ญิงใกล้จายนั้น ย่อมสั้นหวั่นไหว ใกล้กั๋นเปียงใด หวั่นไหวเปียงอั้น
เป๋นคำโบราณ ขานไว้สั้นสั้น แต่ความหมายมัน เที่ยงแท้
ยะก๋ารโตยกั๋น ตึงวันชะแง้ แลผ่อต่อหน้า ต๋าจม
เมินไปใกล้ชิด สนิทสนม เหยาะหยอกคารม จมกั๋นต่อหน้า
ลางมือต๋ำกั๋น ลางวันใจ๋กล้า ก๋ำมือกั๋นมา บีบกั๊น
ต๋าต่อต๋า อุราสะย้าน จิตหวั่นอยู่หั้น ลืมคิง
อู้จ๋าออเซาะ นั่งเมาะสุงสิง ตึงจายแลญิง เมอะอิงแอบข้าง
เป๋นบ่าวเป๋นสาว ฟู่เอาสมอ้าง ม่ายฮ้างยังดี คู่เซาะ
แม่หอพ่อเฮือน มันเหมือนถูกเคราะห์ มันตึงบ่เหมาะ รวนเร
หากได้ล่วงล้ำ ต๋ามจิตใจ๋เหว ผิดศีลก๋าเม ต้องเหห่างห้อง
โต้ษนั้นปู๋นกลั๋ว ผัวบ่เกี่ยวข้อง เมียบ่เกี่ยวดอง ขว้างละ
เสียงคนเล่าจ๋า โลก๋าวัชชะ มนะหม่นเศร้า เสียคน
ญาติพี่น้อง เผ่าพ้องของต๋น ลูกหลานจุ้คน หน้าหม่นหมองเศร้า
ตั๋วข้าเหมือนกั๋น ตึงวันน้องเหน้า ยะก๋ารโตยเฮา จ๋าตั๊ก
ผอ.คะขา วาจ๋าน่าฮัก อู้ตั๊กหยอกถ้อย ตึงวัน
ตบก๋ำหยอกล้อ ต่างบ่ถือกั๋น กลั๋วความสัมพันธ์ ถลันเกินห้าม
ใจ๋หนึ่งก็กลั๋ว ใจ๋หนึ่งก็ส้าม ใจ๋ดีใจ๋ทราม สู้ฟัด
จักอู้ไปหลาย ปายในกั่งกั๊ด ตัดใจ๋บ่ได้ อึงอำ
ใจ๋หนึ่งทำ ใจ๋หนึ่งก็ห้าม ล้วงล้ำก็จักอาย ยะใดดีหา.
จ๊างปู๊เถ้า หย้ำงวงตั๋วเก่า
