ค่าวเรื่อง แม่สอนลูก

[เครือออน]

บาปนั้นหื้อสูญ บุญนั้นหื้อสร้าง บุญคือหนตาง สู่ฟ้า

เกิดมาเป๋นคน กุศลสง้า สามแพร่งอยู่หน้า มัคค์แคม
จักไปสู้ฟ้า ปิ๊กมาเกิดแถม ฤๅจักลองแจม นรกต่ำใต้
ฤๅไปนิปปาน บ่หันมาใกล้ วัฏฏะโลกัย โลกนี้

มนุษย์คือตาง ระหว่างกล๋างจี๊ ไปหั้นไปหนี้ เลือกเอา
บาปไปนรก ตกหม้อไฟเผา บุญอุ้มตั๋วเฮา เข้านิปปานห้อง.

[หรรษา]

ยามฮ้อนเรารา เปิ่งกับบุญจ้อง เพลงเปิ่งทำนอง แต๊ตั้ก

น้ำวังแม่ใส เปิ่งเฮือนั้นตี่ฮัก เสือเปิ่งป่ากว้าง พงพี
ยามเฮาต๋ายแล้ว กลับกล๋ายเป๋นผี จะเปิ่งหยังดี จาหาต่านเจ้า
เปิ่งบาปเวรก๋รรม หน้าดำก่ำเส้า แต่ก่อนนั้นเฮา สร้างไว้

หรือเปิ่งกุศล ผลบุญแต๊ไซ้ ก่อนนั้นเฮาได้ โททำ
บุญบาปเต่านั้น หากจักเป๋นก๋รรม ยามเมื่อวายวำ จักเป๋นตี่จั้ง.

[เครือออน]

เกิดมาเป๋นคน บ่จ๋นตางสร้าง กุศลหนตาง สู่ฟ้า

มันอยู่ตี้ใจ๋ ปายในสง้า ฤๅว่าบิ่นบ้า บอดมัว
หากใจ๋สง้า แกร่งกล้าบ่กลั๋ว น้ำหล่นใบบัว ชั่วบ่ติดข้อง
อันนี้มัคคา ไปฟ้าหล้องหล้อง อาจลุเถิงครอง ปานนิป

หากใจ๋บอดมัว เอาชั่วมาฮิบ สิบจ้าติก็เข้า อบาย
เกิดเป๋นคนแล้ว ต้องแน่วใจ๋หมาย อย่าหื้อเปล่าดาย หมายนิปปานเจ้า.

[ล้อเลื่อน]

ไม้ซางต๋ายขุย ขาดปุ๋ยเลี้ยงเหง้า คนเฮายังเอา มาไว้

แป๋งสิ่งจักสาน หอเฮือนเครื่องใจ๊ มีประโยชน์ได้ นานา
ทำความดีไว้ ฝากในโลก๋า ตี๋ตร๋าตระกุล ต่อทุนลูกเต้า
ส่วนเรื่องบาปบุญ เป๋นทุนรากเหง้า ติดต๋ามตั๋วเฮา เท่านั้น

ทำดีได้ดี มีขั้นมีจั๊น สวรรค์แบ่งขั้น อย่างใด
วอนท่านผู้ฮู้ จ้วยอู้จ๋าไข สวรรค์บันใด มีกี่จั๊นเจ้า

[เครือออน]

สวรรค์นั้นกา ถ้าถามคนเถ้า ตุ๊เจ้าลางองค์ คงฮู้

ม่อนบ่เกยไป ได้แต่คุดคู้ อยู่ในโลกกว้าง เมืองคน
เมืองฟ้าที่นั้น สวรรค์แดนหน ต่างจากเมืองคน กี่หนกี่ห้อง
เครือออนเหมือนกั๋น มืดตั๋นขัดข้อง มันเข้าทำนอง เลื่อนล้อ

เมธีตังหลาย กราบไหว้งอนง้อ ขอท่านเจ้า จุ่งมา
ขานไขเปิดม้าง หื้อสว่างแก่ต๋า สวรรค์มัคคา กี่จั๊นกี่ห้อง.

[หรรษา]

มีคนปุจฉา เราราก่อยถ้อง จ่วยวาดทำนอง กั๋นเต๊อะ

อย่าได้เคอะเขิน กึ๊ดเมินยิ่งเลอะ จ่วยกั๋นตอบถ้อง วาตี
สวรรค์กี่จั๊น ต๋ามหั้นวิถี ผากฎคัมภีร์ มีหกว่าอั้น
จาตุมหา- ราจิก๋าหั้น ดาวดึงเทวัญ ภูมินั้น

ยามาถ้วนสาม ดุสิตเมืองจั๊น สี่ขั้นแห่งห้อง เมืองดี
นิมมารตีนั้น จั๊นห้าดีหลี ปรนิมมิตตะวสวดี หกจั๊นเนอเจ้า.

แต๊จริงแล้ว ผมก็จ๋ำบ่ได้เสี้ยงเหมือนกั๋น บางตี่บางแห่ง ก็บอกว่า มี9 จั๊นครับ

[เครือออน]

จายรามหรรษา เปิ้นมาเปิดเบ้า สวรรค์เนอเฮา หกจั๊น

จตุมหา ราชิก๋านั้น จั๊นต้นว่าอั้น ปายบน
ธะตะระฐะ ฮักษาออกหน วิรุฬหกยล ทิศะก้ำใต้
วิรูปักข์ ฮักษ์วันตกไส้ กุเวรฮับไป อุตระ

ต๋าวะติ๋งสา พระอินทระ สักกะท่านเจ้า ปกครอง
สองจั๊นต้นนี้ มีกามเพศสอง คือมีคู่ครอง เหมือคนโลกใต้
จั๊นสามยามา ก๋ายาเคล้าได้ แต่เสพปายใน เทพเว้น

จั๊นดุสิต๋า สิเนหาเน้น จับมือกั๋นเหล้น ก็ปอ
นิมมานะ ระดีนั้นบ๋อ ยิ้มหื้อกั๋นนอ เปียงปอเต้าอั้น
ปรนิมมิตต์ สวัตตีหั้น ผ่อต๋าเป๋นอัน สัมฤทธิ์

ต้องการสิ่งใด ใจ๊เนรมิต กึ๊ดคิดแล้วได้ สบาย
หากหมดบุญแล้ว บ่แคล้วต้องตาย จุติลงไป ในมนุษย์ห้อง
ด้วยเหตุกุศล ที่ต๋นเกี่ยวข้อง เกิดได้สมปอง ใฝ่ไว้

วัฏฏะสงสาร สวรรค์เนอไซร้ มนุษย์โลกใต้ เวียนวน
ป้ำเป็งบุญไว้ หลายจ้าติหลายหน อาจป๊นวังวน ยลนิปปานห้อง.

[หรรษา]

เวียนวนเกิดต๋าย บาปบุญเกี่ยวข้อง บึ๊ดไปเมืองทอง เต้พติ๊บ

ลางเตื่อลงเหว นรกไกล๋ลิบ บึ๊ดหนึ่งก็ปิ๊ก คืนมา
สู่โลกมนุษย์ เวียนกลับมาหา ในใจ๋เรารา ไปไหนก็ได้
นรกหม้อเหว เดือดเปล๋วเอ่าไหม้ สวรรค์เรืองไร ป๊นตุ๊ก

โลกหล้าโลก๋า วุ่นวายเป๋นปุ้ก สนุกแก๋มด้วย ราคี
เลือกเอากั๋นเต๊อะ จะไปเมืองผี หรือจั๊นฉิมพลี วิมานเวียงแก้ว.

[ล้อเลื่อน]

สวรรค์นิปปาน วิมาณผ่องแผ้ว ตี้ยึดเป๋นแนว หยั้งพัก

หมดสิ้นจีวี บุญมีบ่นัก คงบ่สมได้ ใจ๋จม
ต้องหาตี้มุด มนุษย์หัวป๋ม หวังจะถึงพรหม บุญบ่ถึงขั้น
หื้อทานทำบุญ เป๋นทุนก่อปั้น ใจ๋เป๋นนิปปาน เตี่ยมสุข

ยังอยู่บนดิน ดวงจินต์สนุก ก็เป๋นสุขได้ ก่จา
สุขตี้ว่านี้ ยังมีกังขา นับเป๋นนิปปาน์ สวรรค์ก่อ้าย

[เครือออน]

ความสุขบนดิน กิ๋นกามเกียรติบ้าย เป๋นสุขลวงใน โลกิยะ

สุขในสวรรค์ เหมือนกั๋นนะจ๊ะ เป๋นพจระ ก๋ามา
เทียบนิปปานนั้น มันอนันต๋า ต๋ามครูสอนมา ใช่ว่าข้าแกล้ง
นิปปานสถาน นั้นมันสว่างแจ้ง ถี่แถ้งในโล- กุตระ

อันเฮาตังหลาย ได้โลกิยะ ก็นับว่ากล้า ป๋ารมี
จ้าตินี้บ่ต๊า จ้าติหน้าวิถี ป้ำเป็งหื้อดี มีสิทธิ์ฮอดห้อง.

[ล้อเลื่อน]

ป๋ารมีบุญ เป๋นทุนแต่งหย้อง ได้สู่เมืองทอง จั๊นฟ้า

วนเวียนเกิดต๋าย จะไวจะจ๊า ด้วยบาปบุญหั้น อั้นกา
ต่างหวังหลุดโป๊น วังวลโลก๋า ผาถะนาแดน เมืองแมนแห่งห้อง
ทำบุญหลายๆ อบายฯบ่ข้อง มีใจ๋ใฝ่ปอ งธรรมะ

พระธรรมคำสอน ขององค์พุทธะ เป๋นไฟส่องใต้ ในจินต์
นิปปานนั้นไซร้ ตี้ไฝ่ถวิล เมืองของบดินทร์ ถิ่นเทวาเจ้า

[เครือออน]

อันเมืองนิปปาน นั้นเป๋นแบบเบ้า หื้อชาวพุทธ์เฮา ใฝ่นบ

โลกมนุสสา เทวาทั้งภพ ยังบ่ฮอดเข้า นิปปาน
ภูมิพจระ ก๋ามะสถาน หกจั๊นเตียมตัน นิปปานบ่ได้
หกจั๊นสวรรค์ เตียมตันเข้าใกล้ เมืองนิปปานไจย เท่านั้น

ฝูงเหล่าเทวา จุติจากจั๊น สวรรค์สู่อัน เมืองคน
ส่วนนิปปานนั้น บ่หวันเวียนหน อรหันต์ชน พ้นวัฏฏะข้าม.

[หรรษา]

บ่มีเดือดตี๋ ตุกข์ขีจ่มส้าม เรื่องคดีความ เอ่าฮ้อน

เกิดแก่เจ็บเป๋น ลำเค็ญก๋ำฆ้อน ไล่ฆ่าแขวดต้อน จีวี
หมดเสี้ยงสิ่งตุ๊กข์ ปิดอเวจี๋ ปิดสิ่งโลกีย์ อบายตังห้า
หากบุญบ่เถิง ญาณบ่แก่กล้า จักเถิงนั้นกา ยากแต๊

หากไผตั้งใจ๋ บ่ขอยอมแป๊ บำเพ็ญส่วนหั้น ความดี
ตานศีลอย่าละ ภาวนาศรี กัมมัฏฐานดี ย่อมถึงเวียงแก้ว.

[เครือออน]

สำคัญคือใจ๋ ปายในผ่องแผ้ว ยึดต๋ามบาทแนว พุทธะ

หันดีคิดดี ทำดีกั๋มมะ อาชีวะถ้วน สัมมา
เปียรวิริยะ สัมมะวาจ๋า สติสัมมา สมาธิหมั้น
แปดคือหนตาง สว่างสุดบั้น สวรรค์นิปปาน ฮอดตึ๊ก

เป๋นมนุสสา ปากั๋นสำนึก มัวหลึกอาจข้อง นิวรณ์
ภมรเผิ้งมิ้น หลงกลิ่นเก๋สร คนหลงนิวรณ์ ก็ถอนบ่ขึ้น.

[หรรษา]

ป้อเครือออนไข หัวใจ๋สะอื้น ความฮู้ฟื้นคืน หยั่งลึก

เข้าใจ๋ความหมาย บรรรยายหยั่งลึก ดั่งพระเตศน์ถ้อย ในธรรม
ป้อเจ้าเก่งล้ำ ม่อนขอจดจ๋ำ กำสอนศีลธรรม ป้อนำมาอู้
เยี๊ยะหื้อตั๋วหลาน มีใจ๋ฮึดสู้ เอามรรคมาจู แปดเน้น

เป๋นเส้นเดินต๋าม งดงามเลือกเฟ้น ต่องเต้นสู่ห้วง ฮ่มเย็น
นิวรณ์ธรรมนั้น ใคร่ฮู้จ๋ำเป๋น ถ้าบ่ยากเย็น มีหยั๋งพ่องเจ้า

[ล้อเลื่อน]

มันหนักหัวใจ๋ ยากในใจ๋เข้า คนปั๋ญญาเบา อย่างน้อย

คนปี้ฮู้สอง คนน้องต่ำก๊อย บ่ฮู้ซักหน้อย ซักตอน
เคลือออนเถาว์โย้ย ขอจงจ้วยสอน ธรรมะนิวรณ์ หื้อฮู้ถี่แจ้ง
ล้อเลื่อนนั้นหนา คนผะหญ๋าแห้ง ขอป้อแสดง ธรรมะ

ว่างเว้นจากก๋าร หม้ดงานธุระ ขอมาตอบถ้อย ความธรรม
หื้อคนฮู้น้อย เก็บถ้อยมาจ๋ำ เป๋นกุศลธรรม กับตั๋วป้อเจ้า

[หรรษา]

ขะใจ๋ป้อหนาน รีบซานมาเข้า กระดานค่าวเฮา ตอบย้ำ

ลุงล้อปุจฉา นานมาล่วงล้ำ นิวรณ์ว่าอั้น สำคัญ
มีหยังพ่องนั้น ขอป้อไขปั๋น ผมยังรอวัน ป้อหนานแว่เข้า
มาตอบคำถาม ของลุงล้อเจ้า ได้ฝากสำเนา เอาไว้

ผมฮู้ในใจ๋ คำตอบนั้นไซร้ แต่แต่งบ่ได้ ยากไป
รอเจ้าป้อนั้น ไขความสงสัย กันว่างเมื่อใด ไวไวเน้อเจ้า.

[อองคำ]

ม่วนแต๊ม่วนว่า วาทาพระเจ้า อันพี่น้องเฮา แต่งก๊อน
อองคำมาหัน ม่วนงันแต่งซ้อน ขอป้อเครือออน ไขจี๊
ขะไจมาตอบ อย่าหลอบหย่าลี้ หย่าหนีจากหนี้ กระดาน

ม่วนดีแต๊ กำพระธรรมหวาน มาสืบต่อจาน หื้อมันใหญ่กว้าง
บ่มีไหนแล้ว ตี้จะแต่งสร้าง มาถ้องกำธรรม ดั่งนี้
ผะหญาข้าตั๋น ขอป้อกล่าวจี๊ บอกนิวรณ์เต๊อะดี มีหยังพ่องเจ้า

[หรรษา]

อองคำก็ถาม กำงามบ่เศร้า ลุงล้อของเฮา แถมนั้น

ใคร่แจ้งสงสัย มาไวป้อจั๊น นิวรณ์ว่าอั้น ในธรรม
ป้อหนานมาเต๊อะ ไขความหื้อจ๋ำ นิวรธรรม มีหยังดั่งอั้น
หื้อมาเตไข อย่าได้กีดกั้น หายความงุนงัน อยากฮู้

หรรษาบ่าวโต๋น แถมคนคดคู้ บ่จ่างแต่งอู้ บรรยาย
จึงบ่อาจโพส โน๊ตความขยาย รอป้อบรรยาย ผู้เดียวเต่าอั้น.