รับสมัครนักเรีนค่าว รุ่นที่ 6 ปี 2552

[พูนอุดม.เวียงเขลางค์]

โรงเรียนค่าวพูนอุดม รับสมัครนักเรียนค่าวรุ่นที่ 6 ปีการศึกษา 2552

** วิธีสมัคร **
1.ส่งอีเมล์สมัครได้ที่ ta_udln13@hotmail.com
2.โทรศัพท์มาสมัครได้ที่เบอร์ 087 - 2619481
3.เรียนฟรี

** หลักสูตรที่เปิดสอน **
1.การแต่งค่าวชั้นต้น
2.การแต่งกะโลงชั้นต้น

** แหล่งค้นหาความรู้ **
http://www.khonmuang.com/poonudom

** คุณสมบัติของนักเรียน **
1.ชอบค่าวหรือกะโลง
2.มีความเชื่อมั่นว่า จะแต่งค่าวหรือกะโลงได้
3.ไม่จำกัดอายุ เพศ วุฒิการศึกษา

** การเรียน **
1. เรียนทางห้องสนทนาคนเมืองดอทคอม
2.ส่งค่าวทางอีเมล์

** การสอบ **
1.ส่งข้อสอบทางอีเมล์ ส่งได้ตลอดเวลา
2.แต่งค่าวอย่างน้อย 13 บท ( 38 บรรทัด ) หรือกะโลง 5 บท ( 20 บรรทัด )
3.ต้องสอบได้ 60 % ขึ้นไป ถือว่า สอบผ่านหลักสูตร

ลงชื่อ - ครูพูนอุดม เวียงเขลางค์
ครูใหญ่
8 เมษายน 2552

[พูนอุดม.เวียงเขลางค์]

รายชื่อนักเรียนที่เรียนจบหลักสูตร " นักค่าวชั้นต้น " รุ่นที่ 6 มี 3 คน คือ
1.หรรษา
2.หน้อยต๊ะเวียงต๋าน
3.ลุง ล้อเลื่อน

- ครูพูนอุดม เวียงเขลางค์
10 มีนาคม 2553

[เครือออน]

สรียินดี เจ้าพี่นายน้อง อันเกยขานถ้อง แห่งห้องค่าวสาส์น
จ๋นมาบัดนี้ มีสำเร็จก๋าร เขียนค่าวชำนาญ ผ่านเก๋ณฑ์ที่ตั้ง
หนึ่งนั้นหรรษา มาเตื่อมมาสร้าง เขียนค่าวมาวาง ตั๊ดนี้

หน้อยต๊ะเวียงต๋าน ชำนาญค่าวจี๊ มาเขียนที่หนี้ เมินนาน
ลุงล้อเลื่อนนั้น หมั่นมาขับขาน ตึงมื้อตึงวัน จึงผ่านเกณฑ์ข้อ
สามคนจบเก๋ณฑ์ พะเป๋นยี่ห้อ ขอยินดีโตย เน่อครับ

ยินดีปรีดา ข้าขอต้อนฮับ นับเป๋นรุ่นหั้น นิยม
รุ่นหกจบแล้ว ครูแก้วใจ๋สม ครูพูนอุดม คงสมใจ๋เจ้า.

[หน้อยต๊ะเวียงต๋าน]

ฮอมมะลิซ้อน ดอกเก็ดถะหวา ดอกมะลิลา นำมาต่อถ้อย
ฮอมฮ้อยมาลัย พวงใหญ่บ่น้อย ต๋ามฮีตแนวฮอย ก่อนไก๊

วางลงในขัน พร้อมมวลดอกไม้ ลำเตียนธูปเล่ม ปริวาร
แป้งเจิมตลับน้อย น้ำอบน้ำจั๋น หญ้าแพรกลาวัลย์ ดอกเข็มแดงส้ม
นำมาเรียงวาง น้อมนบกราบก้ม ป้อพูนอุดม ครูเก๊า

ม่อนขอวันตา ไหว้สาแทบเท้า ท่านป้อครูเฒ่า เขลางค์
ตั๋วข้าฯม่อนน้อย บ่ผ่อหน้าหลัง ใกล้เกลื๋อขนัง ไปกิ๋นด่างหั้น
ฟ้าบ่มีต๋า เหมือนม้าอ้ดกลั้น เหมือนไม้เถาวัลย์ เกี่ยวก๊อง

ฝึกเฮียนค่าวซอ ค่าวเครือค่าวฮ้อง ด้วยใจ๋อ่วงข้อง ก๋ารงาน
สอดเซาะหาซื้อ คู่มือค่าวสาร หัดแต่งคัดทาน มานานขวบเข้า
ด้วยใจ๋ฮักหม ค่าวพรหมมาเจ้า ตัดแต่งแป๋งเอา จ่องใจ๊

ครูพระลักจ๋ำ กำงามเก็บไว้ มาแต่งแป๋งได้ เรื่องราว
ผิดถูกก้อนัก เหมือนลักเมาสาว ผ่อต๋าแวววาว บ่มีกำอู้
หมั่นไปแอ่วหา ด้วยใจ๋ชอบสู้ หวังสาวเอ็นดู ฮู้ไว้

จึ่งฝึกเฮียนคอมฯ ฝึกเล่นเวปไซด์ ลำบากยากใบ้ แต้นอ
ดีใจ๋เจ้นล้ำ ทำได้แล้วบ๋อ ได้หันค่าวซอ ตี้ในเวปหั้น
มีตึงโฮงเฮียน สอนค่าวยาวสั้น ครูพูนอุดม ป้อจั้น

ตี้เป๋นแบบแผน ผังค่าวเก่านั้น สำเนียงลงขึ้น สามัญ
เสียงวรรณยุกต์ เอกโทตรีหวาน นอกในสัมพันธ์ กำต๋ายกำสั้น
เอาสามตั๋วเหลว เจ็ดเตวต๋ามขั้น ถือเป๋นต๋ำนาน เก่าเกื๊อ

ฝึกหัดเขียนไป แต่งได้เป๋นเนื้อ ด้วยใจ๋ใฝ่เอื้อ อาวร
ลองลงเวปไซด์ ค่าวไจค่าวกล๋อน ได้ป้อเครือออน เปิ้นจ้วยตอบถ้อง
ล้อเลื่อนหรรษา เฒ่าค่าวจื้อก้อง นักค่าวเพลงซอ ตอบตั๊ก

เมื่อพูนอุดม เปิดฮับสมัคร นักค่าวชั้นต้น ต่อมา
มีจื้อหน้อยต๊ะ ล้อเลื่อนหรรษา จบภาควิชา นักค่าวชั้นต้น
เกียร์ติบัตรศักดิ์ศรี ดีใจ๋ท่วมถ้น เหมือนมีแฮงดล ส่งยู้

เผียบหลักประกั๋น สาระความฮู้ ฝึกฝนต่อสู้ เมินนาน
ผังค่าวถือยึด เอาเป๋นหลักก๋าร ก่อนจะจำนรรจ์ รำพันค่าวสร้อย
ขอแต่งกล๋อนสาร จำนรรจ์บาทถ้อย ต๋ามฮีตแนวฮอย กราบนบ

พร้อมปริวาร สักก๋ารเคารพ ต่อป้อครูเฒ่า พูนอุดม
ก้มกราบแทบเท้า เหงยหน้าพะหนม หื้อป้อเจิมจม แป้งลงตี้หน้า
น้ำอบน้ำจั๋น ประพรมม่อนข้าฯ เหมือนแบบต๋ำฮา การยุทธ์
เผียบประดุจไป ได้ฮับอาวุธ ไว้คอยต่อสู้ พาลภัย
เผียบได้สวมเกาะ ห่อหุ้มร่างก๋าย พร้อมอาชาไนย คู่ใจ๋แกร่งกร้า
ออกไปเผชิญ อยู่ในแหล่งหล้า แผ่นฟ้าธารา มนุษย์

เผียบได้ฮับตร๋า ปริญญาวุฒิ ในบทบาทถ้อย ค่าวซอ
เก็บฮักษาไว้ สถิตในหอ บ่หื้อก้ดงอ บ่หื้อบิ่นบั้ง
จะแพร่ขยาย ค่าวในถิ่นตั้ง ท้องถิ่นชุมชน ถิ่นฮัก

พร้อมกั๋นฮักษา พร้อมอนุรักษ์ เครือค่าวเก่าเกื้อ ล้านนา
สืบสานกั๋นไว้ ไฝ่ใจ๋ศึกษา ทั่วถิ่นพารา กำจ๋าค่าวสร้อย
แบบเบ้าต๋ำฮา พรหมมาจ่องห้อย ต๋ามฮีตขีดฮอย เก่าเกื๊อ

หลิ่งน้อมสักก๋าร ต้านตี้เอื้อเฟื้อ เครือออนล้อเลื่อน เพลงซอ
หรรษาแหมนอ ขอจบค่าวสร้อย หน้อยต๊ะเวียงต๋านวางลงก่อนแลนาย.

[เครือออน]

หน้อยต๊ะเวียงต๋าน มาขานค่าวจ๊อย มายกบาทถ้อย เรียงร้อยเป๋นสาส์น
วันตาเคารพ นบครูอาจ๋ารย์ ด้วยจิตดวงมาลย์ เบิกบานคลี่อ้า
ประกาศสัจจั๋ง ดังไปทั่วหล้า หน้อยต๊ะวันตา ครูไท้

ครูพูนอุดม นิยมค่าวไซร้ หน้อยต๊ะน้อมไหว้ วันตา
ศิษย์ร่วมสำนัก มีตังหรรษา ล้อเลื่อนแถมนา ศิษยาร่วมห้อง
รุ่นหกเรื่องลือ ชื่อเสียงกึกก้อง สมใจ๋ใฝ่ปอง ครูไท้

ครูพูนอุดม จึงประกาศไว้ รุ่นหกสอบได้ สามคน
ยินดีโตยครับ นับเป๋นกุศล ได้แถมสามคน สืบสนค่าวสร้อย
รุ่นเจ็ดต่อไป คงหลายบ่หน้อย หมู่เฮาจักคอย ต้อนฮับ

วันนี้ขอลา ไปก่อนเนอครับ จักกลับมาอู้ แถมรา
อาจเป๋นวันนี้ วันพูกกาหา วันฮือก่อจา จักมาต่อถ้อย.

[พูนอุดม.เวียงเขลางค์]

ศิษย์มากราบนบ เคารพน้อมไท้ เข้ามากราบไหว้ ยอกรประสาน
ว่าในวันนี้ ในเวียกในก๋าน สืบสานต๋ำนาน ล้านนาค่าวสร้อย
ลูกศิษย์ตั้งใจ๋ แต่งได้บ่หน้อย แต่งค่าวฮอมปอย วันนี้

ป้อครูดีใจ๋ ขอจ๋ากล่าวชี้ ร่วมใจ๋เต๊อะเจ้า คำจาย
คนแต่งหน้อยล้ำ คนอ่านมีหลาย จะยะจะได จ่วยกั๋นสืบสร้าง
มีตึงเครือออน แวะมาเอ่ยอ้าง ก็ตึงยินดี แต๊นั้น

หัวใจ๋ค่าวซอ ตึงมีหลายจั๊น ฮ่วมกั๋นสืบสร้าง กั๋นไป
อันค่าวซอนั้น เดินทางแหมไกล๋ แต่งค่าวซอใย ไปกั๋นหล้องหล้อง
คนเมืองล้านนา แวะมาผ่อจ้อง คนเก่งคนใด แต่งไว้

ท่านพญาพรหม ครูเอกท่านไท้ ตั๋วท่านได้สร้าง ต๋ำรา
อันค่าวสี่บท แบบเบ้านั้นหนา ถือเป๋นต๋ำรา การเฮียนค่าวสร้อย
ครูพักลักจ๋ำ เตื้อเล็กเตื้อหน้อย ค่อยก้าวหน้าไป แต๊ตั๊ก

จ่วยกั๋นสืบสาน ของดีของมัก แต่งต่อสืบถ้อย เนอนาย
จบค่าวซอใย ลาไปมอกอี้ เต้านี้ขอวางลง ก่อนแหล่นายเหย

[เครือออน]

ครูแวะมาหา มาจ๋าค่าวจ๊อย มาตั๊กศิษย์หน้อย ด้วยถ้อยภาษา
เครือออนม่อนนี้ ยินดีแต๊หนา ที่ครูได้มา อู้จ๋าค่าวสร้อย
เมินเมินมาไจ แต่ได้รสถ้อย ยะหื้อเอนจอย เจ้นล้ำ

ม่วนอกม่วนใจ๋ ครูได้มาย้ำ หื้อศิษย์ทั่วก้ำ ฮ่วมแฮง
สืบสานค่าวจ๊อย แต่งถ้อยแถลง ช่วยกั๋นจัดแจง แต่งค่าวสืบสร้าง
คงอยู่ยืนไป ต๋ามใจ๋ใฝ่อ้าง อย่าได้ละวาง ว่างเว้น

เหล่าศิษย์ตังหลาย จุ่งใจ๋ใส่เน้น ช่วยกั๋นสืบเส้น ค่าวซอ
ช่วยกั๋นสืบไว้ ต๋ามไท้ครูขอ ช่วยกั๋นเต๊อะนอ ม่อนขอเสริมถ้อย
เฮามาช่วยกั๋น แต่งวันละหน้อย ต่อถ้อยกั๋นไป เป๋นวรรค

พี่ฮู้สอง น้องฮู้บ่นัก มาตั๊กตอบถ้อย กั๋นไป
ยิ่งเขียนยิ่งฮู้ ยิ่งอู้ยิ่งไข จุ้วันเมินไป จักได้เก่งถ้อย
หากบ่ช่วยกั๋น สักวันจักจ้อย ค่าวสร้อยของเฮา อาจเมี้ยน

ช่วยกั๋นเต๊อะนา อย่าหื้อได้เพี้ยน ช่วยเวียนค่าวสร้อย คืนคง
จักเขียนไปนัก ม่อนชักเลอะหลง จำเป๋นต้องปลง จบลงเท่าอี้.

[หรรษา]

สิบนิ้วไหว้สา วันตาน้อมนบ ด้วยความเคารพ ครูพูนอาจ๋ารย์
มาเขียนค่าวจ๊อย แต่งถ้อยเป๋นสาส์น ซึ้งใจ๋ดวงมาลย์ ปายในม่อนข้า
ครูพูนเอ่ยขาน ต่ำนานอยู่ถ้า ศิษย์รุ่นหกนา จบแล้ว

สามคนตวยกั๋น บ่กลากล้าดแกล๊ว สะหรีผ่องแผ้ว ยินดี
สาธุสาธุ ไหว้สาดีหลี ครูพูนเมธี อุดมป้อเจ้า
ศิษย์น้อยหรรษา สุขขาบ่เศร้า เป๋นศิษย์สำเนา ค่าวจ๊อย

ชั้นต้นผ่านเก๋ณฑ์ รุ่นหกเรียบร้อย ศิษย์ขอสืบถ้อย ซอใย
จะฮักษาไว้ สืบสานด้วยใจ๋ ค่าวล้านนาไทย ฟื้นฟูเสพสร้าง
จะฮ่วมฮักษา ต๋ามกำกล่าวอ้าง บ่หื้อเลือนลาง หลีกค้อย

นักค่าวเมืองเหนือ หลอเหลือมีน้อย ขอสาส์นสืบถ้อย ยาวไป
วันนี้ม่อนน้อย มาแสนดีใจ๋ จบค่าวซอใย รุ่นนี้ต๋ามอ้าง
ขอบคุณบ่สูญ ครูพูนสอนสร้าง นักค่าวฮีมตาง ม่อนนี้

ม่อนขอไหว้สา วันตาบ่ลี้ กราบครูอยู่หนี้ อุดม
ขอบุญจ่วยก๊ำ หื้อครูพูนสุขสม เจตนารมณ์ สมใจ๋กู่ด้าน
หื้อครูเป๋นศรี สะหรีคู่บ้าน เป๋นฮ่มโพธิ์ญาณ ค่าวจ๊อย

ศิษย์หน้อยหรรษา วันตาเรียบร้อย ยังครูค่าวถ้อย อุดม
ขอบุญจ่วยก๊ำ เตื่อมซ้ำสุขสม ครูพูนอุดม สุขสมเน้อเจ้า.

[เครือออน]

ฟังเนอรา อาวอาพี่ไท้ เครือออนจักได้ ขับไขภาษา
ค่าวกะโลงนั้น ป๋างบรรพ์นั้นหนา แต่ก่อนเดิมมา ล้านนาแบบเบ้า
ครูบาอาจ๋ารย์ ท่านเป๋นตุ๊เจ้า คนเถ้าชรา ถาไว้

สอนศิษย์ลูกหลาน แต่งบรรณจื่อใจ๊ เอ่ยอู้กั๋นได้ จายญิง
อู้จีบอู้เต๊าะ ตั๋วป้อตั๋วหญิง เพื่อหวังแอบอิง ญิงจายคู่ข้าง
จ๋ารเป๋นต๋ำนาน ขับขานแต่งสร้าง เรื่องราวบ่าวนาง ม่วนเพราะ

นิยายนิทาน ต๋ำนานโชคเคราะห์ เจาะคำสอนหั้น พุทธา
กะโลงค่าวจ๊อย เป๋นสร้อยอัตถา แต่เก่าเมินมา ล้านนาแห่งห้อง
บัดนี้สมัย ใผใผบ่ข้อง ลูกหลานบ่ปอง เฮียนฮักษ์

ตุ๊เจ้าวัดวา นานาสำนัก จักสอนเฮียนหั้น บ่มี
วงก๋ารค่าวจ๊อย มันด้อยเมธี๋ ที่เหลือก็มี บ่กี่คนเจ้า
แต่ก็ยังดี มีครูแบบเบ้า พูนอุดมเฮา คนนี้

เปิดสอนโฮงเฮียน มาเปียรบอกจี๊ บอร์ดค่าวที่หนี้ กระดาน
ยินดียิ่งแล้ว ครูแก้วอาจ๋ารย์ สืนสอนต๋ำนาน โบราณค่าวสร้อย
ลูกสิกข์ตังหลาย ญิงจายใหญ่หน้อย มาร้อยมาเรียง แต่งคัด

ลางก็ฝึกฝน ลางคนเร่งรัด เอาต๋ามถนัด ใผมัน
โมทนาไว้ ในหล้าเขตขันธ์ รุ่งเรืองอนันต์ เนอท่านครูเจ้า
ปรารถนาใด ที่ได้ใฝ่เฝ้า ขอสำเร็จเอา ต๋ามกึ๊ด

จักอู้ไปยาว ฮ้อนอ้าววึดวึด กำกึ๊ดสุดเสี้ยง เจตน์จง
ขอจบลง คงไว้เท่าอี้ เท่านี้ขอลาไป ก่อนแลนายเหย.

[หรรษา]

ก๋าละสมัย เมืองไทยเดี๋ยวนี้ วุ่นวายป่นปี้ โก๋ลาสับสน
ฮีดเก่านาล้าน ตั่วบ้านหายหน เพราะเขียมยังคน สืบสานต่อถ้อย
ตังสงฆ์แลเถร องค์เณรพระหน้อย ก็เริ่มจอยวอย ห่างละ

ตะก่อนหลัง คนยังเปิ่งปะ ฝึกเขียนอ่านแต้ม โฮงเฮียน
ในวัดก่อนนั้น ฝึกหั้นอ่านเขียน พระสงฆ์องค์เณร สอนเขียนอ่านแต้ม
ตั๋วเมืองสอนกั๋น ตึงวันนั่งแอ้ม กุเจ๊าถึงแลง ซ้าวๆ

แถมยังม่วนกั๋น ตึงวันโน้มน้าว เล่าค่าวเรื่องสั้น ในธรรม
แต่สมัยนี้ ไผบ่ยุบก๋ำ ค่าวสานในธรรม วางตำเหียจ้อย
จักหาอ่านเขียน บากเย็นบ่หน้อย วัดตี่สอนฮอย ก่อนนั้น

โฮงเฮียนสืบสาน ต่ำนานเป๋นจั๊น หายากว่าอั้น แต๊นา
แต่ยังบ่เมี้ยน โฮงเฮียนภาษา แต่งค่าวล้านนา ยังมีอยู่หนี้
ครูพูนอุดม ใจ๋จมก่อนกี้ เป๋นยอดครูดี บ่น้อย

ต่านได้เปิดสอน โฮงเฮียนค่าวจ๊อย กะโลงสืบถ้อย นานา
โจ้คดีเฮาแล้ว ปี้แก้วน้องจ๋า ปากั๋นเข้ามา ฝึกเขียนอ่านถ้อง
สนทนากั๋น ตึงวันในห้อง มีครูช่ำชอง คอยแนะ

มันม่วนแต๊นา ขอเข้ามาแวะ มาไขม่วนถ้อง เฮฮา
มาเต๊อะแห่งนี้ ล้วนเป๋นภาษา กำเมืองล้านนา รอต่านมาต้าน
เจิญมาสืบสาน ต่ำนานปื๊นบ้าน ค่าวสานโบราณ ก๊อนไก๊

โฮงเฮียนครูพูน อุดมนั่งไป๊ ท่านไท้ตั่วบ้าน ธานี
มาเฮียนกั๋นเต๊อะ ขออย่าหลบหนี ครูยอดเมธี ใจ๋ดีอยู่ถ้า
ป้อลุงอาวอา อี่น้าอี่ป้า จุงแขนกั๋นมา ตอบตั้ก

ละอ่อนเด็กขา เจิญแวะมาพัก ส่ำนักแห่งห้อง ครูพูน
อย่าหื้อห่างร้าง โบราณหายสูน มาจ่วยเพิ่มพูน อุดหนุนเตื่อมแถ้ง
อย่าหื้อค่าวสาน ต่ำนานเหือดแห้ง มาจ่วยกั๋นแยง พ่องเต๊อะ

ม่อนมาเขียนจ๋า ลายต๋าปอเลอะ ยั้งเต๊อะเสียงเอิ้น เข้ามา
เลยลวดอำลา เจี๋ยรจ๋ามอดอี้ พรุ่งนี้ก่อยมาไจ ก่อนเนอเจ้าเฮย..

[เครือออน]

เมื่อแลงของวัน ที่สามเดือนพฤษ- ษะภาคมหล้า สองห้าห้าสาม
เครือออนข้าน้อย ได้ไปนั่งผาม ในวัดอาราม บ้านเหล่าที่หั้น
อำเภอแม่ออน บ่ไกล๋จากบ้าน ตุ๊เจ้าเปิ้นวาน ช่วยยะ

ทำแผนโครงก๋าร ช่วยงานสังฆะ จัดอาวาสหั้น ศูนย์เฮียน
เอาเด็กอ่อนน้อย มาร้อยขีดเขียน จัดศูนย์ก๋ารเฮียน เวียนทุกสัปด์หั้น
จัดภูมิปั๋ญญา ชราว่าอั้น มาสอนทุกวัน อาทิตย์

จักสานป้านแป๋ง ต้มแก๋งสาธิต แนวเศรษฐกิจ พอเพียง
ซอซึงสะล้อ ค่าวซออื่อเสียง ล้วนคืนสำเนียง เวียงล้านนาห้อง
เขียนอ่านตั๋วเมือง เป๋นเรื่องถูกต้อง หื้อลงทำนอง ค่าวจ๊อย

ได้ สสส. มาก่อมาฮ้อย หื้อฟื้นเทื่อหน้อย สืบไป
เข้าวัดวันทิตย์ หื้อจิตแจ่มใส เด็กล้านนาไทย จักได้สืบสร้าง
เครือออนดีใจ๋ จักได้ดาห้าง วางเป๋นแนวตาง ส่งย้น

เอาของดีคืน มาฟื้นมาค้น มาตั้งเป๋นต้น สืบฮอย
หนึ่งคือค่าวนั้น จักปั้นบ่ถอย เมินแล้วที่คอย หาฮอยสืบสร้าง
จักสอนลูกหลาน หื้อมันแผ่กว้าง มีแล้วหนตาง บอกจี๊

โอกาสมาแผว เปิดแล้วคราวนี้ ต้องจี้หื้อตั้ง โฮงเฮียน
สอนกั๋นในวัด ฝึกหัดขีดเขียน ทุกทิตย์หมุนเวียน เปียรกั๋นแต่งถ้อย
หนึ่งปี๋ต๋ามหมาย คงได้บ่หน้อย ค่าวจ๊อยคงคืน ฟื้นปิ๊ก

เจ็ดวันเวียนมา ป้ะกั๋นทุกวิค ลูกสิกข์คงได้ ชำนาญ
หากเถิงวันนั้น จักปามาจ๋าร ค่าวสร้อยกระดาน ป๊ะกั๋นที่หนี้
วันนี้ขอจร ไปก่อนเท่าอี้ ขอสวัสดี ก่อนครับ

ยอมือไหว้สาธุ์ วันตาคำนับ วันหน้าจักกลับ มาไจ
ค่าวซอใย ปล๋งไว้เท่าอี้ เท่านี้ขอวางลง ก่อนแลนายเหย.

[หรรษา]

ยอหัตถา วันตาสาธุ ต๋ามแผนทะลุ บรรจุค่าวสาร
เครือออนป้อนั้น เจื่องจั๊นไขขาน ได้สืบต่ำนาน เมืองเหนือเขตห้อง
เป๋นเรื่องภูมิใจ๋ ปายในลั่นป้อง สุดแสนเรืองรอง สง้า

ของดีเมืองเหนือ หลอเหลือเนิ่นจ๊า ค้นคว้าคืนได้ ฟื้นฟู
เครือออนเป๋นเก๊า ตุ๊เจ้ามุตู๋ เอาเด็กมาจู วันติ๊ดว่าอั้น
สืบสายลายเผือ ค่าวเครือบ่กลั้น เลือกเฮียนเอาพลัน ต๋ามมัก

สะซ้อเสียงหวาน ขับขานพร้อมพักต์ สมัครกั๋นได้ กุคน
สอนตั้งแต่เก๊า เฮียนกั๋นเอาจ๋น หื้อทั่วทุกคน ตี่สนใจ๋หั้น
เรื่องของเหนือๆ บ่เหลืออยากกลั้น มาพร้อมจำนรร ใคว่ครบ

วันติ๊ดป๊ะกั๋น เลือกวันนัดพบ บรรจบหนึ่งหั้น เป๋นไป
ตั๋วเมืองมีพร้อม ฝึกซ้อมด้วยใจ๋ ไผสนเรื่องใด ต๋ามใจ๋ใฝ่สู้
อย่าได้เขินอาย เนอนายอุดอู้ ปากั๋นเฮียนดู เต๊อะครับ

โอกาสอันดี นั้นมีมาฮับ รีบจับใส่เกล้า ไวไว
ป้อเครือออนนั้น สอนหั้นจากใจ๋ โอกาสจาวไทย ล้านนาแห่งห้อง
จุ๋งแขนลูกหลาน สืนสานเล่าถ้อง ของดีจามลอง กั๋นเต๊อะ

สมัครศึกษา อย่าได้เขินเคอะ เติ้กเมอะนั่งแอ้ม ไวไว
ข่าวดีแต๊ๆ ล้านนาสดใส จะฟื้นเร็วไว จากใจ๋ครูเจ้า
สาธุยินดี เครือออนหน่อเหน้า สืบสานสำเนา พลิกฟื้น

สมเจตนา ล้านนาลุ่มปื๊น ถั่งขึ้นรุ่งแจ้ง บานงาม
ทั่วทุกเขตคาม หื้องามงอกขึ้น สืบปั๊กกะตืน กั๋นเต๊อะนายเฮย............

[เครือออน]

ฟังเนอรา จักจ๋าหื้อฮู้ ต๋ามที่เกยอู้ เกยฟู่เกยจ๋า
ว่าจุ้วันติ๊ษย์ มีศิษย์เศิกษา ตั๋วเมืองล้านนา ภาษาค่าวสร้อย
ลูกสิกข์ตังหลาย ตึงใหญ่ตึงหน้อย เปิ้นมาลองกอย หลายติ๊ษย์

ลางคนก็มา อู้จ๋าเจิงมิตร ลางคนก็คิด ลองครู
ครูบาเป๋นเก๊า ข้าเจ้าไถถู ปล๋าปล๋างูงู ปอสู้เขาได้
ติ๊ษย์แรกมีคน มากล้นแต๊ใบ้ หลายติ๊ษย์เมินไป บ่นัก

แต่ก็ยังดี ยังมีคนฮัก สมัครเตื่อมเข้า เนืองเนือง
เปิงดีเนอไซร้ แก๋งไก่ใส่เขือง ตั๋วเมืองเฮียนไป ใจ๊เขียนค่าวสร้อย
พระเณรขยับ มาขับค่าวสร้อย มาฟื้นฮีตฮอย อักขระ

ได้แทรกได้เสริม เพิ่มเติมธัมมะ ในบทค่าวสร้อย ตั๋วเมือง
คงรุ่งเรือง เฟื่องขึ้นเทื่อหน้อย ค่าวจ๊อยตั๋วเมืองงาม ฮ่ามแล้วนายเหย.

[หรรษา]

กล๋อนกำจ๋า หรรษาม่อนน้อย ขีดเขียนค่าวสร้อย กำซอโวหาร
มันบ่ปอลึก หยั่งถึงรากฐาน มอกปอก้มกาน มอกอ่านแต่งได้
จะหื้อมันเหมือน เขาแต๊บ่ได้ ย้อนปัญญาใน อ่อนฮู้

วันนี้มาหัน สำคัญกระทู้ ป้อหนานกล่าวอู้ หื้อฟัง
หรรษาม่อนนี้ ยังมีความหวัง ใคร่เพิ่มพลัง หื้อกับค่าวสร้อย
ถ้าอยู่ใกล้กั๋น หนึ่งวันอ้อยหล้อย จะไปเอ็นจอย ตวยแต๊

วันติ๊ดแถมหนา บ่มีข้อแม้ ฝึกสอนอ่านแก้ ค่าวซอ
ในใจ๋ม่อนนี้ เป๋นดีใคร่ขอ สมัครเฮียนซอ กับเครือออนเจ้า
แต่นี้อยู่ไกล๋ บ่จ่างต่องเต้า บ่จ่างไปเมา ถิ่นนั้น

เสียดายนักหนา หรรษาน้องจั๊น ถ้ามอกใกล้บ้าน ยังแควน
จะไปเฮียนแต๊ คงบ่หวงแหน แต่นี้ไกล๋แดน บ่ใจ่ของหน้อย
ขอป้อเครือออน จ่วยสอนเณรหน้อย ละอ่อนฟื้นฮอย เต๊อะครับ

หลานจายหรรษา ขอสาคำนับ สำหรับป้อเจ้า ออนเครือ
หื้อพลันสำเร็จ ต๋ามใจ๋แห่งเขือ สืบสายลายเครือ กวีค่าวสร้อย
หื้อมันรุ่งเรือง กล้าแข็งบ่ด้อย ฟื้นฟูสืบฮอย อย่ายั้ง

สมเจตจำนงค์ คืนคงอย่าพลั้ง ชนะเป๋นตั้ง เต๊อะนา
ขอโมทนา ไหว้สาป้อเจ้า สำเร็จแล้วเอา ชนะมาต้อนเต๊อะเนอ

[เครือออน]

ต๋ามเจตน์จ๋ง จำนงตั้งไว้ ก็คงจะได้ ไปต๋ามผะสงค์
วันติ๊ษย์เนอไซร้ บ่ได้ลืมหลง เด็กหน้อยก็คง เด็กโข้งก็เข้า
ลูกสิกข์บ่ถอย พระหน้อยตุ๊เจ้า ก็เข้ามาเฮียน คึกคัก

พระครูจั๋นทะ รังษีพิทักษ์ เจ้าของสำนัก จื้นจม
เมื่อสอนเสร็จแล้ว ก็แจกเข้าหนม ลูกกวาดลูกอม ผสมเฮียนเหล้น
เอาสังฆทาน ออกบัตรออกเส้น ล่ะอ่อนพระเณร ม่วนทึด

คงมีต่อไป ต๋ามใจ๋ตี้กึ๊ด ใผคงบ่ตึ้ด ตางไป
ตั๋วเมืองค่าวจ๊อย เปล่งป้อยสดใส คงรุ่งเรืองไร ต่อไปตางหน้า
ตี๋กล๋องปู๋จา อันนี้ตั้งถ้า จักยะอยู่นา ทุกวัด

ซาวสี่นี้หนา มิถุนานัด พฤหัสแม่นหมั้น วันครู
จักขอยอไท้ กราบไหว้พหู จักขอยกครู เฮียนฮู้ฟาดแส้
ตี๋กล๋องหนักเบา ผิดเอาใหม่แก้ ก๊องสว่าปี่แน เฝิกพร้อม

วันติ๊ษย์ต่อไป จักได้รายล้อม พร้อมกล๋องค่าวสร้อย ตั๋วเมือง
เข้าวัดวันติ๊ษย์ เป๋นศิษย์ผ้าเหลือง จุ้ติ๊ษย์เนืองเนือง รุ่งเรืองปายหน้า
จักอู้ไปยาว เขาจักว่าบ้า จึงขออำลา เน่อครับ

ยอมือสาธุ์ วันตาคำนับ ระงับค่าวสร้อย สุดลง
ขอปักธง จบลงเต้าอี้ เต้านี้ขอลาไป ก่อนแลนายเหย.

[หรรษา]

กล๋องปู่จา ดังมาทึกทึก ใจ๋เต้นปึกปึก คึกคักแต๊หนา
ไม้แส้ฟาดตุ้บ ลีลานั้นหนา เสียงกล๋องปู่จา ระทึกม่วนถ้อง
ทำนองหลากลาย มากมายม่วนต้อง ล่องน่านทำนอง อาละ

หลับเต๊อะสาวเหย ออกเป๋นจังหวะ ตึ่งป๊ะตึ่งโป้ง แซะมง
และเสือขบตุ๊ ดังไปตังโขง ผสมเข้าวง ฆ้องมองฟ้อนเหล้น
ตะก่อนหรรษา ก็เกยตื่นเต้น ฝึกตี๋ยามเย็น ตี่วัด

ม่วนงันเหลือหลาย ยังยายเบียดยัด หลู่พลัดกั๋นวาด ลีลา
นึกสมัยนั้น เป๋นดีสุขขา เดี๋ยวนี้วางลา ยั้งไปแล้วเจ้า
ป้ออุ๊ยผู้สอน ก็แก่ก็เฒ่า เลยยั้งพักเซา ละไว้

เสียดายเหลือเกิ๋น ยั้งเมินแต๊ไซร้ บ่ได้ต่อส้น สืบมา
ได้ยินป้อไท้ เครือออนมาจ๋า เรื่องกล๋องปู่จา นั้นนาตะกี้
ว่าป้อได้สอน ละอ่อนดั่งอี้ เป๋นเรื่องตี่ดี แน่นัก

เสียงกล๋องปู่จา จักได้คึกคัก แก่เด็กแห่งห้อง ล้านนา
หรรษาหลานน้อย ขอไหว้ยอสา ขอโมทนา กับตั๋วป้อเจ้า
ตี่จ่วยสืบสาน ต่ำนานเก๊าเหง้า วัฒนธรรมเฮา พลิกฟื้น

อยู่คู่แดนเหนือ สายเครือลุ่มปื๊น แพร่ขยายขึ้น ล้านนา
ขอโมทนา สาธุป้อเจ้า เขียนจ๋าสำเนา มอกอี้ก่อนเนอ ป้อเฮย.

[เครือออน]

กล๋องปู่จา เป๋นมาฮีตเก๊า ก๋าวิละเจ้า เอาจากเจียงตุ๋ง
เก็บผักใส่ซ้า เก็บข้าใส่ฝูง เจียงใหม่จำรุง รุ่งเรืองเปล่งป้อย
วัฒนธรรม นำมาบ่หน้อย ค่าวจ๊อยตั๋วเมือง สัปป๊ะ

ตี๋กล๋องปู่จา วันโกนวันพระ ก๋าวิละเจ้า เอามา
มอบหื้อสังฆะ พระศาสนา มีกล๋องปู่จา ทุกอารามเจ้า
เพื่อตี๋ปู่จา พุทธาเหนือเกล้า เลยเป๋นฮีตเฮา นาล้าน

จังหวะตี๋กล๋อง เสียงก้องสะต๊าน มีหลายแบบอั้น เป๋นเพลง
"เสือขบตุ๊" ฟังดูก็เจ๋ง เพลงกล๋องบรรเลง ครื้นเครงม่วนเหล้น
"ล่องน่าน"ก็มี ตึงตี๋ตึงเต้น ศรัทธาพระเณร เป่อเลอะ

ฟังชื่อแล้วหนาว เพลง"สาวหลับเต๊อะ" เมอะกล๋องใหญ่หน้อย ตี๋ไป
"สุดธรรม"เพลงนั้น สนั่นหวั่นไหว เทศน์ธรรมจบไป ลงไม้ลงแส้
สืบกั๋นเมินมา ศรัทธาหมั้นแต้ ลางตี้ใส่แน ฉาบก๊อง

คนเก่าปล่อยหาย คนใหม่บ่ป๊อง กล๋องปู๋จาหั้น จึงวาย
มาบัดเดี๋ยวนี้ มีคนสนใจ๋ เฝิกตี๋ลวดลาย กล๋องใหญ่กล๋องหน้อย
เฮาได้ครูดี คือตุ๊ปี้ต้อย จันต๊ะรังษี พิทักษ์

เจ้าอาวาส วัดเหล่าสำนัก ท่านฮักฮีตบ้าน ล้านนา
พระครูเป๋นเก๊า สอนเหล่าสิกขา ถูกต้องต๋ำฮา กล๋องปู่จาหั้น
คาดไว้เลยหนา เวลาอั้นสั้น จะฟื้นหื้อมัน คึกครื้น

น้อมขอพุทธา เทวาจ้วยฟื้น ครูจ้วยยกขึ้น คืนมา
เครือออนม่อนนี้ ยินดีสิกขา ยินดีจักมา จ้วยครูบาต้อย
ตึงสอนตึงเฮียน เปียรวันละหน้อย คงหายจากมอย เปล่งยัวะ

เขียนไปยาวไป บ่ไหวแล้วนะ อวสานได้ แล้วเฮย
ดอกปูเลย กลิ่นเหยกิ๋นได้ หน่อไม้ยำกับแล ลำแต๊นายเหย.

[หรรษา]

ตี๋กล๋องปู่จา นั้นนาม่วนแต๊ ก๋ำเอาไม้แส้ ฟาดตุ้บหน้ากล๋อง
จังหวะคึกคัก ม่วนนักตังผอง ผสมฆ้องมอง เข้าวงม่วนเหล้น
พระครูจั๋นต๊ะ- รังษีขีดเส้น เปิดสอนก๋ารเฮียน เรื่องนั้น

ครูบาต้อยสอน เครือออนป้อจั๊น เป๋นผู้ปู๋ขั้น แนวตาง
หื้อเด็กอ่อนน้อย ฝึกกั๋นบ่จ๋าง ฮ่วมกั๋นบ่วาง ธุระเรื่องหั้น
เป๋นก๋ารสืบสาน ต่ำนานว่าอั้น กล๋องปู่จานัน ระทึก

เภรีเมืองเหนือ จุนเจือคักคึก ปลูกฝังสำนึก มโน
หยั่งฝังเข้าลึก เด็กอ่อนวัยโก๋ เริ่มตั้งนะโม สืบสานแต่หนี้
ฮีดฮอยเมืองเหนือ หลอเหลือดั่งอี้ เป๋นเรื่องยินดี สาธุ

ขอหื้อความฝัน ได้มุทะลุ สมจิตเจตเอื้อ จำนงค์
เครือออนป้อไท้ หื้อสมผะสงค์ ฟื้นฟูคืนคง ดำรงค์อยู่ได้
พระครูจั๋นต๊ะ รังษีตี่ไหว้ เป๋นฮ่มโพธิ์ไทร แผ่ปื๊น

หื้อฮีดเมืองเหนือ ลายเครือพลิกฟื้น ทะลุถั่งขึ้น รุ่งเรือง
อยู่คู่กับเมือง ล้านนาแห่งห้อง ขอแจมทำนอง มอกอี้ก่อนแล เอวัง