หัวใจค่าวซอ

[หรรษา]

คนฮู้อยู่ไหน รีบไปเข้าใกล้ หาความเป๋นไป ค้นคว้า

ครัวสืบจาต๋า เป๋นมาเนิ่นจ๊า หมายความว่าอั้น จาใด
ไม้ก๊ำสามนั้น แปล๋ว่าสิ่งไหน จ่อน้อยตุงจัย พร้อมฝูงกล้วยอ้อย
บอกน้ำบอกทราย ความหมายบ่หน้อย หมายเอาฮีดฮอย ก่อนนั้น

ความหมายนั้นนา หรรษาน้องจั๊น ใคร่ฮู้เรื่องหั้น แต๊นา
ยังเครื่องสัพพะ ครัวสืบจาต๋า เล่าความเป๋นมา เต๊อะป้อเครือฯเจ้า.

[เครือออน]

อันนี้จ๋นใจ๋ เนอนายหน่อเหน้า บ่เข้าใจ๋ตัน แต๊ละ

ไม้ง่ามไม้ขัว เครื่องครัวสัปป๊ะ หาฮู้บ่ได้ สักอัน
สืบจ้ะต๋านี้ ต๋ามที่เกยหัน เปิ้นยะเมื่อวัน ต๋อนตะวันขึ้น
ความหมายนั้นหนอ เลิ้กบ่ใช่ตื้น ต๋าหลับต๋ามืน บ่ฮู้

วอนท่านตังหลาย ได้ไขกระทู้ หรรษาเปิ้นอู้ ถามมา
เครือออนม่อนนี้ ตั๋นผิงแต๊หนา ต้องขอสูมา หรรษาหน่อเหน้า.

[หรรษา]

ไม้ก๊ำจาต๋า สามขาบ่เศร้า กล้วยอ้อยเป๋นเลา พรั่งพร้อม

หมากเหมี้ยงปูยา นั้นนามัดย้อม แขวนสายแวดอ้อม แถวยาว
จ่อแดงเหลืองนั้น ตุงไจยสีขาว หมอนสาดผืนยาว ฝ้ายขาวมัดห้อย
หม้อน้ำขาวเหลือง เป๋นแก่นหน้อยๆ ใคร่ฮู้ฮีดฮอย แต๊ๆ

สงสัยในใจ๋ อย่างไร้ข้อแม้ ไผฮู้จ่วยแก้ หื้อฟัง
ม่อนใคร่ฮู้เก๊า ต๋ามเหง้าตางหลัง ความหมายครัวยัง ดากั๋นพร้อมหั้น.

[เครือออน]

สืบจ๊ะต๋า ผะหญานาล้าน ปั๋ญญาพื้นบ้าน ล้านนาผะหญา
เครื่องครัวมากล้น รวมต้นสามขา ไม้ง่ามเกินวา อย่าหื้อมันสั้น
หนึ่งหมายปิต๋า สองมารดาหั้น สามนั้นเกี่ยวพัน ลูกฮัก

ง่ามหน้อยก็มี อันนี้ต้องนัก เท่าอายุอั้น เจ้าเฮือน
คันไดเจ็ดจั๊น เก้าขั้นนั้นเหมือน ตระกูลคนเฮือน นับเจ้นหื้อเสี้ยง
ลวดเงินลวดคำ ลวดหมากลวดเหมี้ยง หมายเอาญา-ติ พี่น้อง

น้ำหม้อน้ำบวย เสื่อหมอนใหม่พ้อง หมายเอาแขกหย้อง มาเยือน
สะพานขัวไม้ หมายได้เสมือน ทอดสัมพันธ์เตือน คบเพื่อนจาวบ้าน
ตุงเทียนค่าคิง อิงสูงเจ้าบ้าน จุดปู๋จาตาน ปุ๊ทธะ

กระบอกใส่ทราย หมายปฐพะ ปฐพีอั้น ธาตุดิน
กระบอกใส่น้ำ ธาตุวารีสินธุ์ ธาตุไฟอัคคิน ผะตี๊ปเตียนแส้
ช่อหน้อยตุงไจย แกว่งไกว๋ป่ายแป้ ธาตุลมเนอแล หมายไว้

ข้าวเปลือกหมื่น ข้าวสารปันไซร้ หมายอาชีพได้ ใจ๊แฮง
หน่อกล้วยต้นน้อย หน่ออ้อยต้นแข็ง บะป๊าวขะแนง หนึ่งเครือกล้วยใต้
ผะโยชนา โตยมาไจ้ไจ้ ฮ่างก๋ายเฮามี พละ

สะตวงเก้าต๋า ใส่โภชนะ อาหารเพื่อเจ้า เทพา
บายศรีตั้งไว้ หมายขวัญจ้ะต๋า ฮ้องขวัญปิ๊กมา หาต๋นตั๋วเจ้า
ฝ้ายมัดมือ มัดหื้ออยู่เหย้า ลูกเมียตั๋วเฮา ผูกมัด

เดาด้นไขขาน เป๋นหนานนอกวัด บ่ชัดบ่แจ้ง สูมา
ข้าขอลา ไปก่อนมอกอี้ เท่านี้ขอลาไป ก่อนแลนายเหย.

[หรรษา]

ขอบคุณจาดนัก ขอบคุณจ้าดหลาย ป้อหนานบรรยาย หายความสลั้ง
ลังเลสงสัย หายไปเป๋นตั้ง ขอน้อมวาตัง สาธุ

ความฮู้ได้หลาย มุ่งหมายทะลุ บรรจุอยู่หั้น บรรยาย
ัปัญญาป้อนั้น หากมีมากหลาย คำตอบเรียงราย ขยายความแจ้ง
และขอรบก๋วน คำถามมีแถ้ง ขอป้อเอาแฮง จ่วยเต๊อะ

ความฮู้ป้อหลาย มากมายป่าเลอะ ขอถามเรื่องหั้น ใจ๋ความ
เรื่องครัวส่งเคราะห์ มากมายหลายหลาม จับหมายเอาความ อย่างใดพ่องเจ้า
ขอป้ออาจ๋ารย์ เครือออนหน่อเหน้า อธิบายเอา เต๊อะครับ

เครื่องครัวหลากหลาย มากมายอ่านนับ ใส่หยั๋งพ่องเจ้า เครื่องดา
และความหมายนั้น หื้อหายสังกา ขอเปิ่งปั๋ญญา ความฮู้ป้อเจ้า.

[เครือออน]

หรรษาจายราม ต้องถามคนเถ้า เครือออนจายเลา ยอมก๊าน

จุ้ครั้งจุ้หน คนเถ้าทั้งน้าน ก๋ารส่งเคราะห์บ้าน เครื่องครัว
เครือออนเมาเว๊บ บ่เก็บใส่หัว ความฮู้บ่ชัวร์ อู้มั่วบ่ได้
ต้องถามครูพูน อุดมที่ไหว้ ช่วยไขหื้อกำ เต๊อะครับ

เครือออนหรรษา จักมารอฮับ คำตอบจากเจ้า ครูพูน
อุดมครูไท้ อย่าได้เฉียวฉุน นึกว่าเอาบุญ ดั่งสูรย์ส่องแจ้ง.

[เพลงซอ]

ครูพูนอยู่ไหน ใจ๋มาเตื่อมแถ้ง หื้อมาแสดง จ๋าฟู่

เครือออนหรรษา ว่าในกระทู้ ขอมานั่งอู้ สักกำ
เพลงซอผมนั้น นั่งมั่นบ่ถาม กั๋วบ่ถูกยาม จายรามนั่งเฝ้า
รอคนเฒ้าแก่ ได้แว่ะมาเข้า ชี้แจงหมู่เฮา เอาเต๊อะ

ไค่ฮู้เหมือนกั๋น ไค่หันเยอะเยอะ จะได้เติกเมอะ เอาความ
ม่อนมาวันนี้ ใจดีล้นหลาม เพลงซอมาจาม เครือออนว่าอั้น

แวะมาแล้วคับป้อเครือออน

[เครือออน]

ดีใจ๋แต๊หนอ เพลงซอยังหมั้น ยังบ่ลืมบรรณ ตั๊ดนี้

อย่าได้ห่างหาย อย่าได้หลีกลี้ ขอแวะตี้หนี้ ลางวัน
มาเอิ้นมาตั๊ก มาซักถามกั๋น มาม่วนมางัน มาหวันตอบถ้อย
มาหยอกกั๋นไป วันไหนละหน้อย เป๋นก๋ารฮอมปอย บรรณะ

ยินดีจ้าดหลาย จ้วยไขวาต๊ะ ฮ้องหาท่านเจ้า ครูพูน
เมื่อครูทราบไซร้ คงได้หันหุน เมตต๋าก๋ารุณ ไขสุนทรแก้.

[หรรษา]

หรรษาจายราม นั่งแอ้ขะแหม้ เวียกก๋ารนักแก อาละ

ก็เลยหายสอย ลับลอยบ่ป๊ะ บ่ใจ่จักละ จาวเฮา
เข้ามาวันนี้ เป๋นดีหายเหงา เพลงซอจายเลา ก็มากล่าวถ้อง
เพลงซอเงียบหาย บ่เข้ามาห้อง บ่วาดทำนอง ค่าวจ๊อย

แต่ก็ดีใจ๋ ปายในม่อนน้อย วันนี้เอ่ยถ้อย วาตี
ขอบคุณจ้าดนัก ตี่บ่ลักหนี มาวาดวาตี วะจี๋เอ่ยอู้.

[เครือออน]

หรรษาจายราม นับเป๋นนักสู้ ฮ่วมยุทธฟิ้นฟู ค่าวจ๊อย

มาตอบถ้องกั๋น หลายวันบ่น้อย หลายปี๋บ่หน้อย สักกำ
ฝากบทค่าวไว้ ไจ้ไจ้ประจ๋ำ เพิ่นกำเฮากำ ระบำค่าวสร้อย
หลายคนหนีไกล๋ หายไปเหียจ้อย เหลือคนเริงปอย เท่านี้

ขอเหล่าเมธา อย่าได้หลีกลี้ ม่วนกั๋นที่นี่ เมินเมิน
เหล่าปราชญ์นาล้าน ท่านจักสรรเสริญ ลูกหลานเตียวเดิน เจริญต๋ามเบ้า.

[หรรษา]

ค่าวซอเมืองเหนือ จุนเจือไต่เต้า เป๋นสายเลือดเฮา สืบเจื้อ

ม่อนขอสัจจั๋ง สืบสานด้วยเนื้อ หยั่งลึกอยู่ห้อง ทรวงใน
บ่หื้อห่างร้าง อ้างว้างไปไหน จะฝังอยู่ใน หัวใจ๋แห่งข้า
ช่วงก่อนว่างหลาย มากมายอยู่ถ้า แต่งรจนา ม่วนแต๊

พักหลังเริ่มอ๋อย เหงาหงอยท้อแท้ บ่มีหว่างหั้น เวลา
แต่ว่าม่อนนี้ บ่ลี้หายต๋า จะหาเวลา เจรจานั่งอู้.

[เครือออน]

หากเหมือนหรรษา นี้หนาจุ้ผู้ ไหลหลั่งมาจู ฟูฟื้น

คงม่วนหัวใจ๋ ดวงทัยครึกครื้น ค่าวสนั่นขึ้น มาไว
ความจริ๋งวันนี้ บ่มีใผไหน จะเยียะจาใด ใผฮู้บอกหน้อย
คนเก่าก็หาย คนใหม่ก็จ้อย เหลือก้าฮ่องฮอย เก่าก๊าง

ก่อนนี้เนืองนัน บันเกือบบ่อค้าง ค่าวสร้อยบ่หล้าง จักวาย
หรรษาหลานฮัก อย่าลักหนีหาย หมั่นมาตั๊กตวาย ไจ้ไจ้เน่อเจ้า.

[หรรษา]

ม่อนหื้อสัญญา บ่หื้อโศกเศร้า จักหมั่นระเมา มาแวะ

บ่หื้อเครือออน ป้อลุงหนานและ กระดานเงียบปิ้ง เมินนาน
หรรน้อยคนนี้ จักหมั่นมาขาน สืบสานต่ำนาน ต่อไปปายหน้า
ตั๋วอยู่แดนไกล๋ เอาค่าวต๋างหน้า ว่างเว้นแล้วกา มาโพส

เขียนค่าวซอสาส์น เอ่ยขานเป๋นโน๊ต อยู่ห้องค่าวก้อม ตวยฮอย
เอ็นดูป้อแต๊ ช่วงนี้เหงาหงอย หลายคนลืมฮอย ถดถอยบ่เข้า.

[เครือออน]

ละหื้อเครือออน นั่งนอนอยู่เฝ้า กระดานค่าวเฮา ตั๊ดนี้

เมธีค่าวสาร ปากั๋นหลีกลี้ หายจากตี้หนี้ เมินนาน
ลางเป๋นคนรัฐ ติดราชก๋าร ลางก็คนงาน ติดก๋ารนายเจ้า
ลางก็ก๊าขาย เงินไหลหลั่งเข้า ตึงบ่ได้เบา ยั้งพัก

ม่อนขอเมตต๋า เมธาตี้ฮัก เว้นวรรคสักหน้อย มาไจ
เครือออนม่อนนี้ บ่หนีไปไหน จักอยู่เฝ้าไป ในกระดานหนี้.

[หรรษา]

ต่อซอสร้อยกล๋อน เครือออนตะกี้ แป๊บเดียวก็มี แหมแล้ว

สังมาไวเกิ๋น บ่เมินเพริดแพร้ว ไปแอ่วนอกบ้าน กำเดียว
ป้อเขียนตอบไว้ ได้ใจ๋เฉลียว ลัดนิ้วมือเดียว ป้อไขตอบเสี้ยง
หลานจายหรรษา หน้าต๋าใบเกลี้ยง ต้องส่งสำเนียง ตอบตั้ก

ต่อกั๋นไปแหม จ่วยแซมคึกคัก สองคนก็ได้ นอเฮา
คนอื่นจ่างเต๊อะ บ่ต้องง้อเขา อยู่สองคนเฮา อู้กั๋นก็ได้

[เครือออน]

หรรษามาไข ทันใจ๋แต๊ใบ้ เป๋นเสือปื๋นไว น้อครับ

โพสต์ค่าวขึ้นจอ ยังบ่ตันนับ ตอบกลับไปได้ เป๋นเพลง
หรรษาตั้งรับ กระฉับกระเฉง ยะหื้อครื้นเครง กับเพลงค่าวสร้อย
เขียนมาตอบไป ม่วนใจ๋บ่หน้อย มาร้อยมาเรียง เสียงตั๊ก

ยินดีแต๊หนา หรรษาหลานฮัก สมัครตอบถ้อย ยืนยง
สมกระดานนี้ มีจุดผะสงค์ ว่าจักดำรง กะโลงค่าวสร้อย.

[ล้อเลื่อน]

ว่างเว้นจากก๋าร ฝากสาส์นเติมถ้อย ต๋ามฮีดฮอยเดิม เพิ่มภักดิ์

เคลือออนหรรษา ได้อนุรักษ์ สุดแสนประเสริฐ เทิดทุน
ฮักษาห้องนี้ ก่อนที่จะสุญ นับว่าเป๋นบุญ ได้หนุนสืบสร้าง
มาเขียนด้วยใจ๋ บ่มีไผจ้าง ถากถางเพี้ยวทาง ชัฏรก

หื้อกวีศิลป์ โผบินเหมือนนก เป๋นมรดก ล้านนา
ก่อนจักดับดิ้น สิ้นแรงถลา หวังมีคนมา อาสากอบกู้

[เครือออน]

ง่อมเหงาเหมือนกั๋น แต่ใจ๋มันสู้ ลูกสิกข์แลครู เวียนตั๊ก

ล้อเลื่อนเขามา ปาหื้อคึกคัก จ้าดนักเนอเจ้า เลื่อนเฮย
ว่างก๋ารงานแล้ว อย่าแป้วอยู่เฉย แวะมาอู้เอ่ย เฉลยค่าวสร้อย
ช่วยกั๋นบงบรรณ ได้วันละหน้อย ฮักษาฮีตฮอย ค่าวไซ้

เครือออนหรรษา อักษ์กระดานไว้ แวะมาไจ้ไจ้ เหมือนเดิม
ขอเจิญเลื่อนล้อ มาต่อมาเสริม มาแต่งมาเติม มาเพิ่มบทถ้อย.

[หรรษา]

ต่อกล๋อนกำจ๋า เฮฮาวันหน้อย ล้อเลื่อนอย่าลอย หลิ่งลับ

ขอเต๊อะจ่วยกั๋น สำคัญเน้อครับ สำหรับค่าวก้อม เมืองเฮา
สมัยเดี๋ยวนี้ ค่าวเฮาเริ่มเหงา หาผู้บรรเทา เขียมยากแต้ใบ้
เพลงซอเหมือนกั๋น ว่างแล้วมาใกล้ ขะใจ๋ไวไว เน้อครับ

ลุงล้อเลื่อนจ๋า หรรษาคำนับ ว่างแล้วจุ่งเข้า แวะเวียน
มาห้องค่าวแล้ว ขอหื้อขีดเขียน อย่าหื้อโฮงเฮียน เงียบเหงาดั๊กปิ้ง.

[เพลงซอ]

เหมือนเก็บค่าวซอ ไว้รอบนหิ้ง บางเตื่อลืมคิง หนีล่ะ

หรรษาน้องเหย อย่าเลยตุมละ มามะปากั๋น เข้ามา
เพลงซอว่างแล้ว ผ่องแผ้วหรรษา สรวลเสเฮฮา อู้จ๋ากำน้อย
ลุงเลื่อนป้อออน ขอวอนต่อถ้อย แล้วเหลียวมากอย สองนี้

มาจ่วยกั๋นจ๋า ปากั๋มาจี้ เรื่องหั้นเรื่องหนี้ เมืองเฮา
เก็บมาเล่าไว้ ยามใดเฮาเหงา เปี๋ยค่าวเก่าเฮา มาอ่านกั๋นได้

[หรรษา]

วันนี้ดีใจ๋ อ้ายป๊อบมาใกล้ ดั่งแสงเตียนไฟ จุดลุก

ค่าวซอกำจ๋า ฟื้นมาเป๋นปุ้ก สนุกขึ้นได้ ด้วยเฮา
ป้อเครือออนนั้น จะได้หายเหงา จ่วยกั๋นบรรเทา ฟื้นฟูขึ้นได้
ล้อเลื่อนลุงเหย ขยับมาใกล้ จ่วยจุดแสงไฟ เต๊อะครับ

หื้อสว่างไสว เรืองไรกระชับ ขยับมาใกล้ ม่วนงัน
ครื้นเครงค่าวจ๊อย คะค้อยตวยกั๋น เมื่อคืนเมื่อวัน อู้กั๋นก็ได้.

[เครือออน]

เจิญหมู่เฮาหนา เวียนมาไจ้ไจ้ อู้จ๋ากั๋นไป ผูกมิตร

เป๋นก่ำลังใจ๋ ก่ำไรจีวิต ลิขิตแต่งแต้ม เจิงบรรณ
เฝิกเขียนค่าวจ๊อย แต่งถ้อยผกผัน สัมผัสปวงปัน ฉันทลักษณ์ถ้อย
บ่ต้องหวังหลาย หมายเอาเตื้อหน้อย จักหายจากมอย เปล่งลึ้ง

เพลงซอหรรษา มาจ้วยกั๋นมึ้ง เกาะกั๋นหมั้นถึ้ง เครือออน
พูนอุดมไท้ หายจากห้องสอน หมู่เฮาขอวอน ครูย้อนมาแต้ม.

[หรรษา]

อุดมครูพูน ใบบุญแฉล้ม ขอเจิญมาแซม ค่าวจ๊อย

เหล่าศิษย์ตังหลาย วิงวอนเรียบร้อบ เจิญครูเขียนถ้อย ทักทาย
เปื่อเป๋นแฮงปลุก ศิษย์ค่าวตังหลาย หลั่งกั๋นมายาย ขยายต่อถ้อย
ล้อเลื่อนอยู่ไหน หายไปเหียจ้อย ลุงเคหายลอย บ่พบ

เฒ่าค่าวอาจ๋ารย์ วอนวานน้อมนบ บ่พบว่าอั้น เมินนาน
คิดถึงจ้าดนัก ทุกท่านอาจ๋ารย์ ขอไหว้วอนวาน มาขานสักหน้อย.

[เครือออน]

เมื่อก่อนเนืองนัน บันกลับหายจ้อย มาละฮ่องฮอย เอาไว้

รวมเถิงครูพูน อุดมท่านไท้ บ่ค่อยจักได้ เวียนมา
เหลือลุงเลื่อนล้อ เพลงซอหรรษา เครืออนแถมนา น้อยต๊ะอยู่เฝ้า
หมู่เฮาจ้าดหลาย ก๋ายไปบ่เข้า เปิ้นได้ยั้งเจา ก๋ารนัก

หากท่านตังหลาย สหายตี้ฮัก ว่างพักสักหน้อย จุ่งมา
กระดานค่าวนี้ ยังมีอยู่หนา ยังรอท่านมา อัตถาแต่งแต้ม.

[หรรษา]

มีเหล้าแดงสี บ่มีกับแกล้ม มิตรค่าวบ่แจม หนีละ

ห้องค่าวมีหลาย มากมายสัพป๊ะ หนีละกั๋นเสี้ยง หลายคน
มองพิมปี้ไท้ ลุงเคหายหน เฒ่าค่าวหน้ามน ครูพูนหายจ้อย
ไฉนละเสีย ทำนองร่ำถ้อย ปอบ่มากอย ปากตั้ก

หมู่เฮาตังหลาย กึ๊ดเติงจาดนัก หรืองานแวดเกี้ยว บ่ตัน
สบายก่อนั้น หมู่เฮาใคร่หัน จากเดือนเปลี่ยนวัน บ่หันมาเหยี้ยม.