ๊ หวังได้สู่สิง ไปขอนางญิง บ้านเหนือบ้านใต้
ตี่หลานหรรษา วักมาหาได้ เงินบาทเงินใบ มาใจ๊

เปื่อมาจุนเจือ ป้อแม่แต๊ไซ้ วักมาหาได้ ปอดี
เงินปันหมื่นล้าน นั้นยังบ่หมี เหรียญบาทแต๊มี เต๋มออมสินข้า
เงินฝากบัญชี ก็มีอยู่ถ้า สตางค์นั้นกา บ่นัก

ได้เงินเยี๊ยะก๋าร ก็เอามาพัก ในกาดเน้อเจ้า รายวัน
ตึงบ่เหลือไว้ ไปฝากแบ้งค์กั๋น จุ๊มื้อคืนวัน มันเป๋นอย่างอั้น
และแหมคำถาม ตี่มีก่อนหั้น ก็หันสำคัญ เรียบร้อย

เรื่องว่าวโคมลอย ผมเยี๊ยะแก่นน้อย มอกปอส่งห้อย ลอยลม
เรื่องราคานั้น ก็มอกเหมาะสม บ่ใจ่อู้ลม แก่นสี่สิบห้า
บ่ใจ่หวังขาย กำไรเน้อข้า ต๋างทำบุญนา งานวัด

ย้อนเปิ่นมาขอ ก็เลยบ่คัด ต๋างฝึกว่าหั้น ฝีมือ
บ่ใจ่หวังเยี๊ยะ เป๋นอาชีพถือ ใคร่ฝึกฝีมือ บ่าดายเน้อเจ้า.

[เครือออน]

ยินดีโตยหนา หรรษาหน่อเหน้า งานเข้าจึงมี เงินใจ๊

ฮิหาประจ๋ำ เงินคำบ่ไร้ นักหน้อยก็ได้ ตึงวัน
ซื้อกิ๋นจ่ายใจ๊ รายวันครือกั๋น ฮิหาเตื่อมตัน ตึงวันใจ๊ได้
แบ่งไว้พ่องหนา ฮักษาใส่ไถ้ นำฝากแบ้งค์ไทย ไว้ครับ

เพื่อเมินเมินไป จักได้มีทรัพย์ สำหรับแต่งเต้า แต่งเมีย
ที่หมายต๋าไว้ จักไปไหนเหีย มีลูกมีเมีย เหียกำเน่ออ้าย.

[หรรษา]

อู้ไปอูมา กลับมาต่องผ้าย เรื่องเมียหลานจาย แหมแล้ว

แต่ก็ขอบใจ๋ มากมายบ่แคล้ว ตี่จ่วยบอกแผ้ว นำตาง
ความหวังดีนั้น ขอบคุณบ่จ๋าง ตี่บ่ละวาง หรรษาหลานหน้อย
ม่อนจักเอาเป๋น คำสอนกล่าวถ้อย บ่ละเลื่อนลอย หายลับ

ป้อหนานแนะนำ จักจ๋ำไว้ครับ สำหรับคำอู้ เครือคำ
เก็บเงินเอาไว้ ฝากแบ้งค์หนาหนำ เป๋นสินสอดตำ ขอนางน้องแก้ว.

[เครือออน]

ที่ม่อนเครือออน มาวอนแจ้วแจ้ว เพื่อหวังเป๋นแนว ช่วยก๊ำ

หื้อหลานหรรษา ฟังราย้ำย้ำ ไปไหนทั่วก้ำ จุ่งกอย
เลือกหาสาวนั้น ตึงวันอย่าถอย สถานงานปอย จงหาหื้อได้
อายุหรรษา แก่มาไจ้ไจ้ หากเถ้าล้ำไป บ่มัก

ขะไจ๋เซาะหา ภรรยาที่ฮัก มาสักหนึ่งเจ้า เมียแปง
ลุกมาเมื่อเจ๊า หนึ้งข้าวหุงแก๋ง ฮอดต๋าวันแลง ปะแป้งรอถ้า.

[หรรษา]

อายุหรรษา บ่ถึงซาวห้า โอกาสนั้นกา มีนัก

แต่ก็ยังดี ตี่ห่วงหลานฮัก บอกตั้กเรื่องหั้น แนวตาง
หากผมได้ฮัก ตึงบ่จืดจ๋าง คนฮ่วมเดินตาง น้องนางร่วมข้าง
เลือกนางตี่เสียง สำเนียงบ่ด้าง มาฮ่วมเดินตาง จีวิต

เลือกเฟ้นคัดสรร สำคัญต้องคิด ต๋ามดวลพินิจ นานา
เครือออนป้อนี้ แนะจี๊หรรษา ขอบคุณแต๊นา ยินดีชอบสู้.

[เครือออน]

ยินเหมือนหลับฝัน ใจ๋หรรษ์หลิ่งหลู้ จักหาพธู เมียฮัก

เครือออนคนไกล๋ สุขใจ๋ยิ่งนัก สักวันจะได้ มัดมือ
เผ่าพงศ์พี่น้อง เพื่อนพ้องนับถือ มาฮ่วมมัดมือ วันแต่งวันหมั้น
คงเป๋นสาวไทย เจียงฮายที่หั้น อำเภอแม่จัน นั่นละ

บอกหื้อไกล๋ไกล๋ เนอนายหรรษ์จ๊ะ จะได้เตรียมอั้น ตั๋วตัน
ใกล้เขามาแล้ว บ่แคล้วเนอหรรษ์ หล้างเถิงสักวัน ส่งหรรษ์เข้าห้อง.

[หรรษา]

บ่าเดี๋ยวเยี๊ยะก๋าร ปอผอมหล้องหง้อง หวังเก็บเงินทอง นั่นละ

ก่ำลังขนขวาย สร้างต๋นฐานะ ก๋ารมีธุระ บ่วาง
สักวันก่อนเน้อ ถ้าเงินบ่จ๋าง หล้างมีน้องนาง มาแนบปิงข้าง
บ่ใจ่ว่าหรร นับเอ่ยนับอ้าง สักวันเน้อนาง นาฎน้อง

รอหรรบ่าวจ๋น สร้างต๋นเลี้ยงต๊อง เก็บเงินแต่งหย้อง อดออม
ถ้าเงินพร้อมแล้ว เป๋นหนุ่มเนื้อหอม สาวๆมาดอม แวดหลังแวดหน้า.

[เครือออน]

ขอหื้อสมฝัน เนอหรรษ์หลานข้า ได้มิ่งชีวา น่าฮัก

หื้อได้เมียดี แม่ศรีผ่องพักตร์ งามนักนอกได้ ในดี
ฮิหาเงินไว้ ไจ้ไจ้เนอศรี เมื่อหรรษ์มั่งมี เมียดีตึงได้
งามนอกงามใน ใจ๋บ่บอดใบ้ ก๋ายศิวิไลย งามพร้อม

เหล่าญาติกา วงศาพี่น้อง ฝูงหมู่เกี่ยวข้อง ยินดี
ขอหื้อหรรษ์นั้น สุขสันต์สุขี ย้อนได้เมียดี เป๋นศรีคู่ข้าง.

[หรรษา]

คงสมเปิงใจ๋ ทรวงนัยต๋ามอ้าง หากวางแนวตาง หว่านเจื๊อ

หมั่นฮิหมั่นหา อย่าได้รั้งเรื้อ คงสมใฝ่เอื้อ คะเน
สร้างความเพรียบพร้อม บ่หื้อห่างเห บ่หื้อรวนเร ฐานะตั้งหมั้น
หากพร้อมแล้วบ๋อ อย่ารออยู่หั้น ครอบครัวสำคัญ ยิ่งนัก

เมียฮักเตียมศรี กวรมีฟูมฟัก สร้างฮักหล่อห้อง ฤทัย
ก่ำลังใจ๋นี้ หล่อเลี้ยงหัวใจ๋ บ่ว่าคนใด ควรแนบเตียมข้าง.

[เครือออน]

หากจ๊าเกินไป เกินวัยบ่หล้าง อายุจายนาง เถ้าล้ำ

เลี้ยงลูกหลานหลาย ยามวัยต๋ำน้ำ บ่ตันฮอดจ้ำ กิ๋นแฮง
แต่งเมียเจ๊าเจ๊า แต่งเถ้ากิ๋นแหนง เลี้ยงลูกกิ๋นแฮง ต้องแต่งหนุ่มหน้อย
ยามเถ้าชรา เมามาเลี้ยงต้อย มันไกล๋จอยวอย เปิ้งป๊ะ

ขอเตือนหรรษา อย่ามัวปล่อยละ หื้ออายุเจ้า เถ้าไป
ซาวปล๋ายแก่แล้ว หลานแก้วขะไจ๋ หากจ๊าเกินไป น้ำไห้จักห้วง.