นิ้วตังห้าถลาเถิงเมือง

[ล้อเลื่อน]

คนเมืองเจียงตุ๋ง มีก้าลุงป้า หรรษาน้องยา เอิ้นตั๊ก

สาวหน้อยสาวจี๋ ก็คงมีนัก หรรษาบ่กล้า หยอกเอิน
เวียกก๋ารมันล้น ป้อคนอายเขิน หวังเอาแต่เงิน บ่เอิ้นสาวหล้า
หรรษาบ่าวจี๋ วลีเก่งกล้า บ่ธรรมดา เยื่องนี้

เดินทางไปไกล๋ หลายไมล์หลายลี้ เจื้อใจ๋ป้อนี้ ได้กา
มายเฮืองเมืองฮาย อ้ายยังกังขา ซ่อนภรรยา กี่คนตี้หั้น

[เครือออน]

เอาอี้แล้วกั๋น ขอหรรษ์เจ้าดั้น ไปแม่สายพลัน หล่ายปู๊น

ไปถามหื้อกำ กับคนคุ้นคุ้น หื้อหมดจุ้นอุ้น ไปเลย
ไค่ฮู้ยิ่งล้ำ ช่วยกำเต๊อะเหย ไปเดี๋ยวนี้เลย เวยเวยหลานเหน้า
แม่จันแม่สาย บ่ไกล๋น่อเจ้า หรือว่าถามเอา หมู่นี้

ใกล้บ้านหรรษา เมธาบอกจี๊ เหล่าคนอยู่หนี้ มาเมิน
จักฮ้องหม่องน้อง ก็ข้องขัดเขิน จักฮ้องแหม่งเอิน ก็เขินขัดข้อง.

[หรรษา]

คนมีผย๋า ผ่าไม้โล่งป้อง สิ่งไหนบ่ลอง บ่ฮู้

วันนี้อิ๊ดใจ๋ มาอ่านกระทู้ สมองก็อู้ ทันที
ป้อหนานเฮานั้น บีบกั๊นดีหลี ปุจฉาเปิ่นมี มาจีใจ้ใจ้
ซ้ำว่าแม่สาย นั้นอยู่ใกล้ๆ หื้อผมข้ามไป หล่ายปุ๊น

ว่าไปหื้อถาม สาวงามหื้อลุ้น เรียกกั๋นว่าหั้น ใดจา
ไว้โอกาสพร้อม จักน้อมเข้าหา เอาคำตอบมา อู้จ๋าหื้อได้.

[เครือออน]

หากหลานหรรษา ค้นหาไจ้ไจ้ ต้องได้สักวัน ชื่อฮ้อง

ผิวนวลเหลืองขาว สาวพม่าน้อง มันจับต๋าต้อง เครือออน
ม่อนเมาสาวนุช หลงสุดจักถอน หลงฮูปงามงอน จ๋นนอนฝันอ้าง
จักเยียะจาใด ถึงได้แนบข้าง พม่านวลนาง แอบชิด

หนตางตีบตั๋น มันได้ก้าคิด ชีวิตล่วงเข้า เถ้าจาย
ได้ก้าฝันค้าง ความหวังเหือดหาย ชาตินี้ปล่อยไป ชาติใหม่ค่อยอู้.

[ล้อเลื่อน]

สังขารเลยวัย แต่ใจ๋ยังสู้ ชาติหน้าก็ดู เมินล้ำ

จะอู้ไปแฮง กลั๋วน้องแหม่งช้ำ ถลำฮักเฒ่า เมืองไทย
จ๋ำใจ๋ต้องหยั้ง มานั่งทำใจ๋ ชาตินี้ปล่อยไป รอไว้ชาติหน้า
ยังมีต๋าเขียว คนเดียวคือป้า เลยบ่กล้าไป เอิ้นตั๊ก

ขอกำเต๊อะนา หรรษาหลานรัก หาน้องแหม่งแอ้ม แนมคิง
น้ำเพิ้งน้ำหมิ้น ขมิ้นป๋นขิง เขาว่าเป๋นญิง หนึ่งในโลกหล้า

[เครือออน]

สาวพม่าผิว ไร้สิวไร้ผ้า เล่าลือกั๋นมา เมินแล้ว

ชาตินี้แล้วไป ชาติใหม่บ่แคล้ว ใฝ่หาน้องแก้ว ผาถนา
ทำบุญเอาไว้ ไจ้ไจ้เต๊อะหนา บุญมีกั๋มมา หล้างว่าสมอ้าง
ได้พม่าสาว เอามาแนบข้าง เจียงฮายลำปาง ข้อยล้ำ

ล้อเลื่อนหรรษา อย่าทำหน้าง้ำ ไค่ได้ก็ป้ำ เป็งบุญ
อู้เถิงชาตินี้ ยังมีสิทธิ์หนุน ลุ้นหื้อน้องยา หรรษาแต่งหมั้น.

[เพลงซอ]

ไปเต๊อะหรรษา อู้จ๋าตามขั้น บุญจักบันดาล ส่งน้อง

ข้ามน้ำฝั่งสาย สาวหลายเกี่ยวก๊อง ตั๋วโขงเขตห้อง เลือกเมา
สูงเพียวเรียวฟุ้ง ฮ่างสูงหุ่นขาว อวบอ้วนบางเบา เลือกเอาสาวน้อย
หุ่นต่ำล่ำหนา น้องอย่าเศร้าสร้อย กาสีดำมอย ก็นัก

เลือกได้หลายคน บันดลจ่องจั๊ก มาหื้ออ้ายฮัก สักคน
เครือออนอี่ป้อ เลื่อนล้อก็สน ขออย่างซนซน สักคนจ่างได้

[เครือออน]

ขอหลานหรรษา หมั่นหาไจ้ไจ้ เป่อเลอะเนอจาย สาวเงี้ยว

กล๋อนมันปาไป บ่ได้ลดเลี้ยว สาวเงี้ยวพม่า สาวมอญ
สังกาแต๊นั้น หากผันอักษร สาวเงี้ยวสาวมอญ สาวพม่าหั้น
เป๋นอันเดียวกั๋น ก่อหาว่าอั้น หรือคนละพันธุ์ เผ่าเจื๊อ

สามสาวครือกั๋น ผิวพรรณผ่องเนื้อ แต่งก๋ายใส่เสื้อ งามดี
ตึงงามแต๊แต๊ เมื่อแลผิวสี บ่าตันดิบดี สีตุ๊เจ้าไห้.

[หรรษา]

โดนกำยุหนุน เป๋นทุนไจ้ไจ้ หื้อหาสาวไตย สาวเงี้ยว

ถ้าเปิ่นมีขาย จะซื้อมาเกี๊ยว กอดหวันหยอกเกี้ยว พารา
แต่นี้คนนะ เรื่องยากแต๊หนา บ่ใจ่ภูญจา อาหารคาบข้าว
ต๋ามก๋รรมปาไป เต๊อะนายเขาเจ้า หากบุญบ่เบา จ้าดแล้ว

คงได้กู่สม บ่กลากล้าดแล้ว ถึงแม้วัยแผ้ว ชรา
เถ้าจ่างมันเต๊อะ บุญก๋รรมหรรษา ศรีภรรยา ต๋ามบุญจ่องห้อย.

[เครือออน]

ยินคำหรรษา มาจ๋าเอ่ยถ้อย ใจ๋หน้อยกับวัย ชีวิต

ใจ๋มั่นใจ๋ถึง มันตึงสัมฤทธิ์ ชีวิตเลือกได้ เนอเฮา
พรหมลิขิตไว้ อย่าได้ถือเหมา มันอยู่ที่เฮา แบ่งเบาแปล๋งปั้น
ทำชั่วได้ดี มีที่ไหนหั้น ทำบุญตึงวัน เต๊อะครับ

ทำดีได้ดี จักมีสินทรัพย์ นับหนุนเนื่องด้วย วิชชา
ชีวิตเฮานี้ ห่อนมีปั๋ญหา หากใจ๊ปั๋ญญา มัคคาเลือกได้.

[หรรษา]

บุญเหยบุญยัง ป๊ะปั๋งอยู่ใกล้ ปล่อยหื้อเป๋นไป เต๊อะครับ

ต๋ามวาสนา นำปาเป๋นทัพ สำหรับเรื่องหั้น คู่ครอง
เรื่องปัญหานั้น ต้องใจ๊สมอง ตริตรองใฝ่ปอง ดั่งป้อหนานอู้
ปัญญาเลือกสรร เร็วพลันหลิ่งหลู้ พิจรณาดู แน่ชัด

จะบ่อับจ๋น บ่อัตคัด เลือดคัดกั๋นได้ คนเฮา
สิ่งไหนต่ำจ๊า บ่มาขัดเกล๋า หื้อเลือกเฟ้นเอา สิ่งดีปายหน้า.

[เครือออน]

อู้เรื่องคู่ครอง ต้องมีใจ๋กล้า แถมหนึ่งปั๋ญญา ได้กึ๊ด

อันเรื่องอิตถี มีหลายทึดทึด แต่กึ๊ดนักหน้อย เนอจาย
แม่ของลูกนั้น สำคัญเหลือหลาย ค่ำเจ๊าแลงงาย ทำได้แม่บ้าน
หอเฮือนเคหะ สะอาดสะอ้าน พี่น้องวงศ์วาน ซอบฮัก

หากปล่อยต๋ามกั๋ม มันนำมันจั๊ก เลือกบ่มีหลัก ได้ใด
หนึ่งชีวิตนี้ ต้องดีสดใส เมียคือปัจจัย จื่อไว้เน่อเจ้า.

[หรรษา]

แม่ของบุตต๋า บุตตี๋ลูกเต้า เครือออนจายเลา กล่าวไว้

สำคัญเหลือหลาย เนอนายท่านไท้ เลือกหาหื้อได้ ดีดี
อย่างผมคนนี้ โอกาสหลายปี๋ จักหาคนดี เป๋นศรีแนบข้าง
เลือกผิดคิดจ๋น ตั๋วต๋นกระด้าง เลือกถูกเป๋นตาง ป๊นตุกข์

แม่ญิงแม่ยาง นั้นมีเป๋นปุ้ก แม่ซุกบ่มส้ม ตางใน
แม่ดำนอกนั้น ใจ๋หั้นขาวใส ขี้เหร่ป๋านใด แต่ใจ๋จื่นสู้.

[เครือออน]

แม่ญิงคนดี เป๋นศรีจุ้ผู้ วางตั๋วเชิดชู ผัวฮัก

แม่ยังคร้านก๋าร อู้งานชอบนัก ผัดผ่อนอยู่หั้น ตึงวัน
กระชังชำรุด ก้นปุ๋ดฮู้หัน ฮิหาบ่ตัน แม่มันจ่ายเสี้ยง
แม่ไขว่หน้าผัว มัวก้าเดี่ยงเดี้ยง เสียงผัวปิ๊กมา จึ่งยะ

แม่หัวก่ายข่ม นิยมไสยะ บ่ยะก๋ารอั้น สักราย
เลือกหื้อดีเน้อ เป่อเล้อจ้าดหลาย อย่าหื้อเปล่าดาย เนอหรรษาเจ้า.

[หรรษา]

แม่ญิงบางคน บ่ลุกนึ่งข้าว เมาก่าซบเซา ตื่นจ๊า

บางคนคร้านหลาย เยี๊ยะก๋ารเหนื่อยล้า อยู่ถ้าผัวเจ้า ดายดาย
ลางคนซ้ำฮ้าย เงินคำบ่หลาย ซื้อของมากมาย สร้อยแหวนเสื้อผ้า
ลางคนสะหาว ต๋าขาวสวกกล้า แจ่งด่านานา สัพพะ

บางคนหลายใจ๋ เจ้าจู๊อาละ จ๋าจ๊ะผัวหน้อย หลายคน
บางคนหมั่นแต๊ หมั่นจั้กลากขน ข้าวของบ่ทน กิ๋นขายจ๋นเสี้ยง.

[เครือออน]

ลางคนก็ดี สะหรีใสเกลี้ยง ใช้จ่ายปอเปียง ฐานะ

ข้าวปล๋าอาหาร ชำนาญสัปป๊ะ คั่วส้าแก๋งต้ม ยำดอง
เย็บปักถักร้อย บ่ด้อยเป๋นสอง หนึ่งบ่มีรอง เรื่องของเสื้อผ้า
งานบ้านก๋ารเฮือน บ่เบือนหนีหน้า เก็บกวาดแต่งดา ดีนัก

แขกไปใผมา อู้จ๋าน่าฮัก งามนักฟู่อู้ ถ้อยที
ได้เมียน่าฮัก งามนักดีหลี อยู่สวัสดี เป๋นศรีแม่บ้าน.

[หรรษา]

เมียดีเป๋นศรี คนจ๋าเล่าต้าน เล่าลือยืนนาน สาธก

เมียฮ้ายดั่งเป๋น ก๋รรมเวรแบกครก หนักอกอยู่หั้น ในคิง
เมียหล้างคนนั้น ดั่งผีเข้าสิง เอ๊กเดือดฮาคิง แม่ญิงผีเข้า
บางคนแอ่วหนัว เมามัวกิ๋นเหล้า เวียกก๋ารบ่เอา เมาค้าง

ถ้วยจ๊อนถาดไห หม้อใบบ่ล้าง ตุ๊กข์ผัวแนบข้าง ตึงวัน
เลือกดีเน้อครับ สำหรับจ๋อมขวัญ อย่าเพิ่งเร็วพลัน รีบคว้ามาแอ้ม.

[เครือออน]

เมียปัจจุบัน ต้องหมั่นหอมแก้ม เยียะหยังต้องแจม จ้วยก๊ำ

เพราะว่าเมียเฮา หนึ้งข้าวหนึ้งน้ำ เยียะเหียจุ้ก้ำ จุ้ปาย
เถิงจะหน้ายักษ์ หุ่นซากผีต๋าย แต่ใจ๋ตางใน ผ่องใสสว้างหลว้าง
เมื่อคืนมาแถม นอนแอมป้างข้าง เสียงขนอืดคาง จ่างเต๊อะ

ญิงอื่นตังหลาย ทั่วไปเป่อเลอะ เฮอะเฮอะหาได้ บ่ดี
เมียเฮาคนนี้ เป๋นแม่ดีหลี บุตต๋าก็มี บุตตี๋ก็ได้.

[หรรษา]

นาบุญป๋างหลัง มาตันฮอดใกล้ แม่ศรีทรามวัย ป้อนั้น

เป๋นเมียเตียมแสง คู่แปงหน่อจั๊น คู่ผัวติ๊บแก้ว เมียแปง
ผลบุญจ้าดแล้ว บ้แคล้วกิ๋นแหนง คู่ฮักคู่แปง เตียมแยงแนบข้าง
เป๋นแม่บุตต๋า มาดาคู่อ้าง ก๋ารบ่ตำวาง หนีละ

หนึ้งข้าวสุมหลัว สนัวเปิ่งป้ะ แม่ศรีคู่ข้าง เตียมคิง
ดีแล้วป้อครับ นับเป๋นความจริ๋ง ตี่ได้แม่ญิง ฮ่มโพธิ์ลูกเต้า.

[เครือออน]

ลูกนะบ่หวง เป๋นห่วงก้าเต้า อู้แบบบ่เมา นะเนียะ

เมียก็มามาน ก๋ารก็ดีเยียะ ลูกก็ขอเบี้ย ขอเงิน
วันวันหนึ่งนั้น มันตุ๊กข์เหลือเกิ๋น เมื่อใดจักเติน เหมือนเปิ้นข้างบ้าน
ผ่อเปิ้นสุขสม รื่นรมย์ทุกด้าน เปิ้นสุขสำราญ ค่ำเจ๊า

เฮาฮิฮิมต๋าย เต้าใดบ่เต๊า มันแสนโศกเศร้า ดวงแด
มันอาจเป๋นเพราะ เฮาเกาะกระแส โลกล้ำไปแน แย่แล้วเจ้าข้า.

[หรรษา]

ฮิหาฮิมต๋าย ละลายต่อหน้า ย้อนว่าลูกยา ขอใจ๊

มันบ่เป๋นหยัง หนอเจ้าป้อไท้ เป๋นผลพลอยได้ วันลูน
เกาะกระแสนั้น ต๋ามเรื่องมาสูน เลี้ยงลูกเป๋นทุน มีคุณวันหน้า
ข้างบ้านเขาสม อารมณ์คลี่อ้า จ่างเขาเต๊อะนา อย่ายึด

เดี๋ยวป้าโมโห ด่าเอ๊กระทึด ปวดหัวอึ๊ดอึ๊ด แถมนา
จ่มล้ำจ่างตุ๊กข์ ความแก่มาหา ยิ้มไว้เต๊อะนา หน้าต๋าหนุ่มขึ้น.

[เครือออน]

ลางคืนน้ำต๋า ไหลยวาสะอื้น เดิ๋กเดิ่งเกิ่งคืน กึ๊ดนัก

อันนี้ก็ปัน อันนั้นก็จั๊ก ลูกฮักคู่ข้าง เมียแปง
ลุกมาเมื่อเจ๊า อดเอาใจ๋แข็ง กี่บาทจัดแจง แบ่งไปทั่วหน้า
ตึงตุ๊กข์นักแก ตั้งแต่ตีห้า ฮอดตะวันลา เหลี่ยมลับ

เข้าบ้านยามแลง มาแจ๋งมานับ สำหรับลูกแก้ว เมียแปง
หากปอมีทรัพย์ ซื้อกับข้าวแก๋ง มากิ๋นเมื่อแลง แก๋งอ่อมลาบส้า.

[หรรษา]

ผัวเซาะทำก๋าร เมียนั้นซักผ้า อาหารภูญจา คาบมื้อ

หน้าตี่ผัวหา เงินมาจ่ายซื้อ หื้อเมียหมื่นตื้อ จัดแยง
กันมีลูกฮัก ตึงบ่กิ๋นแหนง ป้อฮักเตียมแยง เปิ่งแฮงวันหน้า
อันนี้ครอบครัว สนัวเอกอ้า เครือออนนั้นนา แม่นตั๊ด

ผัวแก้วเมียแสง คู่แปงบ่ปั๊ด ผูดฮัดกั๋นด้วย ฮ่มเย็น
ผัวเผดเมียยัก นั้นนาบ่เป๋น คู่ก๋รรมซอนเวร สะเด็นเข้าใกล้.

[เครือออน]

อันผัวนั้นหนา จ๋าเผียบเตียมได้ หัวแม่มือไง แม่นตั๊ด

ผู้นำครอบครัว หัวแม่มือชัด ถนัดกำหมั้น พลัง
ใช้กดใช้เต็ก ใช้ชี้ตางหลัง กอดชี้กล๋างนาง ลางกอดนิ้วก้อย
ผัวฤๅปิต๋า กุณหนาบ่หน้อย หื้อได้ผ่อกอย เจื้องจั๊น

อันหัวแม่มือ คือพ่อเฮานั้น ฤๅผัวแม่บ้าน มารดา
หัวแม่มือไซร้ เผียบได้ปิต๋า ฤๅผัวมารดา เปิ้นว่าไว้อั้น.

[หรรษา]

ผัวเป๋นแม่มือ ยำตือบ่กั้น หัวหน้าทัพยัน แต๊ครับ

เมียนั้นต้องต๋าม หัวหน้าก๋องทัพ จึงจักผาบเสี้ยง ภัยรี
ก็แม่นแต๊ครับ ต๋ามคำป้อศรี เครือออนวาตี กล่าวมีไว้หั้น
ผัวๆเมียๆ ยัวเยียหลายขั้น เป๋นเรื่องสำคัญ บ่น้อย

ถ้าจะศึกษา นั้นนาเรียบร้อย ต้องปรึกษาผู้ เชี่ยวขาญ
อย่างเครือออนนั้น ผู้ชำนาญก๋าร ปรึกษาเรื่องงาน อะหยั๋งก็ได้.