นิ้วตังห้าถลาเถิงเมือง

[เครือออน]

นิ้วมือเฮานี้ เป๋นดีสังก๋า ยกฝ่ามือมา แยงต๋าผ่อจ้อง
หัวแม่มือ มีสองข้อปล้อง แต่บ่เป๋นรอง สักนิ้ว

ตึงกดตึงก๋ำ ขะย๋ำปั้นหลิ้ว นิ้วแม่มืออั้น มั่นดี
หักหน้าวอกนั้น ตึงกั่นดีหลี โอ้งขะโหล้งมี งว้ายดีลาบส้า
เป๋นแม่แลหัว ในนิ้วตังห้า หัวแม่มือนา ฟังเต๊อะ

นิ้วมือขาดหัว ขาดแม่มักเลอะ ตึงกำบ่หมั้น สักราย
หัวแม่มือก๊ำ หื้อนิ้วตังหลาย หญุบสังง่ายดาย ก๋ำได้แน่นหมั้น
จ๋าเตียมไป ในเมืองไทยอั้น สามสถาบัน นั้นละ

ชาติขษัตถา แลศาสนะ ขว้างละบ่ได้ สักอัน
ขอไทยเฮานี้ สามัคคีกั๋น ฮักษ์สถาบัน ไว้มั่นเน้อเจ้า
ส่วนนิ้วตังหลาย ขยายขดเข้า ถัดมาหมายเอา นิ้วจี๊

ผู้นำตังหลาย ของไทยเฮานี้ หมายเอาตี้หนี้ รัฐบาล
ห่อนได้ก้าจี๊ ต้องมีผะสาน หื้อกุ๊หน่วยงาน ฮ่วมกั๋นสรรค์สร้าง
นิ้วกล๋างสูงยาว สาวเลิ๊กและกว้าง กว๊านกวาดวาดวาง สัปป๊ะ

คนเฒ่าญิงจาย ตั้งหลายนั้นละ คณะองคะ มนตรี
เปิ้นอาบน้ำฮ้อน มาก่อนหลายปี๋ ประสบการณ์มี สติเตี้ยงหมั้น
เปิ้นตั๊กเปิ้นจ๋า อย่าดันดื้อดั้น ควรอภิวันท์ นอบน้อม

มาเถิงนิ้วนาง สำอางค์เพียบพร้อม ถ่อมน้อมตั๋วได้ งามดี
นิ้วนางนี้ไซร้ ได้เพศอิตถี คือกุลสตรี เป๋นศรีแห่งบ้าน
นิ้วก้อยโตยมา เก่งกล้าบ่หย้าน ยามเมื่อไหว้วาน ออกฮับ

ล้วงแคะแกะเก๋า ก้อยเอาบ่นับ เผียบกับหนุ่มเหน้า สาวแลว
หนุ่มสาวเฮานั้น เฮียนมันหื้อแผว เหลี้ยมเอาจ๋นแซว ตะแหลวเมืองหั้น
เป๋นเลือดใหม่ใน เมืองไทยว่าอั้น พัฒนามัน กู่เจื๊อ

เฮาท่านตังหลาย อย่าได้ก้าเงื้อ เหตุการณ์มันเอื้อ ต้องลุย
นิ้วตังห้านั้น รวมกั๋นแล้วฉุย ก๋ำเป็นละกุย ลุยเลยเน้อเจ้า ลุยเลยเน้อเจ้า.

[พูนอุดม.เวียงเขลางค์]

ถ้าขาดนิ้วชี้ จะใช้อะหยัง ชี้ของหลายอัน อันไหนดีเจ้า
ขาดหัวแม่มือ แบมือออกเข้า หยิบของอันใด ก็หลุด

ถ้าขาดนิ้วนาง ก็คงรักคุด จะใส่แหวนหมั้น จะได
ขาดนิ้วก้อยนั้น ยามโขดกับไผ คืนดีอย่างได บ่มีนิ้วก้อย
ถ้าขาดนิ้วกลาง ก็คงเศร้าสร้อย ยาวกว่านิ้วใด แต๊ตั๊ก

ถ้าขาดนิ้วใด เศร้าใจจ้าดนัก พิการว่าอั้น บ่งาม
ถ้าเกินห้านิ้ว ผู้คนหล้นหลาม ขอผ่อสักกำ นิ้วเกิ๋นเน่อเจ้า
เป็นคนประหลาด คนแวะมาเข้า ขอหวยสักกำ พี่น้อง

มีห้านิ้วงาม บ่หื้อมาฟ้อง โชคดีแล้วเจ้า นารี
รักษาเอาไว้ บ่หื้อหมองศรี นิ้วคนเรามี เท่าอี้เน่อเจ้า เท่าอี้เน่อเจ้า..

[เครือออน]

นายคือนิ้วจี๊ เฒ่ามีนิ้วกล๋าง ญิงคือนิ้วนาง อ่อนบางนิ้วก้อย
หนึ่งหัวแม่มือ คือผู้กฎถ้อย กำหนดฮีตฮอย บ่งไว้
องค์ก๋รใดใด เหมือนมือนี้ไซร้ ใจ้เผียบกั๋นได้ องคา
สามัคคีพร้อม หลิ่งน้อมเข้าหา ช่วยกั๋นเต๊อะนา ผาสุกเตี้ยงมั่น ผาสุกเตี้ยงมั่น

[เพลงซอ]

หากแม้นวันใด ใจ๋ไก๋หนีหย้าน มือบ่สัมพันธ์ เกี่ยวเกาะ

ความสามัคคี หนีหายลัดเลาะ เพราะว่ามืออั้น คุยเต
จี้ก๋างนางก้อย ละถ้อยหันเห มีแต่รวนเร โซเซหั้นหนี้
อวดตั๋วว่าเก่ง เบ่งตั๋วอย่างอี้ ก้อยก๋างนางจี้ ประท้วง

ไผเก่งเหลือไผ นิ้วไหนก็ต๊วง มันบ่ลุ๊ล่วง เลยนา
ตัดขาดสิ้นแล้ว ยอดแก้วหัตถา ม้วยมรณา ถามหาแจ้วแจ้ว

[เครือออน]

หลายวันแต๊นอ เพลงซอน้องแก้ว บ่มีใผแซว เอิ้นตั๊ก

ด้วยว่ามีก๋าร มีงานเข้านัก จ๋ำใจ๋ต้องขัก วันคืน
ลางเตื้ออยากยั้ง แต่ตั้งใจ๋ฝืน เร่งวันเร่งคืน ขัดขืนบ่ได้
เมืองกอกก็ไป บ่ใจ้ใกล้ใกล้ ลำปางก็ไป ตามนัด

วันนี้ยังแควน แฟนบ่เร่งรัด จึงขอสวัส- ดีนา
เจริญโภคะ วรรณะงามต๋า อายุทีฆา ผาสุกเน่อเจ้า.

[เพลงซอ]

ปอนงามดีหลี ใสสีบ่เส้า ป๊อปขอฮับเอา แล้วนั้น

ขอบคุณนักหนา ปั๋นมาปี้จั้น สดจื่นเจยบาน งามดี
ขอบคุณแต๊เล้า ป้อเจ้าออนศรี ปั๋นสิ่งดีดี ไมตรีแก่ข้า
ขอหื้อผลบุญ หนุนส่งปี้ข้า อายุฑีฆา เตี่ยงเต๊า

เปียธิโรคา อย่างได้รุมเร้า หื้อตั๋วปี้เจ้า อยู่ดี
เจริญโภคะ วรรณะงามศรี ข้าวของเงินมี เต็มจองเต็มบ้าน

[เครือออน]

เหมือนฝนฮะไทร ไหลลงกิ่งก้าน มันจุ้มเจยบาน ใจ๋ล้ำ

เคราะห์ฮ้ายตังหลาย หื้อไหลดั่งน้ำ ไหลหลุดล่วงใต้ ใบปอน
แลสตินั้น ต้องมั่นบ่ถอน บ่ไหวเฟือนคลอน คำสอนพระเจ้า
หมั่นทำความดี ศีลาแบบเบ้า ก๋ายใจ๋ของเฮา งามล้วน

เคราะห์ฮ้ายใดใด ตังหลายทั่วท้วน ก็จักบุ่นบ้วน ออกไป
อันเคราะห์ดีนั้น จักพลันมาก๋าย ตึงโชคและชัย จักไหลถั่งข้อน.

[เพลงซอ]

หื้อฟังน้ำเสียง สำเนียงกำอ้อน เคราะห์ฮ้ายสะออน ซอนต๊บ

หื้อหลบหลีกหาย อย่าได้พานพบ ขอหื้อหลีกหลบ หนีไป
ณ เวลานี้ เป่งแจ้งสีใส ผ่อไปตางใด ไร้หมอกเมฆฝ้า
9 กันยายน มงคลเด่นกล้า ไปตั๊วพารา วันนี้

วันดีสำคัญ ต๋ามกำต่านจี้ ได้ทำพิธี ปู่จา
เป็นมังกะละ เผื่อเเผ่เมตต๋า ตั๊วแคว้นพารา ทำกั๋นทั่วบ้าน

[เครือออน]

ที่ อบต. ออนกล๋างว่าอั้น แม่ออนมีงาน เลี้ยงพระ

นิมนต์พระสงฆ์ เก้าองค์สังฆะ เจริญพระพุท- ธมนต์
ฟังเทศน์กัณฑะ มหากุศล สามัคคีชน ร่วมสนร่วมสร้าง
เลี้ยงเพลพระสงฆ์ เก้าองค์ต๋ามอ้าง เสร็จแล้วส่งตาง สังฆะ

อุทิศกุศล แด่ต๋นราชะ ขัติยะเจ้า ภูมิพล
ขอจงทรงพระ เจริญทุกหน ที่เปิ้งปวงชน คนไทยทั่วหน้า.

[หรรษา]

ศุภดิถี ฤกษ์ดีแหล่งหล้า มหาราจา ป่อไท้

ตี่ห้าธันวา ราจาเทิดไว้ ป่อหลวงตี่ไหว้ ปวงชน
ขอเหล่าไทยนี้ อย่าลี้หายหน กุผู้กุคน กุศลทำได้
เปื่อน้อมถวาย ในหลวงตี่ไหว้ จ๋อมภูวนัย ราชต๊าว

หื้อทรงเกษม ปรีเปรมยศย้าว เป๋นโพธิ์ห่มด้าว แดนไทย
อย่าลืมปี่น้อง เปื่อนป๊องขะใจ๋ ทำความดีไป ถวายป่อเจ้า.

[เครือออน]

ห้าธันวาคม บรมผ่านเผ้า เหนือหัวของเฮา ราจ๊ะ

เวียนมาฮอดเถิง มาเติงกาละ พระชันษาเจ้า ราจา
แปดสิบปี๋นั้น ปล๋ายสองพรรษา พระชนม์ยืนมา ทีฆายุหมั้น
ขอพระพุทธา ธัมมาแปล๋งปั้น สังฆะดลพลัน เต๊จ๊ะ

หื้อองค์ราชัน สุขสันต์ก๋ายะ พระหทัยเจ้า เปรมปรีดิ์
เป๋นมิ่งขวัญพระ ประชาสุขศรี เพราะบารมี ขัตติยาเจ้า.

[หรรษา]

ขออนุญาต ลองแต่งเป๋นกำซอพ่องเน้อเครับ

***ทำนองล่องน่าน***

ยกมือสิบนิ้ว ต่างกิ๊วเกศา
ก้มกราบวันตา มหาราชเจ้า
องค์ภูมิพล เทิดทูลล้นเกล้า
หมู่ข้าพเจ้า ขอสดุดี
ทวยราษฎร์ตั่วแคว้น ต่างแสนสุขขี
ด้วยป๋ารมี ภูมีปกป้อง
เป๋นร่มโพธิ์ทอง ของไทยแน่แต๊

ยามราษฎร์โศกตุ๊กข์ พระปลุกปลอบขวัญ
ปัญหาร้อยปัน พระทรงจ่วยแก้
เสด็จเยี่ยมเยือน ถึงเฮือนถึงแคร่
บุญพระปกแผ่ แก่ทุกชุมชน
ติดต๋ามสุขตุ๊กข์ ราษฎร์ทุกแห่งหน
ทรงห่วงทุกคน เหมือนลูกใสไส้
ฮ้อนเหลือเหงื่อไหล บ่ได้หยุดยั้ง

แผ่นดินไหนแล้ง ประทานฝนหลวง
เอาสุขทั้งปวง ราษฎร์เป๋นตี่ตั้ง
ราษฎร์ประสบภัย ในแต่ละครั้ง
จะทรงรับสั่ง จ่วยเหลือทันที
แนะแนวตางไว้ หื้อไทยสุขขี
ล้วนเกิดผลดี บ่มีสุดเสี้ยง
เศรษฐกิจพอเพียง ปอกิ๋นปอใจ๊

พระทรงรอบรู้ เรื่องนาเรื่องสวน
พืชไหนสมควร ปลูกตางเหนือใต้
ทรงได้ทดลอง เพาะพันธุ์พืชไว้
แล้วนำแจกจ่าย แก่จาวไฮ่นา
พระทัยป่อนั้น เปี่ยมพระเมตต๋า
พระกรุณา- ธิคุณล้นเกล้า
เป๋นบุญไทยเฮา หกสิบกว่าล้าน

ทั่วโลกแซ่ซ้อง ป่อของสยาม
พระทรงงดงาม เลิศล้ำเสี้ยงถ้าน
ทรงพระปรีชา สามารถรอบด้าน
ปกครองเมืองบ้าน ร่มเย็นสืบมา
เนื่องในวาระ พระชนม์พรรษา
เวียนบรรจบมา ห้าธันวาหนี้
ขอพระภูมี อยู่ดีค่ำเจ๊า

ขอพระไตรรัตน์ ปกปักฮักษา
สยามเตวา- ธิราชนอเจ้า
ทั้งพระเสื้อเมือง ทรงเมืองผ่อเฝ้า
คุ้มครองจ๋อมเหง้า หื้ออยู่สำราญ
แคล้วคล้าดจากตุ๊กข์ สุขเกษมศานต์
พระชนม์ยืนนาน ร้อยพรรษาเจ้า
ปอนจากไทยเฮา ถวายเทิดไท้....

[เครือออน]

หรรษาเพิ่นขอ แต่งซอฮอมไหว้ เทิดไท้ราชัน องค์พระ

เสนาะยิ่งหนอ ขอคารวะ อรรถะรสถ้อย ร้อยเรียง
คงดียิ่งไซร้ หากได้ยินเสียง ได้ฟังสำเนียง เสียงซอจากเจ้า
ขอน้อมถวาย แด่ไท้เหนือเกล้า แทนหมู่ผองเฮา เหล่าล้วน

เทิดด้วยจิตใจ๋ คนไทยทั่วท้วน น้อมเกล้าทั่วถ้วน ปฐพี
ขอหื้อองค์พระ สุขเกษมศรี พระบารมี อิทธีแผ่กว้าง.

[เพลงซอ]

โหหรรษมาเป็นเพลงซอดาดน่านเลย เพลงซอขอเอาเพลงเงี้ยวมาหื้ออ่านพ่องคับ

สิบนิ้วขอกราบทูลศรี ขอยออัญชุลีพระภูมีบาทต๊าว
ถวายบังคมพระบรมป้อเจ้า ทวยไทยทุกเหล่าเฝ้าสาตุก๋าร
เป็นพระปารมีปกเกศ คนไทยทั่วประเทศเขตมัฆวาร
ใต้ร่มโพธิสมภาร ของพระภูบาลองค์สมเด็จป่อ
บุญญาป๋าละป้อพระปิต๋า ปกครองอาณาด้วยธัมมาหลายข้อ
ลำบากเปียงใดป้อบ่เกยท้อ บ่าย่นย่อต่อความตุ๊กยาก
ราชา เปรียบป้อเหมือนพญาอินตา เหล่าจาวปาราต่างสาน้อมกราบ

มหาราชาตีฆายุโก ขอตั้งนะโมโยโสป้อต๊าว
พระราชกิจจาปิดาป้อเจ้า มหาราชต๊าวพ่อเจ้ามีหลาย
ปกครองบุรีจื่นจ้อย ข้าราชใหญ่น้อยพลอยอยู่สุขสบาย
นายท่านนาย เพราะน้ำพระทัยไพศาลกว้างใหญ่
พระองค์ครองราชย์ได้หกสิบกว่าปี๋ เหล่าประชาชีกลางเหนืออิสานใต้
ทรงพระดำเนินเดินพระบาทย้าย กลางเหนือใต้อิสานไปทั่ว
ดินแดน ทั่วถิ่นประเทศไทยแลนด์ ทิศาแว่นแคว้นป้อเอาใจ๋ใส่

ข้าแด่องค์พระบิดา ทรงโผดเมตต๋าประชาปี้น้อง
พระองค์ทรงจัดตางความขุ่นข้อง น้ำท่วมน้ำนองป้อได้จ่วยเหลือ
ดำริแป๋งฝายเขื่อนแก่ง ตี่ไหนแล้งแห้งป้อก็ได้จุนเจือ
ทรงเป็นพุ่มไม้ใบเครือ หื้อความจ่วยเหลือสกุณาบ้านป่า
ทฤษฏีเศรษฐกิจพอเพียง เพื่อเป็นเสบียงต่อวันไปหน้า
อยู่อย่างเพียงพออย่ารอบนฟ้า ใจ๊สติผะญ๋าปัญญาตั๋วเก่า
ปู๋ตาง ป้อทรงได้เผ้วถากถาง เป็นแสงนำตางเรืองงามสว่าง

ด้านการเกษตรมีเขตแดนแผนผัง ตี่ดินทุกตารางพ่อวางผังไว้
แบ่งสัดแบ่งส่วนสงวนไว้ใจ๊ ตี่สวนนาไร่ได้ผสานผสม
ตามแผนทฤษฎีปฏิบัติ พระราชดำรัสบ่ขัดต่อสังคม
ในยุคบริโภคนิยม อย่าหลงงายงมต่อกระแสบริโภค
ในป่าในดงป้อดั้นด้นหา เพื่อปวงประชานำเมตต๋าไปโผด
หื้อสยามเมืองไทยได้ความรุ่งโรจน์ สร้างประโยชน์อนันต์ยิ่งใหญ่
นำมา ความร่มเย็นแผ่กว้างอาณา ถึงจาวไฮ่จาวนาจาวดอยจาวป่า

บรมเอกจักรินทร์ครองแผ่นดินสยาม ทั่วทุกถิ่นคามสยามเมืองยิ้ม
ขจัดปัญหาบ่มาต๋ำถิ้ม(ทิ่ม) พระป้อทรงยิ้มอยู่สม่ำเสมอ
แม้ยามพระเสโทไหลหลั่ง ป้อก็ยังไปตี่หมายนัดเจอ
เนอท่านนา ป่าเขาธาราป้อบ่เกยหวั่น
ทรงได้ก้ำจุนหนุนศาสนา พุทธคริสต์อิสลามป๋างอั้น
ป๋าระมีของภูมิป้อจั๋น บ่าเกยลดขั้นลำดับลงต๋ำ
แต๊นา ทรงเป็นห่วงครูบาอาจารย์ ข้าราชการตะหารตำรวจ


ปกครองทวยราชย์โดยอำนาจทานศิล เป็นพระเจ้าแผ่นดินหนึ่งเดียวโลกนี้
ทศพิธราชธรรมนำมาก่อนกี้ สิบประการนี้นำมาสู่สยาม
พระองค์ทรงนำมาเกื้อก่อ ทรงเป็นป้อฟ้าอยู่ในราชธรรม
ทรงมีพระทัยดีงดงาม บำเพ็ญศีลธรรมบ่ได้หยุดหย่อน
ข้อหนึ่งต๋านะศีละข้อสอง บริจาคแน่นอนบ่นักหน่วงข้อน
อาชชวะมัททวะมีความโอนอ่อน ตะบะมีพร้อมอวิหิงสาข้อแปด
พร้อมมา ขันติ อะวิโรธะนา เป็นพระบุญญาขององค์เจ้าป้อ

ยืนโยงอยู่ยั้งตั้งในรัฐฐา มิ่งขวัญประชาอาณาเตดต๊อง
ปวงประชาปากั๋นแซ่ซ้อง ตั่วโขงเขตห้องสุขบานเกษมศรี
ป๋ากั๋นแห่ก๋องแห่ก๊อง เสียงดังสนั่นก้องของวงมโหรี
เหล่าข้าราชต่างปลื้มยินดี 80 ปีพระชนม์มาไคว่
วันที่ 5 ธันวามหาราช รัฐบาลประกาศหื้อปี้น้องเหนือใต้
ติดธงทิวปิ๋วอยู่บนป๋ายไม้ โบกพัดโสวไปทั่วประเทศ
รุ่งเรือง ประชาชนคนพลเมือง นุ่งห่มเสื้อเหลืองเรื่อเรืองใสส่อง

พสกนิกรทั่วฟ้าเมืองไทย ขอน้อมถวายพระพรป้อต๊าว
พระชนม์ชันษาแปดสิบย่างเข้า ขอองค์ป้อเจ้าทรงสุขเกษมสันต์
ด้วยเดชแห่งองค์ราจะ ทรงมีวรรณะพละยืนนาน
นาน ยืนยง ขอทรงพระเจริญไปโยชน์ยิ่ง
ฑีฆายุโกโหตุราชา โรคร้ายนานาอย่ามาเกลือกกลิ้ง
สะปะโรคาภัยยาทุกสิ่ง ขอหื้อละทิ้งได้วิ่งหนีจาก
บิดา หื้อป้อเจ้าอยู่ดีสุขขา เปี๋ยธิโรคา อย่าได้บังเกิด

จ่างซอศิลปินล้านนา ขอนพมือสาวันตากราบน้อม
ธูปเทียนบุปผามาลาดอกซ้อม ใส่ขันแต่งต้อมยกขึ้นเหนือเกศา
บุญกุศลโปรดได้คุ้มครอง ใต้ฝ่าละอองธุลีพระบาทา
นาท่านนา ขออาราธนาคุณพระศรีปกห่ม
ม่อนข้าขอน้อมจิตใจ๋ ขอถวายพรจัยบังคมกราบก้ม
พลังเดชะจัยยะเย็นฮ่ม เหมือนกับสายลมเจยจมอากาศ
จื่นบาน ขอพระองค์ทรงเกษมสำราญ ทรงเป็นมิ่งขวัญทวยไทยทั้งชาติ


จตุรพิตรพรสี่ประการ ทรงอภิบาลแด่องค์ป้อฟ้า
ตีฆายุโกโหตุเจ้าหล้า องค์ป้อฟ้าของจาวสยาม
เป็นมิ่งขวัญชาวไทยทั่วแคว้น ศูนย์รวมใจเหนียวแน่นทั่วทุกถิ่นคาม
ตามท่านตาม สาตุ๊งามงามร่วมเฉลิมพระเกียรติ
ศิลปินนักค่าวจ่างซอ ใจ๊สมองอ่องอออย่างละไมละเมียด
ถึงแม้บางคำมันบ่ปอละเอียด ขออย่าได้ซีเรียสเกี๊ยดกั๋นตึงหมู่
เนอนาย ข้อความทั่งหมดอรรถรสจากใจ๋ ออกจากปายในฮ่วมเฉลิมพระเกียรติ.. วางเพลง

[หรรษา]

ขอต่อจากอ้ายเพลงซอเน้อ


มายินเสียงสาน ของอ้ายเพลงซอ หรรษาบ่รอ ขอซอแถมครั้ง
ในจิตในใจ๋กลั๋วได้สลั้ง กลั๋วมันพลาดพลั้ง เพราะเฮาซอบ่เป๋น
วันนี้ลองฝึก กับอ้ายเพลงซอ ก๋ารจ๊อยก๋ารซอ ก็ตึงยากเย็น
หนอ..เจ้าป่อนา บ่าวน้อยหรรษา หัดจ๋าซอใหม่
เรื่องของก๋ารซอ นี้บ่ปอเกร๋ง บ่เหมือนฮ้องเพลง เนอเจ้าตี่ไหว้
หรรษาหัดซอ เปื่อรอฮับใจ๊.. วันหน้าเผื่อได้ เป๋นจ่างซอมือใหม่
จายราม วันนี้ม่อนน้อย อ่อนด้อยขอต๋าม เผื่อมันจะลาม เป๋นจ่างซอกับเปิ่น

สำเนียงเสียงขาน โบราณแต๊หนา เพราะอยู่บ้านนา หรรษาบ่าวเคิ้น
ได้ยินเสียงไข ซอใยกล่าวเอิ้น หรรษาบ่าวเคิ้น ก็เลยขะใจ๋
อ้ายป๊อบเพลงซอ มารอซอไว้ หรรษาน้อมไหว้ ขอเป๋นศิษย์ซอใย
หนา..เจ้าป่อใน เสียงบ่ปอใส หัดซอไปมือใหม่
ใคร่เป๋นจ่างซอ ลูกคอ บ่ไหล จะเยี๊ยะจะใด หนอเจ้าตี่ไหว้
สอนผมพ่องครับ คำันับฮับใจ๊ อ้ายป๊อบนั้นไซ้ ไวไวเร็วรีบ
วอนวาน เพราะข้าม่อนน้อย ใคร่ต่อถ้อยสืบสาน จ๊อยซอโบราณ หื้อเจริญเรืองรุ่ง

มาหันใส่ซอ กล่าวยอในหลวง จาวไทยทั้งปวง บวงสรวงป่อไท้
กตัญญุต๋า ปากั๋นน้อมไหว้ เทอดพระบาทไท้ น้อมไหว้สาสาน
ถวายพระพร หื้อพระองค์ท่านไท้ จาวไทยนี้ไซ้ ขอกราบไหว้วอนวาน
ขอพระองค์ ทรงเกษมสำราญ ปกครองลูกหลาน ยาวนานตลอด
ตี่ห้าธันวา จะเวียนมาเถิง ขอหื้อร่ำเปิง พระคุณป่อเจ้า
บรรดาผองไทย ขะใจ๋แต๊เล๊า ทำดีน้อมเกล้า ถวายองค์ท่าน
ภูมี วันตี่ห้านี้ เป๋นวันสะหลี หื้อกะตะเวที ทำดีน้อมกราบ..... (วางเพลง)

[เพลงซอ]

หันน้องหรรษา มาจ๋ากำซอ เปิงใจ๋แต๊นอ เพลงซอปี้ไท้
ซอเก่งแต๊หนอ รูปหล่อน้องอ้าย ระบำเพลงได้ ละมัยเสมือน
หาว่าตั๋วน้องลองซอบ่จ่าง น้องมากล่าวอ้าง หยั่งมาบิดเบือน
เสียงซอดังสะนั่นสะเทือน หากซอบนเฮือน ท่าจะเฟือนถล่ม
ไค่ได้ยินเสียง สำเนียงเพลงซอ ท่าจะหวานแต๊นอ ปอหอมซอนโอ้ม
น้องเหย อย่าเลยเลิกล้ม นี่เป็นคำชม คารมคำปาก
ฝากไป หรรษาอย่าได้เลยไป ซอล้านนาไทยยังต้องการอยู่

[หรรษา]

อ้ายป๊อบเพลงซอ มายอหรรษา ใจ๋ผมนั้นกา ปอลอยถึงฟ้า
วันนี้เข้ามา หัวใจ๋คลี่อ้า มาชมตั๋วข้า เป๋นนักเป๋นหลาย
จะขอขอบคุณ อ้ายป๊อบจ้าดนัก ตี่ชมน้องฮัก จ๋นสำลักคำจาย
ตั๋วน้อง..นั้นปอดีอาย เพราะตั๋วอ้ายนาย ชมแต๊ชมว่า
หรรษาบ่าวน้อย ย้อนด้อยผญ๋า กลั๋วเปิ่นนินตา กล่าวจ๋าปากอ้า
ว่าหยั๋งมาสลิด เหียแต๊เหียว่า กำฮู้บ่กล้า สลิดซอกับเปิ่น
นินตา จะขออภัย และก็ขอสูมา หากมันผิดกำจ๋า ขอสูมายกโตษ.

[เพลงซอ]

กำซอไหลลื่นคนอื่นก็หัน กำซอษาหรร ทศรรห์ก็ฮู้
น้องได้มาจ๋าถลามาอู้ เป็นเพราะไฝ่ฮู้เชิดชูค่าวสาย
บ่ผิดฉันทลักษณ์กำซอ ถูกใจ๋แต๊นอบ่าวจาวเจียงอาย
นายเจ้าแม่นาย บ่าวจาวเจียงอายลวดลายเปิ้นเก่ง
เหมือนอ้ายถูกหวยรวยเงินจากแชร์ ต่างคนต่างแนแลกั๋นสองเด้ง
ค่าวซอรอเวลาบานเบ่ง หรรษาน้องเก่ง เอ็งมันยอดเยี่ยม
กำลม น้องเอาวาทะเข้ามาผสม มาโต้คารมอ้ายชมว่าเก่ง

[หรรษา]

สาธุแต๊ๆ ตี่มาแก้กำจ๋า จ๋นน้องหรรษา ปออายปี่น้อง
ยามเมื่อแดดแฮง ยังเปิ่งบุญจ้อง จ่องใจ๊ของข้อง ยังเอาไว้ใส่ปล๋า
ยามเมื่อเฮาหนาว ก็ยังเปิ่งบุญผ้า หรรษาน้องหล้า ใจ๊หยั๋งบ่ได้นา
นาเจ้าแม่นา มอกไปวัดไปวา บ่าดายอ้ายปี้
มาชมหรรษา จ๋นหน้าแดงเขิน อย่างอี้เมินๆ ท่าจะอายว่าอั้น
วันนี้หัดซอ มอกก่ำปอแต๊นั้น ซอถ้องปี้จั๊น หื้อมันหายง่อม
หายงัน เปื่อหื้อคึกคัก สนุกสุขสันต์ บ่ใจ่ต๊าพนัน แข่งขันอ้ายปี้.

[เพลงซอ]

ฝึกใจ๊ความคิดพินิจปัญหา จากคลังปัญญาผะญ๋าของน้อง
เปิ้นว่าป๋ายังบ่ต๋ายขำข้อง อ้ายกับน้องได้มาถ้องจ๋ากั๋น
เพื่อความสนานสนุก หื้อมีความสุขไปทุกคืนวัน
จ๊อยซอเป็นของเก่าโบราณ จ่วยกั๋นสืบสานหื้อยาวนานไปต่อ
หรรษาบ่ต้องเขินต้องอาย ซอตามสบายอย่าไปแปป้อ
มีความตั้งใจ๋อย่าได้แท้ท้อ จ่วยกันถักทอ นอนายน้องปี้
ม่วนงัน รายการนี้บ่มีการพนัน เฮามาซออุ่มงันได้ตึงมันส์ตึงม่วน

[หรรษา]

ขะลึกตึ๊กตั้ก คึกคักแล้วหนอ จะลองเป๋นจ่างซอ แล้วหนอปี้น้อง
ในจิตในใจ๋ ก็อาลัยใฝ่ข้อง ได้ยินอ้ายฮ้อง หื้อตั๋วน้องมาจ๋า
มีตึงทำนองซอจ๊อย ตั๋วข้าม่อนน้อย ขอกล่าวถ้อยสักครา
หนา..ก็เจ้าแม่นา ขออย่าได้ตุมลา ล้านนาของเก่า
เรื่องจ๊อยเรื่องซอ นี่มีมาเมิน สนุกสุขเสิน อย่าเขินเนอเจ้า
ผมจะจ่วยฟื้นฟู นี่ก็ยังเจ๊าเจ๊า หื้อมันเตี่ยงเต๊า กับเพลงซออ้ายปี้
เพลงฮำ.. วันนี้หมู่เฮา อย่าได้บิ่นหลังต๋ำ ซอหลายระบำ ตึงเพลงเงี้ยวพม่า.

[เพลงซอ]

ตึงไค่ปลูกสลิดไปติดต้นสลัก หมายจะจวนน้องฮักมาตั๊กกั๋นยามเจ๊า
หลังจากที่กิ๋นป๋ากิ๋นข้าว จะจวนกู้เฝ้ามาเมาตวยกั๋น
เพลงซอมีหลายระบำ ขอหื้อติดต๋ามเพื่อความม่วนงัน
วันแม่วัน ใจ๋จุ่มเจยบานวงศ์วานน้องปี้
ล่องน่านพระลอเพลงซอเจียงใหม่ จะปุละม้ายใส่กั๋นเต็มตี่
พม่าเพลงอื่อสื่อกับจ่างปี่ จุมสามจุมสี่ได้ตึงดีตึงม่วน
แต๊นา กันว่านายน้องหรรษา เข้ามาอู้มาจ๋าอ้ายว่าตึงม่วน

[หรรษา]

สนุกม่วนล้ำ เตื่อมก๊ำเรื่องซอ มอกหื้อก่ำปอ จ๊อยซอร่ำร้อง
ป๊ะเรื่องถูกใจ๋ ซอใยร่ำถ้อง เพราะใจ๋ใฝ่ข้อง ป๋องสิเนหา
อู้เรื่องเพลงซอ นี่มีหลายระบำ พม่าเพลงฮำ ลำนำล้านนา
หนาเจ้าแม่นา จะปุ๊นั้นนา เพลงเงี้ยวล่องน่าน
มีตึงละหม้าย ปั่นฝ้ายพระลอ ทำนองเพลงซอ มีหลายเสี้ยงถ้าน
มันตึงม่วนเหลือ เมืองเหนือสะต๊าน ปี้น้องจาวบ้าน เปิ้น..ก็ตึงอวด
ซอฮำ วันนี้ปี้น้องอย่าฟั่งบิ่นหลังต๋ำ จะขอก๋ายระบำ เป๋นเพลงฮำพม่า เลย..เพลง..


ขอเปลี่ยนระบำ เป๋นเพลงฮำพม่า ลองผ่อสักครา บ่หล้างเป๋นใด
บ่ใจ่แข้งไข ซอใยอวดอู้ เพราะผมใคร่ฮู้ ทำนองอื่นนานา

ขอหมู่อาวอา และทศรรห์อ้ายเจ้า อย่าถือสานั้นเล๊า น้องเหน้าก๋ายเพลง
บ่ใจ่กล้าเกร๋ง เรื่องเพลงซอถ้อย หรรษาม่อนน้อย ยังอ่อนด้อยวิชา

ทำนองนี้นา ก็สุขขาอ่อนอ้วน กำเมืองล้วนๆ ของเก่าล้านนา
วันนี้นั้นนา หรรษาจะถ้อง จะมาร่ำร้อง กับอ้ายป๊อบเพลงซอ

เอ๊ะวันนี้นั้นนอ ปอบ่หันป้อเจ้า เครือออนนั้นเล๊า ไปอยู่ตางใด
หรือว่าก๋ารหลาย บ่มายายแต่งส้อม หรือยังบ่พร้อม มาล้อมตั้งวง

หรือว่าจรรโลง ใจ๋จงม่วนสู้ กับก๋ารเป๋นครู สอนศิษย์โฮงเฮียน
สอนเด็กอ่านเขียน กระตำเปียรค่าวสร้อย ปอบ่มากอย เอ็นจอยเฮฮา.

[เพลงซอ]

เครือออนป้อจ๋า มาหาลูกเต๊า ป้อไปไหนเล้า บ่เข้ามาเยือน
ยังห้องหอเฮือน เหมือนป้อบ่สู้ ป้อไปขุดคู้ ไปอยู่ตางใด

ฤาบ่สบาย กาจายป้อข้า เป็นสังใดจา บ่มาหยื้อกอย
บ่มาเอ็นจอย พลอยหื้อห่วงหา กั๋วป้อตุมลา บ่มาค่าวซอ

หรรษานั้นหน่อ ขอเพลงพม่า บ่มีปัญหา ว่าได้ต๋ามใจ๋
ซอระบำใด ต๋ามใจ๋น้องเหน้า เพลงซอปี้เก๊า ล่นเข้าโตยไป

จะไปเจียงฮาย ต้องก๋ายเวียงป่าเป้า เปี๋ยเอาโถงห่อเข้า เอาไปกิ๋นเจียงฮาย
ต๋าวันปอขวาย กินข้าวงายตี่เวียงป่าเป้า กิ๋นข้าวงายแล้วเล้า ปากั๋นเข้าไปสู่เจียงฮาย ..

ไปเจ้าปี้ไป ไปเกี่ยวหญ้าไซหญ้าปล้อง สองคนปี้น้อง เกี่ยวหญ้าปล้องหญ้าไซ
ไปเจ้าปี้ไป ไปเกี่ยวหญ้าไซหญ้าปล้อง สองคนปี้น้อง เกี่ยวหญ้าปล้องหญ้าไซ

อะโหลโลโล ลุงโตเป็นผัวป้าป้อ สังมางามแต๊น่อ ป้าป้อเป็นเมียลุงโต
อะโหลโลโล ลุงโตเป็นผัวป้าป้อ สังมางามแต๊น่อ ป้าป้อเป็นเมียลุงโต

[หรรษา]

ปากั๋นมาโชว์ กำโวซอถ้อง ปากั๋นร่ำร้อง ซอถ้องกำโว
ปากั๋นมาโชว์ กำโวซอถ้อง ปากั๋นร่ำร้อง ซอถ้องกำโว.

แสนจะสุโข มะโนใจ๋ข้า เจยบานคลี่อ้า ดั่งดอกไม้บาน
เริงร่าเบิกบาน สำราญเจ้ยจ้อย ม่วนหลายบ่น้อย กำถ้อยเพลงซอ

ซอวนนั้นนอ มีีหลายมากถ้วน กำเมืองล้วนๆ ปาม่วนเฮฮา
ลำนำล้านนา สุขขานอเจ้า ม่วนงันสันเล๊า หมู่เฮาคนเมือง

อู้ได้ไปเปลื๋อง เรื่อเรืองเจิดจ้า ดั่งแสงบนฟ้า อาติ๊ดเรืองนอง
ระยับสีทอง เรืองรองส่องหล้า แผ่อนุภา โลกหล้าเมืองคน.