7 กรกฎาคม 2552 ครบรอบ 5 ปี โรงเรียนค่าวพูนอุดม

[พูนอุดม.เวียงเขลางค์]

วันที่ 7 กรกฎาคม 2547 เป็นวันก่อตั้งโรงเรียนค่าวพูนอุดม

มาถึงวันที่ 7 กรกฎาคม 2552 ครบ 5 ปี พอดีครับ

[พูนอุดม.เวียงเขลางค์]

นักเรียนค่าวชั้นต้น รุ่นที่ 1 ปี 2547

1.นกอมตะ
2.เจ๋วะรัฐถะ
3.ตุ๋ม
4.น้องหนอน
5.น้องแอน
6.หนานปั๋น

นักกะโลงชั้นต้น รุ่นที่ 1
1.น้องหนอน
2.น้องแอน

งานมอบใบประกาศนียบัตร
- เมื่อวันที่ 12 ธันวาคม 2547 ได้มีพิธีแจกใบประกาศนียบัตรนักค่าวชั้นต้น รุ่นที่ 1 ( รวมถึงนักกะโลงชั้นต้น )
ณ บ้านพุทธรักษาสมุนไพร จ.เชียงใหม่( บ้านป้าวัณย์ ) โดยมี อาจารย์มาลา คำจันทร์ เป็นประธาน
ขอแสดงความดีใจกับนักค่าวครับ

[พูนอุดม.เวียงเขลางค์]

นักเรียนค่าวชั้นต้น รุ่นที่ 2 ปี 2548

1.ป้าวัณย์
2.น้ำป๋าย
3.มองพิม
4.ปิมปา
5.ป๊อป
6.ปั๊กกะตึน
7.คำปัน
8.เฒ่าค่าว ( กะโลง )

งานมอบใบประกาศนียบัตร
- เมื่อวันที่ 13 สิงหาคม 2548 ได้มีพิธีแจกใบประกาศนียบัตรนักค่าว รุ่นที่ 2
ณ ร้านอาหารสวายเรียง จ.เชียงใหม่

[พูนอุดม.เวียงเขลางค์]

นักเรียนค่าวชั้นต้น รุ่นที่ 3 ปี2549

1.จาวละกอน
2.จักกิ้ม
3.ปั๊กกะตึน ( กะโลง )

นักค่าวชั้นสูง รุ่นที่ 1 มี 4 คน คือ
1.เฒ่าค่าว
2.น้องแอน
3.จาวละกอน
4.มองพิม

[พูนอุดม.เวียงเขลางค์]

นักเรียนค่าวชั้นต้น รุ่นที่ 4 ปี 2550

1.น้องฟาร์/November ( ค่าว และ กะโลง )

[พูนอุดม.เวียงเขลางค์]

นักเรียนค่าวชั้นต้น รุ่น 5 ปี 2551
1.เครือออน

นักเรียนตั๋วเมืองชั้นต้น รุ่นที่ 1 ปี 2551
1.น้องฟาร์

( ใครที่แต่งค่าวได้อย่างต่ำ 38 บรรทัด ในกระดานค่าว แล้วไม่มีชื่อ
ขอแจ้งเพิ่มชื่อได้ครับที่ ai_poonudom@yahoo.com )

[ป้าลาวัณย์]

สวัสดีเจ้า อ้ายพูนอุดม นี่ห้าปี๋ละกาเจ้า
เปิงป้าว่า เวลาหมะเด่วเวยหยั่งฟ้าแมบน้อะเจ้า
ป้ากึ๊ดเถิงเวลาเก่า ๆ ตี้ผ่านมา เฮามีความสุขกั๋นแต๊ ๆ น่อเจ้า

แต่หมะเด่ว ต่างคนต่างก่ มีก้าก๋าน ไผจะเหมือนป้าพ่องหา
วัน ๆ หาเวลาว่างปอหมะได้ แต่ป้าก่ ยังมีความสุขนาเจ้า
เพียงแต่ว่า มันเปลี่ยนไปพ่อง อาจจะเป๋นต้าป้าแก่ตั๋วลงตึงวันก่ เป๋นไปได้

กึ๊ดจะเยียะก๋านใหญ่ก่ หยังมากึ๊ดหมะลุก แห๋มอย่าง มันหมะไค่มีคนมาจิ มาสุ่ย
มันก่ เลยเอ็นยาน ๆ ซ้ำเวลาก่ เวยหยั่งมีปีก นี่ก่ เลยก๋างปี๋มาแห๋มแล้ว
เดวก่ จะลวดเถิงป๋ายปี๋แห๋มละ เฮ้อ

ไผก่ ได้ มาสุ่ยป้าแล่

[หนานจัย]

เป๋นนักเรียนฮาด สอบตกปี 51
แต่ก่อยังฝึกฝีมืออยู่เน้อ มันบ่ค่อยว่างเป๋นแต๊เป๋นว่า
ขอลงทะบียนฮักษาสภาพนักศึกษาไว้ก่อน ถ้าพร้อม
จะส่งข้อสอบเลยเน้อ !!!!!!!!

ขอเป๋นกำลังใจ๋หื้อปี้น้อง คนค่าว กุ๊คนเน้อ

[เพลงซอ]

เพลงซอ ก็ยังบ่ได้ขึ้นจั้นไปเฮียนจั้นสูงเตื่อคับ ความฮู้ก็เลยเต๊าเก่า เดวว่างๆ จะม๊ำหมึ๊ก แถมสักกำ

[เครือออน]

เครือออนม่อนน้อย ด้อยประสบก๋ารณ์ ความฮู้บ่บาน เจิงจ๋ารค่าวสร้อย
จึงได้เข้าเก๋ณฑ์ มาเป๋นศิษย์หน้อย โฮงเฮียนเน็ตลอย ล่องฟ้า
พูนอุดมครู อยู่เมืองรถม้า นับเป๋นครูกล้า ครูคม
ดีใจ๋ยิ่งล้ำ จักทำหื้อสม ศิษย์พูนอุดม หลานพรหมมาเจ้า.

[พูนอุดม.เวียงเขลางค์]

ขอเอิ้นปากตั๊ก จักแถลงไข แต่งค่าวซอใย ไปกั๋นหล้องหล้อง
อันว่าเพลงซอ เข้ามาเกี่ยวข้อง แต่งค่าวฮอมปอย ม่วนล้ำ

ตังฝ่ายเครือออน ได้มาจ่วยก๊ำ สืบสานค่าวสร้อย ล้านนา
เข้ามาแหมเต๊อะ ดีใจ๋แต๊หนา ค่าวในต๋ำรา มันตึงอดกั้น
เชือกค่าวนั้นนา มาจ่วยกั๋นฝั้น หื้อมันแข็งแรง แต๊ตั๊ก

หมู่เฮาคนเมือง สืบสานของมัก คนละเล็กหน้อย ยังดี
ล้านนาเฮานั้น มีศักดิ์มีศรี ย้อนว่ายังมี คนฮักค่าวสร้อย..

[เพลงซอ]

หยั่งมาเปิงใจ๋ ปายในยอดสร้อย ป้อครูปิ๊กฮอย ย้อนป๊ป

ยกมือขึ้นสา ซวามือขึ้นต๊ป ขอไหว้น้อมนบ ป้อครู
แม่นแล้วแม่นแล้ว ผ่องแพ้วแน๋ตู๋ ป้อครูมาจู มาดูม่อนข้า
เมินนานแล้วหนอ มารอนอนถ้า วันนี้ได้มา แล้วนั้น

เครือออนอยู่ไหน ขะใจ๋ปี้จั้น ป้อครูอยู่หั้น แล้วนา
มาซอมาจ๊อย ก๊อยต่อภาษา กำเมืองล้านนา อู้จ๋าแจ้วแจ้ว

[เครือออน]

ครูพูนอุดม บรมครูแก้ว ปิ๊กมาสืบแนว แล้วครับ

สมใจ๋ที่รอ ข้าขอคำนับ ต้อนรับครูเจ้า ปิ๊กมา
ตั้งต่อแต่นี้ อย่าหนีเลยหนา เหล่าข้าศิษยา กองหาเน่อเจ้า
ปิ๊กมาเต๊อะหนา มาถ้าคอยเฝ้า ตรวจแก้ค่าวเกลา ฉันทะ

วันนี้สมหมาย ได้อ่านวาต๊ะ วจนะเจ้า ครูพูน
อุดมครูไท้ บ่ได้หายสูญ ครูอุดมพูน มาหนุนเตื่อมแถ้ง.

[เพลงซอ]

มานั่งกอดคอ ซอกั๋นฮอดแจ้ง เอาจ๋นแสงทอง ส่องฟ้า

เอาจ๋นปอใจ๋ อย่างใดก็ต้า มามะเจินมา ประลอง
กอนปี้ฮู้หนึ่ง น้องขอฮู้สอง ปี้เป็นเตียนซอง น้องเป็นดอกส้อม
เฮามากั๋นหลาย ยายกั่นมาต้อม นั่งล้อมเป็นวง ม่วนนัก

มีไผพ่องหา จะมาจ่องจั๊ก สำนักแห่งห้อง ค่าวซอ
ขี้เสี้ยนดอกหมาก ขี้ขากดอกป๋อ ขี้หิดขี้กอ ขี้ตู้ดขี้เสี้ยน

[เครือออน]

กวีค่าวซอ บ่หล้างจักเหี้ยน หาคนแวะเวียน ยากล้ำ

ยังดีพ่องนอ เพลงซอมาก๊ำ มาย้ำอยู่หั้น ตึงวัน
ญะหื้อข้านี้ ขมีขมัน แต่งค่าวตึงวัน ตอบกั๋นจ้องจ้อง
สองคนสองความ ตอบถามไถ่ถ้อง ตั๊กเป๋นทำนอง ค่าวจ๊อย

ศิษย์พูนอุดม มีถมเป๋นร้อย เป๋นใดหายจ้อย เงียบงัน
มาเต๊อะพี่น้อง เฮาต้องช่วยกั๋น ดันฟื้นคืนคง กะโลงค่าวสร้อย.

[มองพิม(บ่ะได้ล็อกอิน)]

ช่วงนี้งานนัก ช่วงนี้งานหลาย มองพิมอี่นาย เลยบ่ได้เข้า
กึ้ดเติงหาครู หน้าหมองต่องเศร้า งานบ่บางเบา เลยนั้น

กึ้ดเติงเพื่อนผอง ปี้จั๊นน้องจั๊น เป๋นใดพ่องอั้น บอกมา
งานหลายก่อนั้น สุขภาพแหมหนา เป๋นใดพ่องกา สบายดีก่อเจ้า
ถ้ามีเวลา จะแว่มาเข้า แอ่วหาหมู่เฮา แหมเนาะ

วันนี้ขอลา บ่ใด้ออเซาะ ขอวางลงก่อน แลนายเหย...


สงสัยจะแต่งบ่ะค่อยเข้าแก๊บละก้านิเจ้า เพราะบ่ะได้แต่งมาเมินนักแกละเจ้า กึ๊ดเติงหากู้คนเจ้า

[เครือออน]

มองพิมมาแล้ว เจื้อยแจ้วขับขาน หายไปเมินนาน นับวันบ่ได้
เปิ้นว่ามีก๋าร มีงานไจ้ไจ้ เวียกนักล้ำไป อย่างนั้น

เลยบ่ได้มา หาเพื่อนร่วมจั๊น แต่ใจ๋ในดั้น เติงนา
ผดมาวันนี้ ยินดีแต๊หนา เพลงซอก็มา ถามหาจ้องจ้อง
ผ่านแล้วผ่านไป บ่ใส่ใจ๋ข้อง ขอน้องมองพิม มาเต๊อะ

เครือออนนี้หนา จะถ้าอิงเมอะ กับเจ้าว่าอั้น ไจ๋มา
พูนอุดมไท้ ก็หายไปหนา ขอเจิญครูบา ปิ๊กมาวาดถ้อย.

[เพลงซอ]

กะเดวว่าไผ เสียงใสจ้อยจ้อย เป็นว่าสาวน้อย เส่วฮัก

ได้มาอู้จ๋า ถลามาตั๊ก จั๊กเป็นค่าวสร้อย เครือใย
เป็นได้พ่องนั้น เจ้าจันทร์หอมไก๋ เส่วเป็นอย่างใด บายดีก่อเจ้า
เพลงซอรอหา นงรามาเข้า เวลานานเนา เมินล้ำ

หื้อหมั่นเข้ามา อาสาเตื่อมก้ำ อย่าได้ล่วงข้าม เลยนา
หลังจากพักยั้ง ยังข้าวและป๋า หื้อสูแวะมา หาข้าในห้อง
เจ้าปี้เครือออน นอนรอซอถ้อง มองพิมอีน้อง มาเต๊อะ

มากั๋นหลายหลาย ยิงจายเป่อเลอะ มาอิงเติกเมอะ สักกำ
ค่าวซอเฮานี้ จ่วยจี้จ่วยก๋ำ มาจ่วยกั๋นทำ หื้อมันถูกต้อง

[เครือออน]

มองพิมขะไจ๋ มาไขขานถ้อง เพื่อนพ้องเพลงซอ รอตั๊ก

เพลงซอเปิ้นเกณฑ์ หื้อเป๋นเส่วฮัก มาตั๊กเหียหน้อย เวยเวย
คำเจิญคราวนี้ บ่ดีทำเฉย มาอู้มาเอย กั๋นเลยนอเจ้า
บ่ว่าใกล้ไกล๋ นอนายน้องเหน้า ขานตอบกั๋นเอา ตางเว้บ

เขียนค่าวลงไป ขะไจ๋แล้วเซ้ฟ เว้บจะส่งหื้อ เพลงซอ
เครือออนพ่ออุ๊ย ซุ้ยหลายพอศอ มองพิมสาวคลอ เพลงซอหนุ่มหน้อย

[เพลงซอ]

มะมาว่ากั๋น คนวันละถ้อย มามอกenjoy ปอล่ะ

ตี่จริงมองพิม บ่ทิ่มบิ่นล่ะ ยามเป่งก๋านวะ เข้ามา
ลูกศิษย์ป้อครู มาจูแล้วหนา เมินนานเข้ามา ข้าก็รอได้
กึ๊ดฮอดก่อนหลัง เฮายังเข้าใกล้ เขียนค่าวซอใย บ่เว้น

จ๋ำได้ก่อหา พิมพาเกยเน้น กำตี่ขีดเส้น หนักเบา
ถ้องค่าวม่วนล้ำ จำกำบ่าวสาว เป็นเรือ่งเป็นราว ยาวบ่ใจ๊น้อย
ต๋อนนี้มามี คนดีต่อสร้อย เครือออนมากอย ผ่อนั้น

สนุกสนาน ขับขานเจื้องจั้น คัดสรรแต่งปั้น บทกลอน
สี่บาทหนึ่งบท จดเป็นวรรคต๋อน เจ้าปี้เครือออน เปิ้นสอนเปิ้นเล่น

[เครือออน]

หากมีคนหลาย มายายเป็นเส้น ช่วยกั๋นเข้าเวร หยอดเยาะ

คนหมั่นมาเขียน คนเปียรมาเลาะ คนหุมมาเป้าะ ค่าวคำ
ขอบ่ได้ใจ๊ น้องอ้ายตังสาม มองพิมคนงาม เพลงซอฮามเบ้า
เครือออนคำจาย ไปเจิญคนเข้า มาฮ่วมหมู่เฮา ตั๊ดนี้

จั๊กดีก่อหา ที่ข้ากล่าวจี๊ บ่ใช่จักจี้ หื้อไป
คนสำคัญนั้น ท่านบ่ใช่ใผ พูนอุดมไจย ไปไหนแล้วเจ้า.

[พูนอุดม.เวียงเขลางค์]

ไปแอ่วไหนไกล๋ บ่ได้มาเฝ้า ก๋านนักล้ำไป แต๊ตั๊ก

ผ่อหันมองพิม เจ้าจี๋ดอกรัก สุขใจ๋ก่อเจ้า นารี
เมืองพะเยานั้น ม่วนงันสุขี แอ่วกว๊านม่วนดี ใสเย็นว่าอั้น
พระเจ้าต๋นหลวง บ่มีขีดขั้น พระพุทธพระธรรม สุขล้ำ

ครูสบายดี นายังมีน้ำ มีปล๋าบ่กั้น ธารา
ห่วงใยลูกศิษย์ ม่วนงันก่อหา ว่างก็แวะมา ล้านนาค่าวสร้อย

[เครือออน]

น้อยใจ๋ครูพูน อุดมบ่หน้อย ป๊อยหันมองพิม หนึ่งนั้น

บ่หันเพลงซอ บ่ผ่อแถวนั้น เครือออนอยู่หั้น แถมลอ
ฤๅพูนครูเก๊า จักเถ้าแล้วบ๋อ บ่หันเพลงซอ เครือออนว่าอั้น
ดีใจ๋แต๊หนอ พ่อครูมาขั้น เจิญมาตึงวัน เน่อครับ

ศิษย์ค่าวตังหลาย นั่งยายถ้าฮับ สลับเขียนอั้น ค่าวซอ
หื้อมันสง้า ม่อนข้าจึ่งขอ พ่อครูค่าวซอ มาผ่อไจ้ไจ้.

[พูนอุดม.เวียงเขลางค์]

ก่อนจะเอิ้นตั๊ก อันคนอยู่ใกล้ เอิ้นหาคำญิง แต๊นั้น

เมินเมินมาก๋าย อี่นายน้องจั๊น เลยจ๋าฟู่อู้ เป๋นลาย
ส่วนเพลงซอนั้น เข้ามาแหมหลาย เครือออนป้อจาย หยาดยายค่าวสร้อย
ยังหนุ่มยังแน่น บ่ดีใจ๋หน้อย แต่งค่าวฮอมปอย วันนี้

สุภาพสตรี อู้จ๋ากล่าวชี้ เอิ้นตั้กอู้เอิ้น ก่อนจาย
อู้ไปต๋ามน้ำ ดอกบัวเป๋นสาย น้ำขึ้นเพียงใด ดอกบัวเพียงอั้น

[เครือออน]

ดีใจ๋ครูพูน มาหนุนเตื่อมปั้น แต่งค่าวลงบรรณ ฮ่วมบล๊อก

เจ้าของโฮงเฮียน มาเขียนปลดล๊อก ว่าหื้อเกียรติหั้น สตรี
ตั๊กตวายก่อนจั๊น สำคัญดีหลี เลดี้เฟิซท์ซี อันนี้ใจ๋เข้า
แถมติงเครือออน ว่ายังหนุ่มเหน้า บ่ดีด่วนเบา ใจ๋น้อย

ม่อนขออภัย ด้วยใจเต๋มร้อย บ่ควรเอ่ยถ้อย ลามปาม
ขอกราบองค์ไท้ ไตรรัตน์ตังสาม คุ้มครองครูนาม พูนอุดมเจ้า.