หัวใจค่าวซอ

[หน้อยต๊ะเวียงต๋าน]

หลอนท่านคว่ำหงาย ได้ต๋ายจากหล้า เสี้ยงแล้วเทวา เทพไท้

เมื่อท่านยังคน เปรอปรนท่านไว้ อย่าหื้อท่านได้ โสกันต์
กำสอนท่านนั้น ยึดเป๋นแก่นสาร รอดป้นภัยพาล หมู่มารแหล่งหล้า
หื้อประสบผล เป๋นคนแกร่งกร้า ตราบเต้าจีวา มอดดับ

เมื่อท่านเสี้ยงใจ๋ ท่านได้ลาลับ ลองกึ้ดหวลกลับ ดวงมาลย์
สิ่งตี้ลูกนั้น พึงสังวรกั๋น สินทรัพย์ตึงวัน ไผละไว้หื้อ
หน้อยต๊ะเวียงต๋าน

[หรรษา]

ขะแนมตั้งใจ๋ เจ้าอย่าไปดื้อ คนดีนั้นฤๅ กำพระ

กตัญญูต๋า เจ้าอย่าไปละ ป้อพระแม่พระ ต๋นดี
ฮู้กุณต่านแล้ว อย่าแคล้วหายหนี กะตะเวที คนดีเน้อเจ้า
ผู้มีพระกุณ การุณใฝ่เฝ้า ปฏิบัติเอา อย่าละ

ยามท่านเจ็บเป๋น หนาวเย็นเปิ่งป้ะ เอาต๋นอยู่เฝ้า รุมรา
คอยปรนนิบัติ อย่าพลัดไกล๋ต๋า ยามมรณา ทำบุญส่งหื้อ

[เครือออน]

ปิต๋ามาต๋า กุณาหลายตื้อ สองท่านนั้นคือ พรหมมะ

ท่านมีเมตต๋า มีกรุณะ มุทิตาหั้น ยินดี
อุเบกขานั้น แม่นหมั้นดีหลี วางตั๋วปอดี บ่มีเหงี่ยงขว้ำ
ปิต๋ามาต๋า ฮักษาจุ้ก้ำ หื้อลูกเต้านำ ไปกึ๊ด

กตัญญุต๋า ธัมมาต้องยึด ตอบแทนว่าอั้น บุญกุณ
ลูกเต้าเฮานั้น ต้องหมั่นอุดหนุน ตอบแทนบุญกุณ ก๊ำจุนท่านเจ้า.

[หน้อยต๊ะเวียงต๋าน]

โดย หน้อยต๊ะ เวียงต๋าน
ยกยอทั้งสอง ขึ้นอยู่เหนือเกล้า หื้ออยู่ยืนยาว เอื้อเฟื้อ

เมื่อยังมีใจ๋ ทั้งก๋ายเลือดเนื้อ เฮาต้องกุนเกื้อ อาทร
อย่าได้ขว้างละ เบื่อหน่ายถ่ายถอน ปล่อยหื้อเมือมรณ์ เจียรจ๋รจากหล้า
จึ่งคิดบูชา เหมือนทำเอาหน้า เมื่อท่าจากลา ล่วงลับ

บางคนเหลวไหล หันไปคำนับ มีใจ๋ยอมฮับ งมงาย
เหนือกว่าแม่ป้อ เกิดก่อเลี้ยงก๋าย เป๋นเพราะเหตุใด จ้วยไขบอกแก้

[เครือออน]

อันนี้ปั๋ญญา เขาน่าจะแข้ ตึงง่าวนักแก เนอครับ

หลงต๋นหลงตั๋ว เมามัวถือนับ คนอื่นกว่าอั้น สองรา
ยิ่งเป๋นตุ๊พระ กิเลศตัณหา บดบังปั๋ญญา ชีวาก็หื้อ
บ่ได้ไตร่ตรอง ลางพ่องก็ดื้อ ที่นับถือคือ สงฆ์เก๊

หันคนหลงไหล หัวใจ๋หว่าเว้ จิตใจ๋เขาเหล้ บ่ตรง
พ่อแม่เฮานั้น คงหมั้นอย่าหลง เป๋นพระสององค์ ดำรงอยู่บ้าน.

[หน้อยต๊ะเวียงต๋าน]

ฮักลูกป๋านใจ๋ มากมายขีดขั้น บ่มีคืนวัน ผันย้าย

บ่มีเงื่อนไข สิ่งใดดีฮ้าย ก้อจ๋าบอกหื้อ ต๋ามจริง
เมื่อท่านจากค้าย ร่างก๋ายสู่สิง จักสมคนิง หาตี้ไหนได้
ไปตี้บรูไน อเมริกาใต้ เขาหิมาลัย บ่ป๊ะ

ไปเมืองปีนัง ไปเมืองอังวะ หรือเมืองซาอุ บ่มี
โตยหาบนฟ้า ใต้หล้าวิถี จ๋นเสี้ยงจีวี หาไหนบ่ได้

[หรรษา]

ปี๋ใหม่เมืองเหนือ ก็เวียนมาใกล้ ประเพณีไทย อย่าละ

สระเกล้าดำหัว สองเถ้าต่านพระ สัพพะเครื่องหย้อง ครัวใบ
ถวายท่านไท้ นุ่งใบสดใส ปี๋ใหม่เมืองไทย ใส่ใจ๋เนอเจ้า
ปิต๋ามาดร ผู้บังเกิดเกล้า หมู่ลูกหลานเฮา พร้อมพักต์

ปัดเผี้ยวกวาดถู บ้านจองหอฮัก สองป้อแม่เจ้า ภูธร
กันต่านลาลับ หมู่เฮาอย่าถอน ปากั๋นสะออน ทำบุญส่งหื้อ.

[เครือออน]

ลูกเต้าตังหลาย จ๋ำไว้อย่าดื้อ พ่อแม่เฮาคือ พรหมพร้อม

ปิต๋ามาต๋า วันตานอบน้อม จ๋อมเจ้าเปียงได้ จีวา
สองเขือหื้อทั้ง เนื้อหนังมังสา จีวิตวิญญา วิชชาแบบเบ้า
จักหาใผหนอ เปียงพ่อแม่เจ้า ในโลกของเฮา ใบนี้

ขอลูกตังหลาย อย่าได้หลีกรี้ ขอจุ่งจ่องจี้ แตนกุณ
ทำตั๋วดีแม้น สืบแตนขะกู๋ล สร้างเนื้อนาบุญ อุดหนุนเตื่อมแถ้ง.

[หรรษา]

สำนึกพระคุณ เพิ่มพูนอย่าแห้ง ศรีฮักฮอมแปง ลูกไท้

พระคุณสองขา เอามาก๋องไว้ สูงว่าโลกใต้ โลกา
มหาสมุทร กว้างสุดลูกต๋า เปรียบคุณมารดา ปิต๋าบ่ได้
ปี๋ใหม่สังขาร ลูกหลานเข้าใกล้ ของกิ๋นอันใด ต่านมัก

หื้อได้ขนขวาย ถวายด้วยฮัก ฟูมฟักใฝ่เฝ้า ดูแล
ยามมีจีวิต อย่าคิดผวนแปร๋ หื้อหมั่นดูแล ป้อแม่สองเถ้า.

[ล้อเลื่อน]

ใจ๋ภักดิ์เต๋มผัง ผู้บังเกิดเกล้า บ่ปล่อยหื้อเซา อ้างว้าง

เมื่อยแข้งอ่อนขา ต๋าหลับพับค้าง หวังคนข้างๆ ผ่อกอย
จะหันขวาซ้าย ร่างก๋ายถดถอย ต๋าสีดำมอย ผ่อไกล๋บ่ได้
หลังก่องข้ดตั๋ว ใคร่หัวเหมือนไห้ จะจ๋ามจะไอ อีดกั๊ด

วันพระวันพร อาศัยนอนวัด ศีลสิบศีลห้า บำเพ็ญ
ผ่อกอยท่านเต๊อะ ลูกหลานโหลนเหลน ก่อนเข้าห้องเย็น มานั่งกราบไหว้

[หรรษา]

ยามต่านหายใจ๋ เร็วไวอยู่ใกล้ หม้อแก๋งเปิ่งไฟ นั่นและ

มีลูกมีหลาน ก็หวังข้องแวะ ยามเจ็บเมื่อยไข้ หนาวใน
ป้อแม่นี้ไซ้ ฮักลูกสายใจ๋ สุดดวงฤทัย หาไหนโลกใต้
ลูกสิบลูกซาว ป้อแม่เลี้ยงได้ หวังเปิ่งทรามวัย ลูกไท้

เฮาเลี้ยงเป็ดหมู หวังจูจ่วยใจ๊ จิ๊นไข่ว่าอั้น เนอนาย
กตัญญูไว้ อย่าได้ลืมหาย สองคนบ่าดาย ดูแลผ่อเฝ้า.

[เครือออน]

อันท่านครูบา ศรีวิจัยเจ้า เปิ้นบอกหื้อเฮา จื่อไว้

พ่อแม่เตียมตัน อรหันต์ไท้ ลูกเต้าจุ่งได้ วันตา
แถมฮีตหนึ่งไซร้ เผียบไว้ปิต๋า มาตุมารดา เป๋นพรหมมาเจ้า
เมตต๋าเกื้อหนุน การุณลูกเต้า บ่ว่าหนักเบา ดีฮ้าย

มนุสส์ก๋าโย มโนเทพไท้ ต๋ายแตนลูกได้ สัจจัง
พ่อแม่เฮานั้น ท่านจักสมหวัง ลูกเต้าเชื่อฟัง แลตั้งตั๋วได้.

[หรรษา]

หลายคนกราบสา พุทธาหว่านไหว้ สารูปธาตุจัย สังฆะ

จุมปูติศา นานาโลก๊ะ หวังได้ผละ บุญดล
ยังบ่เกิ่งน้อย ของบุญกุศล เต่าลูกทุกคน กราบพรหมสองเถ้า
ป้อแม่คือพรหม ของเฮาลูกเต้า พระบ้านเฮือนเฮา แน่นัก

คุ้มครองฮักษา รุมราลูกฮัก รอดป๊นสิ่งอั้น ภัยยา
ลูกเต้าจ๋ำไว้ หมั่นใกล้น้อมสา สาธุมารดา ปิต๋าของเจ้า.

[ล้อเลื่อน]

ยามแฮงโรงรา หมั่นมานั่งเฝ้า ข้าวปล๋าหยูกยา หาไว้

บีบเข้งนวดขา อู้จ๋าลูบไล้ เปื้อฮื้อต่านได้ ใจ๋บาน
จะมีความสุข เมื่อหันลูกหลาน อยู่ดีลำฮาน ลูกหลานล้อมหน้า
เทพไท้พรหมมา ใจ๋แข็งแรงกล้า บั้นปลายชีวา เปี่ยมสุข

กงกั๋มกงเกวี๋ยน หมุนเวียนเหมือนหลุ๊ก บุณก๋ำพายจ้ำ นำพา
แทนคุณท่านไท้ ใจ๋ปรารถนา กุศลบุญญา จะมาเตี่ยมแถ้ง

[หรรษา]

ปี๋ใหม่เมืองเหนือ จุนเจืออย่าแห้ง น้ำใจ๋ฮอมแปง ลูกฮัก

หื้อปาเอากั๋น ผูกพันธ์พร้อมพักต์ สมัครใจ๋เข้า วันตา
ดำหัวท่านได้ ปี๋ใหม่นี้หนา ปิต๋ามารดา ฮ่มโพธิ์ลูกเต้า
ป้อแม่เสมือน ดั่งเป๋นพระเจ้า ในบ้านเฮือนเฮา แน่แต๊

เรื่องนี้ความจริ๋ง อย่างไร้ข้อแม้ นั่นและสมหั้น ควรไป
น้อมคารวะ ต่านพระเงาใส วันปี๋ใหม่ไทย อย่าไกล๋ห่างหน้า.

[เครือออน]

สิบสามเมษา วงศาแห่งข้า จักปากั๋นมา ฮ่วมครบ

นัดจุ่มนุมกั๋น วันตาน้อมนบ เคารพแม่เจ้า มารดา
ส่วนคุณพ่อนั้น หรือท่านปิต๋า ท่านมรณา ไปเมินแล้วเจ้า
ดำหัวมาต๋า และมากิ๋นข้าว คาบแลงเนอเฮา พี่น้อง

สนุกสุขสันต์ เป๋นวันฮ่วมพ้อง พี่น้องเฮาได้ จ๋าจู
ผ่านพ้นไปเสร็จ สำเร็จสวยหรู บุญก๊ำบุญจู จุ้ผู้เน่อเจ้า.

[หรรษา]

สิบหกเมษา เวียนมาบ่เศร้า สรวญเสเฮเมา กั๋นนัก

อย่างตี่บ้านผม เปื่อนมาคึกคัก พร้อมพักต์กั๋นถ้วน ไหว้ครู
เปื่อนศิลปะ มามากลากถู พร้อมกั๋นไหว้ครู หลายคนบ่หน้อย
สำเร็จเสร็จก๋าร แล้วพลันม่วนถ้อย ซอจ๊อยเอ็นจอย กั๋นนัก

ดนตรีเมืองเหนือ บรรเลงคึกคัก ปากตักกั๋นเหล้น ม่วนงัน
หกโมงเย็นแล้ว ถึงจะจากกั๋น ปี๋ไหนหนึ่งวัน จัดกั๋นเน้อเจ้า.

[ล้อเลื่อน]

ปี๋ใหม่เมืองเหนือ รวมเคลือลูกเต้า ดำหัวสูมา คารวะ

บิดามารดา ผู้เป๋นเหมือนพระ ปั๋นปอนผูกฝ้าย มัดมือ
อุ๊ยหม่อนบ่หยั้ง นั่งอ่านหนังสือ ส่งเสียงอืออือ หื้อปอนหลานหน้อย
เกิดความสำราญ ลูกหลานเกี่ยวก้อย สองต๋าดำมอย ป๋นสุข

ลูกหลานโหลนเหลน เหล้นกั๋นสนุก อุ๊ยลุกออกเต้น รำวง
เปิดฟอร์เคลือญาติ ฟาดในห้องโถง แชะโมงชิ่งโมง ฟ้อนรำม่วนเหล้น

[เครือออน]

คนเถ้ามาซุม คนหนุ่มมาเต้น ตั้งเจ๊าฮอดเย็น ม่วนล้ำ

ปี๋ใหม่สุขสันต์ ม่วนกั๋นเหล้นน้ำ ล้านนาทั่วก้ำ ฮีตฮอย
ลางก็ฮีตเก๊า ลางเอาก้าฝอย ลางก็เหลือปอย ลางถอยห่างเหง้า
ลางจัดได้ดี ลางมีก้าเหล้า มีก้าคนเมา โห่ฮ้อง

ฮีตเก๊าเปิ้นดี เมธีแซ่ซ้อง ปายลูนขัดข้อง เพราะเมา
เลือกเอาดีไว้ อย่าได้ถือเหมา อันไหนบ่เลา บ่เอาสืบสร้าง.

[หรรษา]

อันไหนเป๋นศรี เป๋นดีสล้าง ก่อยแนะแนวตาง รุ่นน้อง

จี๊แนะขานไข บอกไปป่าวร้อง ลูกหลานเกี่ยวข้อง เป๋นแนว
เริ่มกั๋นวันนี้ ก่อยจี๊เป๋นแถว สอนสืบต๋ามแนว โบราณเก่าเกื้อ
อย่างก๋ารแต่งก๋าย นุ่งหย้องผ้าเสื้อ กำค่าวกำเครือ เช่นนี้

สิ่งไหนมันดี อย่าได้ลบลี้ กลั๋วมันป่นปี้ หายไป
ประเพณีนั้น ขีดขั้นถึงไหน อันไหนของไทย อันไหนต่างด้าว.

[เครือออน]

บ่หื้อถอยหลัง บ่ฟั่งจักก้าว กึ๊ดสั้นกึ๊ดยาว สืบค้น

เลือกเอาอันดี อันมีค่าล้น มาแปล๋งเป๋นต้น สืบยาว
ช่วยฮักษาไว้ หื้อได้สืบสาว คนล้านนาจาว จี๋สาวบ่าวหน้อย
ของเก่าเก๊าเดิม พูนเสริมเติมสร้อย ศึกษาฮีตฮอย เลือกเฟ้น

อันใดดีเลา เอาปิ๊กมาเน้น อย่าเอาก้าเหล้น มัวเมา
ตึงเนื้อตึงน้ำ ฮู้ทำอย่าเขลา ฮู้จักเลือกเอา ฮากเหง้าเก่าเกื้อ.

[หรรษา]

ป้ออุ๊ยค้างเกิ๋น อยู่เมินจ่วยเอื้อ ต๋ามแบบแนวเครือ เก่าค้าง

ประเพณีเหนือ จุนเจือบ่ร้าง สอนอ้างต๋ามเบ้า ฮีดเฮา
สิ่งไหนดีนั้น ขอสอนหื้อเขา ฮีดคนเมืองเฮา ฝึกเขาแต่หน้อย
บ่หื้อฮีดเหนือ มันได้อ่อนด้อย ขอผู้เฒ่ากอย ถี่แค้ม

ผู้ใหญ่รุ่นหลวง มากปวงจ่วยแย้ม ฝึกแค้มลูกเต้า จายญิง
ซึมซับประยุกต์ เข้าซุกอยู่สิง อาศัยเข้าอิง แนบคิงหื้อได้.

[เครือออน]

งานเทศก๋าล หลายอั้นมาใกล้ ประเพณีไทย นาล้าน

เดือนแปดเดือนเก้า ฮีตเฮาสะต๊าน ฮู้กั๋นทั่วบ้าน แดนเมือง
งานสักก๋าระ พระธาตุองค์เหลือง ทั่วบ้านเขตเมือง ล้านนาหมู่บ้าน
พระธาตุเจ๋ดีย์ มีทั่วทุกหย้าน เถิงก๋าลอันควร สรงน้ำ

แปดเป็งเก้าเป็ง มาเล็งเลิศล้ำ พร้อมกั๋นทั่วก้ำ วัดวา
ทำก๋ารสรงน้ำ พระธาตุเกศา สรีระธาตุ์ วันตากราบไว้.

[หรรษา]

ประเพณีเหนือ ม่วนเหลือเมืองใต้ ฮีดล้านนาไทย มีนัก

หื้อได้ฮักษา ของเดิมฟูมฟัก ไขว่ขวักสืบส้น ยาวไป
เจื๊อเมืองเฮานั้น มันบ่หล่นไกล๋ ละอ่อนรุ่นวัย ใส่ใจ๋เนอเจ้า
หมั่นเข้าหมั่นหา ป้ออุ๊ยแม่เฒ่า ประเพณีเฮา เฮียนฮู้

อย่างป้อเครือออน โพสในกระทู้ ต๋ามเปิ่นกล่าวอู้ ตังบน
ไผฮู้คิงแล้ว หื้อเอาตั๋วต๋น สอนคนต่อคน จ่วยกั๋นสืบสร้าง.

[เครือออน]

ฮ้องขวัญบายศรี เดี๋ยวนี้ต้องจ้าง ขันตั้งบ่าดาย มันน้อย

ขันตั้งสิบสอง ใส่ซองห้าร้อย มันนักบ่หน้อย สักกำ
พ่อหนานพ่อน้อย เขียนถ้อยท่องจ๋ำ มาเป๋นผู้ทำ ฮับเอาขันตั้ง
ครัวสืบจ้ะต๋า ก๋ารดาก๋ารห้าง ก็จ้างกั๋นทำ แล้วครับ

สะตวงส่งไสย เครื่องในสำรับ ก็นับยากใบ้ คนดา
ขอหมู่เฮานั้น ช่วยกั๋นฮักษา ฮีตฮอยล้านนา ฮักษาหื้อได้.