7 กรกฎาคม 2552 ครบรอบ 5 ปี โรงเรียนค่าวพูนอุดม

[เครือออน]

ค่อยห่อมหายไป ต๋ามวัยคนเถ้า จากหนักเป๋นเบา ผ่อนคล้อย

แม่อุ๊ยบุญมี ทีฆายุร้อย ปล๋ายแถมบ่หน้อย ยืนยาว
ต่อแต่นี้ไซร้ อย่าไข้อย่าหนาว อายุยืนยาว ร้อยซาวขวบขึ้น
เป๋นร่มโพธิ์บาล ลูกหลานตั๋นตื้น สุขสันต์วันคืน เตี้ยงเต๊า

ขอเทพเทวา พุทธาเป๋นเก๊า ฮักษาแม่เถ้า บุญมี
หื้อป๊นจากตุ๊กข์ เถิงสุขดีหลี โภคะมากมี ทีฆายุหมั้น.

[ล้อเลื่อน]

มีใจ๋เข้มแข็ง มีแฮงต่อต้าน ผ่านพ้นภัยพาล โรคะ

โรคภัยทั้งผอง อุ๊ยต้องชนะ ทีฆายุหมั้น ขวัญยืน
อัญเชิญเทวะ ทั่วทั้งแผ่นผืน ช่วยเร่งวันคืน หื้ออุ๊ยหายไข้
หลานจายหรรษา หมั่นมาอยู่ใกล้ ขอโมทนา สาธุ

ล้อเลื่อนไถล ใจ๋มุทะลุ ได้หายห่างห้อง ไปเมิน
เข้ามาวันนี้ เป๋นดีอายเขิน กลั๋วเป๋นส่วนเกิน เชิญออกนอกห้อง

[เครือออน]

ลุงล้อเลื่อนเหย มาเลยบ่ต้อง มาทำเป๋นมอง เหลิกเมิ้น

มันน่าสงสาร ละกระดานเคิ้น ใผบ่มาเอิ้น มาไจ
หลายเดือนเลื่อนล้อ เจ้าป้อไปไหน อะไรทำไม ฤๅใผจ่องห้อย
มีคนหึงหวง เมียหลวงฤๅหน้อย ฤๅว่าเริงปอย สรงน้ำ

ไปขาบที่ไหน ห่างไกล๋เจ้นล้ำ โตยหาจุ้ก้ำ จุ้ปาย
ปิ๊กมาดีแล้ว อย่าแคล้วหนีหาย นัดกั๋นเนอจาย นัดหมายตี้หนี้.

[ล้อเลื่อน]

ยอมฮับตี้หาย เพราะใจ๋ป่นปี้ พบสิ่งบ่ดี นักล้ำ

คนไทยตังหลาย หัวใจ๋บอบช้ำ เมื่อหันข่าวหน้า ทีวี
สำหรับเลื่อนล้อ นั้นบ่เลือกสี หันข่าวนั้นมี แต่เรื่องหม่นเศร้า
ภาพข่าวน่ากลั๋ว ยกหัวทุนเกล้า ใจ๋มันบ่เลา เสียแล้ว

ใจ๋มันผันผก เหมือนนกถูกแฮ้ว กะแด่วกะแด้ว ซวนเซ
กึ๊ดเขียนค่าวนั้น หมองมันผัยเผ จิตใจ๋รวนเร กึ๊ดหยังบ่ได้

[เครือออน]

เหตุก๋ารณ์เมืองไทย คลี่คลายไจ้ไจ้ ตั้งแต่นี้ไป คงพร้อม

หมู่เฮาตังหลาย จักได้นั่งล้อม ตกวงนั่งอ้อม จู๋จา
กระดานค่าวนี้ เป๋นตี้อู้จ๋า ฝูงหมู่บรรดา เมธาค่าวสร้อย
บ่ต้องอ่วงหลาย หมายวันละหน้อย ค่าวสร้อยค่าวซอ ค่าวไจ๊

มาจ้วยฮักษ์เอา ฮีตเก่าเนาไว้ บ่หื้อมันได้ หงิกงอ
เรื่องก๋ารเมืองนั้น ปล่อยมันเต๊อะหนอ หนตางยังปอ เป๋นต่อหน้อยหน้อย.

[หรรษา]

โอกาสเจี๋ยรจ๋า พรรณาค่าวสร้อย แวะมาต๋ามฮอย แหมแล้ว

ว่างเว้นจากก๋าร บ่กลากล้าดแกล๊ว จิตใจผ่องแผ้ว รีบมา
เอากำมาตั้ก เฮฮาหรรษา หมู่จุมเรารา นักค่าวห้องหนี้
บ่ใจ้แสร้งเขียน แวะเวียนจู้จี้ ช่วงนี้งานดี รีบคว้า

น้ำขึ้นล้นหลาย มากมายบ่จ๊า รีบคว้าก่อนหั้น ลอยไป
วันนี้ว่างแล้ว จึงเอาหัวใจ๋ ห้วงหรทัย มาไจยหมู่เจ้า.

[เพลงซอ]

ยินดีหรรษา นายได้มาเข้า อยุ่กับหมู่เฮา ห้องนี้

น้ำขึ้นล้นหลาย นายได้กล่าวจี้ รายได้คงดี เงินตรา
เศรษฐีแล้วน้อง เตียวต่องมาหา นายว่างแล้วกา เลยมาแอ่วเหล้น
ห้องค่าวเงียบเหงา เขาบ่มาเต้น หลายคนเอียงเอน พักยั้ง

เช่นอ้ายเพลงซอ ก็ขอหลายครั้ง ได้ก่ะกล่าวอ้าง บอกมา
ตั้งแต่บัดนี้ บ่มีปัญหา จักเริ่มได้มา ตึงวันแล้วเจ้า

[หรรษา]

แต๊กาอ้ายเหย ลงเอยอยู่เฝ้า ว่างแล้วหมู่เฮา พร้อมพัก

เสร็จเมี้ยนจากก๋าร ลางานวุ่นนัก มาตั้กอยู่ห้อง กระดาน
สำนักค่าวจ๊อย ตึงน้อยตึงหนาน ปากั๋นสำฮาน กระดานค่าวก้อม
มีจ๊อนตักแก๋ง และมีจ๊อนส้อม ขนขวายมาฮอม ฟูมฟัก

หมู่เฮาสหาย บ่คลายสำนัก ศิษย์ฮักแห่งเจ้า ครูพูน
ว่างแล้วมาตัก ค่าวฮักอุดหนุน เปื่อหื้อจำรูญ เพิ่มพูนปายหน้า.

[เครือออน]

เพลงซอหรรษา พร้อมกับตั๋วข้า ผัดเปลี่ยนกั๋นมา ตอบตั๊ก

ส่วนมิตรสหาย ตังหลายตี้ฮัก ก๋ารนักบ่ได้ เข้ามา
รอไปสักพัก สักระยะหนา หมู่เฮาคงมา อู้จ๋าตอบถ้อย
ระยะนี้หนอ เพลงซอบ่าวหน้อย หรรษามาคอย เวียนแวะ

เครือออนประจ๋ำ ต๋ามตี้นัดแนะ ล้อเลื่อนก็แหว้ บางวัน
ว่างเมื่อใดนั้น ก็เจิญล่ะกั๋น จักมาตึงวัน เว้นวันก็ได้.

[หรรษา]

บางวันก๋ารหลาย บ่กล๋ายบ่ใกล้ กันว่างเมื่อใด นัดพบ

ผัดเปลี่ยนเวียนกั๋น ตึงวันใคว่ครบ คนบทก็ได้ ทักทาย
ลางเตื่อมาพร้อม หลายคนเหลือหลาย ลางเตื่อก็มาย สองสามวันเข้า
แต่ก็ยังดี กว่าหมองหม่นเศร้า ละห้องค่าวเฮา เงียบแซ๊บ

หมู่เฮาว่างก๋าร มาขานซักแป๊บ มอกปอบ่หื้อ มันงัน
ถ้าเป๋นได้นั้น หื้อมาพร้อมกั๋น จุมื้อคืนวัน คงดีเน้อเจ้า.

[เครือออน]

เครือออนสัญญา ว่าจักมาเฝ้า กระดานค่าวเฮา เอาไว้

ขอท่านตังหลาย และครูพูนไท้ ว่างแล้วจุ่งได้ มาเติง
เครือออนม่อนนี้ มีใจ๋กึ๊ดเถิง จุ้วันร่ำเปิง กึ๊ดเติงจุ้ผู้
วันไหนหนึ่งคน นิพนธ์กำอู้ ลำนำก๊ำจู พ่องครับ

เครือออนไหว้สาธุ์ วันตาคำนับ ต้อนฮับจุ้ผู้ จุ้นาม
เจิญมาเต๊อะครับ มาฮับตอบถาม มาตอบเอาความ มาถามหื้อแก้.

[หรรษา]

เครือออนป้อหนาน นั่งแอ้ขะแหม้ รอมิตรซอแล ค่าวจ๊อย

พร้อมตังหรรษา หลานจายบ่าวน้อย นั่งถ้าเอ่ยถ้อย แขกเยือน
นับวันยิ่งล้า คนเริ่มแฉเฉือน ไผบ่มาเยือน กระดานแห่งถ้อง
มีแต่ความเหงา เป๋นเปื่อนร่ำถ้อง ค่าวซอทำนอง เงียบมิด

กวีตังหลาย บ่มาเสื้อมซิด บ่นิดนั่งต้อม มาไจ
เพลงซออ้ายป๊อบ บ่ฮู้อยู่ไหน เมินๆมาไจ หายไปแล้วเจ้า.

[เครือออน]

สองคนลุงหลาน มาหาญอยู่เฝ้า กระดานค่าวเฮา ตั๊ดนี้

ลางวันลุงถาม หลานรามมาจี๊ ลางวันหลานจี้ ลุงบาย
ลางวันก็เน้น เป๋นอรรถเป๋นหมาย ลางเหล้นบ่ดาย หื้อหายง่อมเศร้า
กึ๊ดว่าเป๋นก๋าร เฝิ้กจ๋ารแบบเบ้า ต๋ามฮีตฮอยเฮา ค่าวจ๊อย

ได้บ่เต๋มปัน ขอมันห้าฮ้อย เกิ่งค่อนสักหน้อย ยังดี
หัดเขียนนักนัก ทักษะดีหลี ชำนาญเกิดมี สะหรีแต่งแต้ม.

[หรรษา]

สุราเหล้าขาว ต้องมีกับแกล้ม สองคนเฮาแจม จ่วยเน้น

เปื่อหื้อตั๋วหลาน ได้ขานเลือกเฟ้น ขีดเส้นไต่แต้ม ฝึกเอา
ลางวันสนุก บ่มีหมองเหงา บางวันซบเซา ดั่งใบไม้แห้ง
ลางเตื่อก็หัน เพลงซอเตื่อมแถ้ง หลายมื้อมาแยง เป๋นครั้ง

ลุงล้อเลื่อนไหล ก็ไขบ่ยั้ง น้อยต๊ะหมั่นตั้ง กำซอ
ห้าคนเฮานี้ บ่มีไผขอ หากว่างแล้วนอ ตึงมาอยู่หนี้.

[เครือออน]

บ่ต้องมีใผ มาไจมาจี้ หมู่เฮาตึงมี ใจ๋ฮัก

ลางเตื้อก็นัน มากั๋นคึกคัก ลางนักลางหน้อย หมุนเวียน
วันใดว่างเว้น ก็เข้ามาเขียน ลางเตื้อก็เนียน ลางเตื้อก็ด้าง
มาจ้วยกั๋นเขียน มาจ้วยกั๋นสร้าง มาจ้วยกั๋นวาง ฐานทัด

ต๋ามสมัครใจ๋ บ่ได้เคร่งครัด คนวัดคนบ้าน มาเลย
เมธีค่าวไซร้ อย่าได้อยู่เฉย ยกค่าวมาเกย มาเผยแผ่กว้าง.

[หรรษา]

ช่วงนี้หายสอย ฮ่องฮอยกล่าวอ้าง เริ่มจะเลือนลาง เคลื่อนแคล้ว

เข้ามานั่งเขียน แวะเวียนก็แล้ว ในใจ๋ก็แป้ว ขึ้นมา
ในช่วงเดือนนี้ คนบางหายต๋า บ่หันไผมา อู้จ๋าเขียนถ้อง
มีก่าป้อหนาน เครือออนเฝ้าห้อง หรรษานั่งมอง กระทู้

ลุงล้อเลื่อนไหล มาไจเข้ายู้ หลายคนอื่นผู้ ลับลอย
ผมกลั๋วแต๊แต๊ กลั๋วค่าวหายสอย กลั๋วมันล่องลอย จอยวอยหายจ้อย.

[ล้อเลื่อน]

ล้อเลื่อนคงยัง อยู่ผังค่าวสร้อย บ่ได้หายวอย หลีกลี้

ก็กลั๋วเหมือนกั๋น หวั่นในใจ๋นี้ กลั๋วคนห้องหนี้ ลับลา
จะหมั่นมาทัก อนุรักษา ค่าวศิลป์ล้านนา หื้ออยู่คู่บ้าน
กับคนสมัย หวั่นใจ๋เสี้ยงถ้าน กลั๋วเขาบ่ปาน มาแวะ

จะมีไผไหน เข้าใจ๋จี๊แนะ หื้อลูกหลานหน้อย เตวตวย
สืบโรงต่อร้าน พื้นบ้านดีสวย บ่หื้อได้โรย หายไปจากห้อง

[หรรษา]

ย้อนถึงเหตุก๋าร นมนานเกี่ยวข้อง ค่าวซอทำนอง ครื้นครึก

มิตรค่าวตังหลาย มากั๋นระทึก เฮียนฝึกเต๋มห้อง ค่าวซอ
อู้จ๋าคึกคัก ใจ๋ฮักแต๊หนอ เดี๋ยวนี้ค่าวซอ กลับหมองหม่นเหมี้ยง
มิตรค่าวซอกล๋อน เจ้ามอนหน้าเกลี้ยง บ่หลับมาเคียง ค่าวนี้

เดี๋ยวนี้คงเหลือ ออนเครือบ่ลี้ ลุงล้ออยู่หนี้ พร้อมเพรียง
กับเพลงซอนั้น คอยเขียนส่งเสียง มาวาดสำเนียง กับนายม่อนข้า.

[หน้อยต๊ะเวียงต๋าน]

หน้อยต๊ะแหมคน เวียนวนอยู่ถ้า บ่เกยจากลา บอร์ดนี้

เถิงบ่ได้เสริม เพิ่มเติมจ่องจี๊ แต่บ่หลีกหลี้ หนีไป
เก็บน้อยฮอมนิด แต่งแต้มแกะไข มาเป๋นค่าวจัย ดั่งใจ๋ม่อนข้า
ฮ่ำฮำกับเพลง บรรเลงถิ่นหล้า ชุมชนล้านนา ถิ่นท้อง

บางเตื้อก้อนำ เป๋นกำฮ่ำฮ้อง ออกอากาศก้อง บุรี
เกาะคาห้างฉัตร เสริมงามเสริมศรี แม่ทะก้อมี แฟนคลับค่าวสร้อย
เกิ่งเมืองลำปาง คลื่นฟังมันน้อย ปรับปรุงผ่อกอย ทนุ

รอก๋ารขยาย คลื่นสายวิทยุ สื่อสารชุมชน สัมพันธ์
มิตรเพลงค่าวจ๊อย ปากั๋นปันหวัน ถ้องตอบบ่ตัน มันเป๋นดั่งอี้

[หรรษา]

จื่นจมแต๊นอ ค่าวซอตะกี้ น้อยต๊ะวาตี มาแล้ว

หรรษาเจยจม บ่กลากลาดแกล๊ว น้อยต๊ะผ่องแผ้ว มวลชน
สื่อวิทยุ ทลุมรรคผล สื่อสารชุมชน แพร่ค่าวซอถ้อง
นับเป๋นสะหลี กวีคู่ห้อง ส่งเสียงทำนอง ค่ำเจ๊า

เขลางลำปาง บ่จ๋างแต๊เล๊า ย้อนได้อ้ายเจ้า ไปแจม
น้อยต๊ะอ่านจ๊อย สื่อถ้อยเตื่อมแถม ค่าวเอาอ่านแซม ขยายหื้อกว้าง.

[ล้อเลื่อน]

เป๋นสื่อชุมชน เป๋นคนเสริมสร้าง สืบสายแนวทาง พิทักษ์

เป๋นชนชั้นครู ผู้อนุรักษ์ ต่อศิลป์พื้นบ้าน ล้านนา
จื่นจมเต๋มร้อย เหมือนน้อยหรรษา ใจ๋นี้ศรัทธา ต่อสื่อพื้นบ้าน
นับเป๋นเรื่องดี บ่มีใผต้าน ส่งเสียงกังวาล ก้องฟ้า

คนในลำปาง เส้นทางรถม้า แฟนคลับนั่งถ้า เจ๊าเย็น
ขออ้ายหน้อยต๊ะ ถ้าบ่ยากเข็ญ ส่งคลื่นกระเด็น ทางเน็ตพ่องเจ้า

[หน้อยต๊ะเวียงต๋าน]

ก่อยเยียะก่อยทำ ไปต๋ามแบบเบ้า เปื้อถิ่นลำเนา เฮาฮัก

เครื่องส่งตี้มี คลื่นส่งบ่นัก รอก๋ารเติมแต้ม เงินทุน
วัตต์เพียงหนึ่งร้อย ขาดคนคอยหนุน ขาดคนก้ำจุน เงินทุนเตี่ยมแถ้ง
พื้นที่สนาม โทรศัพท์เขาแจ้ง ว่าขาดคู่สาย รองรับ

ติดเน็ตเพิ่มสาย ก้อได้ขอรับ แต่มีค่าเพิ่ม หลายตังค์
ส่งได้เต้านี้ บ่ปอสมหวัง มีก้าคนฟัง ขาดคนว่าจ้าง
รอก๋ารปรับปรุง บำรุงฮ่วมสร้าง รอการนำทาง วางเน๊ต

หากสมดังใจ๋ ได้ความสำเร็จ จะปล่าวกล่าวเอิ้น เมธี
หื้อป้อครูเก๊า พูนอุดมศรี มาทำพิธี ประธานเปิดป้าย
หื้อป้อเครือออน ลุงล้อก่อได้ เป๋นพิธีกร วันนั้น

หื้อหน้อยหรรษา มาล่ายเจิงจั้น ขับซอล่องน่าน ในงาน
ส่วนเพลงซอนั้น ขอจ้วยคัดสรรค์ สาวน้อยนงคราญ ฮ่วมฮ้องฮ่วมเต้น

[หรรษา]

เมื่อใดจาหา จะได้ฟ้อนเหล้น รอฮับลายเซ็น น้อยต๊ะ

หรรษานี้หนอ นั่งรอบ่ละ คงป๊ะกั๋นได้ สักวัน
ยินดีจ้าดนัก ตี่มาจวนกั๋น ว่าวันเปิดงาน หื้อม่อนซอถ้อง
ขอเป๋นแฮงใจ๋ อยู่ในหอห้อง หื้อน้อยสมปรอง ใฝ่มัก

สมปรารถนา เต๊อะนาแต๊ตัก รายก๋ารสื่อหื้อ ชุมชน
ล่องผ่านตางเน็ต เบ็ดเสร็จเตียวหน หรรษาหน้ามน ส่งแฮงใจ๋หื้อ.

[ล้อเลื่อน]

ก๋ารหลวงงานหลาย ถ้าใจ๋ใฝ่หยื้อ บ่ป๊นก๋ำมือ คว้ายับ

ฝันไปหื้อไกล๋ ไปหื้อถึงครับ ขยับเตี้ยหน้อย ยังดี
ช่องทางหางบฯ ต้องพบวิถี เล็งหื้อดีๆ อาจมีอยู่ใกล้
มีความตั้งใจ๋ จะไปหื้อได้ ก็หันเส้นชัย เกิ่งแล้ว

ดีเจชุมชน เหล้นกลดักแฮ้ว ฮ่ำค่าวแจ้วๆ เจ๊าแลง
ลองลองออนไลน์ งบฯไทยเข้มแข็ง เขียนค่าวแฮงๆ เจ๊าแลงอ่านเล่น
วิทยุชุมชน ก็คนมีเส้น ไฉนลำเค็ญ ขาดเน็ต

ลาบงัวตั๋วลาย บ่ใส่พริกเผ้ด ก็กิ๋นกับข้าว บ่ลำ
คนดีถูกย้าย คนฮ้ายอิ่มหนำ จะจิบนางรำ หื้อทำใจ๋กล้า (เกี่ยวกั๋นก่ครับ)

[หน้อยต๊ะเวียงต๋าน]

ขอโทษโตยหนา ตี้ตั๋วม่อนข้า มาตอบวาทา ล่าจ๊า

ย้อนว่าเวลา พร้อมตึงสับป๊ะ กาละในหล้า ธานี
มันบ่ปิ้กย้อน เหมือนผ้าย้อมสี บ่เหมือนดนตรี ตี้เปิ้นฟู่แถ้ง
ลุยโต้งลุยนา ต๋อนหน้าน้ำแห้ง ไปเฝ้ากอยแยง เรื่องน้ำ

เสร็จจากดำนา ฝนก้อมาซ้ำ กล๋ายเป๋นน้ำท่วม นองนา
หันแล้วใจ๋จ๊ำ ฟั่งล้ำข้องขา เลยปล่อยเวลา หื้อมาไขแก้
กึ้ดไว้ในใจ๋ ไค่แอ้ขะแหม้ ขายข้าวเอาเงิน ติดเน้ต

ไค่ลาบงัวลาย ใส่พริกเผ็ดเผ็ด เหมือนตี้ลุงล้อ แนะไป
ผ่อนาหันน้ำ กร้าบ่หันปล๋าย ความหวังมลาย บ่ได้ขายข้าว
ข้าวบ่มีขาย เนอนายน้องเจ้า เพลงแรกหื้อฟัง วันนี้

ขอบคุณเมธี ตี้มากล่าวจี๊ จ้วยแนะอั้นอี้ คำจาย
พลังมีนัก ใจ๋ฮักมากหลาย คงถึงเส้นชัย ต่อไปตางหน้า
ม่อนตั้งจุดหมาย ปล๋ายปี๋สองห้า ห้าสามมีความ สำเร็จ

ตึงคลื่นขยาย ตึงสายคู่เน้ต มีพร้อมครบถ้วน บริบูรณ์
หลอนถึงวันนั้น ขอต้านจ้วยหนุน ขอได้ก้ำจุน จ้อยซอค่าวสร้อย
ออกตางหน้าไมล์ ออนไลน์ทั่วถ้อย ฮีตเก่าแนวฮอย สัมฤทธิ์

ขนบธรรมเนียม ล้านนาแนบชิด ไปทั่วแห่งห้อง ธานินทร์
ถึงอยู่ถิ่นท้อง แห่งห้องกล๋างสินธุ์ ก้อได้ยลยิน เก้าห้าเจ็ดห้า(ล้านนาเรดิโอ).