อ่านเล่น!!!วันวาเลนไทน์

[เครือออน]

กันปะสาวสาว หื้อเข้าใกล้ใกล้ จ๋นได้กลิ่นไอ แป้งน้อง

คิงสั่นใจ๋ไหว ปายในมันฟ้อง ว่าอยากเกี่ยวข้อง น้องนาง
อันนี้ต้องเน้น ยกเว้นแฟนขาง เฮาต้องระวัง ผ่อหลังผ่อหน้า
หากบ่มีใผ ทำใจ๋หื้อกล้า เข้าหากัลยา นั่งแมะ

อู้เอ่ยวาจ๋า ต๋ามข้าเคยแนะ หมั่นแวะแอ่วอู้ นงราม
อย่าหื้อใจ๋ปึ๊ง นับหนึ่งสองสาม อยากได้นางงาม ต้องทำใจ๋กล้า.

[หรรษา]

สืบต่อนี้ไป ในใจ๋ม่อนข้า จักฝึกลองจา หมั่นซ้อม

จักหัดตัดเสีย ความอายฟอกย้อม กล๋ายเป๋นกิ่งก้อม บ่อาย
เรื่องหน้าด้านี้ เปิ่นบ่มีขาย ถ้าตั๋วม่อนจาย หมั่นทำตึงได้
จะแต๊ก่อหา จีบสาวไจ้ไจ้ ฝึกอู้ความใน ใจ๋นี้

หื้อน้องคนสวย ขอตวยบ่ลี้ จะสมดั่งอี้ คะเน
หรรษาคนนี้ บ่ขอห่างเห จักไขห่อเต หื้อฮู้ถี่แจ้ง.

[เครือออน]

เชื่อเต๊อะหรรษา ใช่ว่าจักแกล้ง หากมัวระแวง ห่อนฮู้

เรื่องเมียแลผัว อย่ามัวคุดคู้ ต้องออกไปสู้ ของจริง
ลางคนก็ฮ้าย เหมือนได้ผีสิง ลางคนฮู้คิง เหมือนอิงพระเจ้า
เลือกเอาเต๊อะนาย เอาใจ๋ใฝ่เฝ้า ตึงเป๋นของเฮา แน่ละ

อิตถีนารี มันมีสัปป๊ะ ต๋าใผดีได้ เมียแปง
หากตกต๋าฮ้าย ปายลูนปุ๋นแป๋ง เป๋นปิ้วเป๋นแมง กิ๋นแหนงแต๊ใบ้.

[หรรษา]

เลือกคู่ขวัญต๋า นั้นนาต้องได้ ใจ๊ปั๋ญญาใน สอดคิด

เลือกดีเป๋นศรี เลือกฮ้ายเป๋นปิษ พินิจถี่ถ้วน หื้อดี
ผมนี้ต้องเน้น เลือกคู่สะหลี สันใดจะดี เป๋นศรีแม่บ้าน
ครั้นเลือกนักหนา แข้งขาจะห้าน สาวจักรำคาญ แหมเมาะ

ก่อยฮิก่อยหา หมายต๋าสอดเซาะ ต๋ามแต่โจ้คหั้น ปาไป
ขอบคุณป้อนี้ ตี่จี๊แนะไข ผมก่อยเป๋นไป ต๋ามบุญแต่งสร้าง.

[ล้อเลื่อน]

บุพเพนำพา ฟ้าคงเข้าข้าง พบคนร่วมทาง สุขตุ๊กข์


เป๋นเพชรน้ำใส หรือว่าไข่มุก ไว้ปลูกฝังต้น คนดี
หื้อป๊บเพชรแท้ มาเป๋นแม่ศรี เป๋นคู่ชีวี เป๋นศรีแม่บ้าน
ความดีเป๋นแสง เป๋นแรงไว้ต้าน หากมีมวนมาร รุกรบ

ค่อยคัดค่อยสรร ซักวันคงพบ คนตี้หวังแอ้ม แนมคิง
ฮ้อนหล้บร่มไม้ หนาวก่อไฟผิง ความสุขแท้จริง อยู่ตี้ใจ๋เจ้า

[หรรษา]

แม่นแล้วแต๊หนา สุขขาแหล่งเหง้า อยู่ตี่ใจ๋เฮา ดวงนี้

เซาะหาแสนไกล๋ ตางใดหมื่นลี้ สุดเสี้ยงตี่หนี้ ใจ๋เฮา
ความสุขอื่นนั้น ของต่านของเขา บ่เต่าสุขเฮา บรรเตาใจ๋ข้า
หากใจ๋ว่าปอ บ่หลอบิ่นบ้า บ่เวตนา ร่ำร้อง

ใจ๋เฮาพอเพียง บ่เอียงปั่นก๊อง บ่หาหน่วงข้อง ดวงมาลย์
ปอใจ๋ว่าสุข บ่ตุ๊กข์เผาผลาญ ก็จักเจยบาน สำฮานเป่งป้อย.

[เครือออน]

เครือออนขอแซม ขอแถมสักหน้อย คำสร้อยโบราณ ก่อนเก๊า

อยู่เดียวเปลี่ยวดาย แอ่วได้ค่ำเจ๊า แต่มันหม่นเศร้า ปายใน
อยู่สองครองตุ๊กข์ สนุกตางก๋าย แต่บ่สบาย ไปไหนยากเจ้า
คนในอยากออก คนนอกอยากเข้า เข็ดแต๊นอเฮา ต่างกึ๊ด

หนุ่มห้าวสาวแฮง แต่งกั๋นทึดทึด ยึดเอาฮักอั้น เป๋นแฮง
เลือกได้ดีแล้ว ผัวแก้วเมียแสง เลือกได้ปิ้วแมง ผัวแช่งเมียส้าม.

[หรรษา]

ขี่เฮือน้ำนอง ซ้อนสองเปิ่นห้าม บ่เจื่อลองจาม ผ่อเต๊อะ

ต๋ามตี่หันมา นั้นมีป่าเลอะ เอาเต๊อะเลือกหื้อ ดีดี
เรื่องฮักเฮานี้ สำคัญดีหลี เลือกได้บ่ดี เลือกดีบ่ได้
ต๋ามภูมิผย๋า ของต๋นแต๊ไส้ หรือปล่อยเป๋นไป ต๋ามนั้น

ก็แล้วแต่ใจ๋ ต๋ามนัยใฝ่กั๊น หมายปั้นเลือกหื้อ ดีดี
ได้เมียจ่มนี้ แสนตี่สุขขี กันได้เมียดี เป๋นศรีแม่บ้าน.

[เครือออน]

สืบลูกหลานหลาย ขยายกิ่งก้าน เพิ่มบริวาร ญาติมิตร

ได้ผัวเมียดี เป๋นคู่ชีวิต คิดหยังก็ได้ ใฝ่จินต์
ได้ผัวเมียร้าย ผลาญใช้ทรัพย์สิน เข้าหญ้าเข้าดิน ชิวินบิ่นบ้าง
พิจารณา ก่อนหาคู่ข้าง ตังบ่าวตังนาง สาวเน้อ

หนุ่มสาวทั่วไป มีหลายเป่อเล้อ อย่ามัวก้าเหง้อ ความงาม
ผ่อหื้อดีไซร้ อย่าได้ผลีผลาม นอกจากความงาม ความดีต้องได้.

[หรรษา]

วันเข้าพรรณษา ก็ย่างเข้าใกล้ ขอเปลี่ยนบทไป กระทู้

พักเรื่องสาวๆ หน้าขาวยัดยู้ เปลี่ยนอู้เรื่องหั้น ธรรมมา
หลายกระทู้แล้ว ตี่หลานหรรษา ไปหันนั้นนา เรื่องเมียแม่บ้าน
บทนี้ขอจ๋า ปุจฉาปากต้าน ถามความโบราณ เล่าเก๊า

ยังป้อเครือออน สมรนั้นเล๊า พรรษาจะเข้า เวียนมา
ขอปอเล่าเก๊า วันเข้าพรรษา เล่าความเป๋นมา หื้อหลานม่อนหน้อย.

[เครือออน]

เรื่องเข้าวัสสา ปั๋ญญาม่อนด้อย จักเล่าฮีตฮอย ยากล้น

ขอเล่าต๋ามขอ โดยบ่ได้ค้น ม่อนจักขอด้น ดำไป
ฤดูแห่งน้ำ หากย่ำไปไกล๋ เตียวลัดนาไป เสียหายบ่หน้อย
องค์พระพุทธา สัตถายอดสร้อย วางถ้อยบรรดา สาวก

สามเดือนแห่งก๋าล น้ำลานอุทก ตกกล้าปลูกข้าว ในนา
สั่งหื้อสังฆะ สัจจะวัสสา จำอยู่วัดวา อารามแห่งห้อง
เดือนสิบเหนือ แฮมค่ำจ๋ำต้อง อยู่ต๋ามครรลอง สังฆะ

จวบเถิงเกี๋ยงเป็ง เต๋มเต็งก๋าละ ครบวัสสาหั้น สามเดือน
ในวัสสานี้ อย่ามีเฉเฉือน ไปค้างแฮมเฮือน ตี้ไหนบ่ได้
เว้นแต่จ๋ำเป็น ฮ้อนเย็นเมื่อยไข้ แล้วเสร็จเมื่อใด ฮีบปิ๊ก

ศรัทธาต้องหา ข้าวปล๋าเกลือพริก ภิกขาหารหื้อ เป๋นตาน
วันศีลวันพระ วัดวาสถาน ถือศีลหื้อตาน กิ๋นหวานตานต้อม
เป๋นก๋าลอันควร จวนกั๋นยั้งซ่อม ถนอมก๋ายา อัตต๊ะ

สุราเหล้าไห เมรัยมัชชะ ลดละเลิกได้ ซ้ำดี
อบายมุข ละทุกวิถี สร้างป๋ารมี ถือศีลแปดห้า
หากเป๋นกำแปลก ผิดแผกใบ้บ้า ต้องขอสูมา เน่อครับ

ขอกราบไหว้สาธุ์ ขอลาละครับ คำนับเต้าอี้ ก่อนนา
ขอท่านผู้ฮู้ จ้วยอู้จ้วยจ๋า เล่าความเป๋นมา เตื่อมข้าสักหน้อย.

[หรรษา]

หายความสังก๋า แต๊นาเป่งป้อย ทราบต๋ามแนวฮอย ประวัติ

ป้อหนานเครือออน ได้มากำจัด ความสงสัยอื้อ ปายใน
หรรษาทราบแล้ว ปายในสดใส เรื่องความเป๋นไป ในพรรษาหั้น
ได้ความฮู้หลาย มากมายหลายขั้น เครือออนสำคัญ แน่แต๊

ปั๋ญญาป้อหลาย อย่างไร้ข้อแม้ กล่าวแก้ตอบได้ นานา
เรื่องใดก็แล้ว หายเสี้ยงสังกา สัพป๊ะถามมา ป้อตอบได้เสี้ยง.

[เครือออน]

เขาะขอดปายใน ใส่ไปจ๋นเกลี้ยง ดำน้ำจ๋ำเรียง ต๋ามกึ๊ด

เจ้าหลานหรรษา บ่ถ้าไปยึด เอาเป๋นตี้อ้าง ต๋ำฮา
เป๋นแต๊คล้ายคล้าย ได้เฮียนพ่องหนา จึงได้เอามา อัตถาแต่งแต้ม
เทียบเมธีหนอ คงบ่ได้แอ้ม ถือว่ามาแจม หัดไว้

หรรษาเอิ้นถาม ก็จามตอบไซร้ ตอบต๋ามตี้ได้ จ๋ำมา
หากผิดแผกเพี้ยน น้อมเศียรไหว้สา ม่อนขอสูมา เมตต๋าข้าหน้อย.

[หรรษา]

คนล๊วกผย๋า ปั๋ญญาบ่ด้อย มักถ่อมตั๋วกอย อาละ

เครือออนป้อหนาน แตกฉานสัพป๊ะ เต๋จะเต๋มถ้วน ปัญญา
จะใดก็แล้ว หลานน้อยหรรษา ตึงขอวันตา นับถือป้อเจ้า
ตึงยึดตึงถือ ป้อหลอมหล่อเบ้า เป๋นตี่บรรเตา ความฮู้

สิ่งไหนสงสัย ตั้งเป๋นกระทู้ ป้อฮู้ตอบเสี้ยง นานา
ม่อนอยากใคร่ฮู้ เรื่องเข้าพรรษา ป้อสรรหามา ตอบจ๋าหล้องๆ

[เครือออน]

หลายคนแต๊นา เปิ้นว่าข้าบ้อง อวดฮู้อวดลอง สัปป๊ะ

เปิ้นว่าข้าเป๋น ดั่งเณรและพระ สมถะใกล้ นิปปาน
เปิ้นว่าข้านี้ หลบรี้หนีก๋าร แอ่วเหล้นไปวัน บ้านเหนือบ้านใต้
เปิ้นว่าเฮาเมา เรื่องเก่าแต๊ใบ้ ค้นหาทำไม ฮีตเก๊า

เปิ้นว่าหื้อเฮา ไปบวชเต๊อะเล้า ไปเป็นตุ๊เจ้า ดีกา
ในใจ๋เฮานี้ บ่มีปั๋ญหา ติดก้าก๋ายา เคหาเฮือนห้อง.

[ล้อเลื่อน]

ปราชญ์จาวพื้นเมือง นามเลื่องลือก้อง ตำแหน่งถ้วยทอง แน่แท้

ศิลปะกวี บ่มีข้อแม้ มอบแด่ป้อเจ้า เคลือออน
ยกเป๋นครูเก๊า ตี้เฝ้าสั่งสอน ยกป้อครูออน เป๋นอาจ๋ารย์ต้น
ค่าวล้านนาไทย ไปไหนบ่ป้น ถ้าขาดเคลือออน ป้อนี้

ขอวอนเต๊อะหนา อย่าลาหลีกลี้ อยู่ฮักษาหนี้ ฮีตฮอย
มีป้อเป๋นเก๊า หมู่เฮาบ่ถอย หื้อทุกงานปอย ได้สนั่นก้อง

[เครือออน]

บ่หนีไปไหน หากได้คู่ถ้อง มาช่วยประคอง ค่าวจ๊อย

จะเมินเปียงใด จักไกล๋สุดซ้อย เครือออนม่อนหน้อย จักรอ
รอเมธีไท้ ตังหลายนั้นหนอ มาเขียนค่าวซอ มาต่อค่าวสร้อย
ขออย่างเดียวนา อย่าหนีหายจ้อย ม่อนนี้จะคอย เลื่อนล้อ

แลคอยสหาย ตังหลายนั้นน้อ เจิญมาต่อถ้อย เนอเฮา
อย่าหื้อม่อนนี้ อยู่หนี้เดียวเหงา มาเต๊อะหมู่เฮา มาเขียนค่าวสร้อย.

[หรรษา]

คนหนึ่งหรรษา บ่ลาห่างถ้อย เว้นเหตุมีฮอย ธุระ

หากว่างเว้นก๋าร เรื่องงานสัพป๊ะ ตึงละบ่ได้ มาไจ
กลั๋วค่าวห้องนี้ เหงาเงียบหวั่นไหว กลั๋วป้อทรามวัย เครือออนนั่งถ้า
กองหาไผไหน ก็หายหนีหน้า บ่หันจักมา เอ่ยตั้ก

วอนวานเต๊อะหนอ มิตรซอตี่ฮัก มีนักตั่วห้อง ล้านนา
กันไผได้แวะ ต่องเต้ามาหา จ่วยเอ่ยวาตา อู้จ๋าเต๊อะเจ้า.

[เครือออน]

เครือออนหรรษา จักดาอยู่เฝ้า รอหื้อหมู่เอา มาตั๊ก

ถ่าวเถ้าบ่าวสาว นักค่าวตี้ฮัก สมัครกั๋นเข้า มาเลย
เมธีค่าวไท้ อย่าได้นิ่งเฉย มาอู้มาเอย มาเผยบาทถ้อย
อู้กั๋นม่วนงัน สักวันละหน้อย บาทหนึ่งฮอมปอย ก็ครื้น

มาฮอมแฮงกั๋น จ้วยดันหื้อฟื้น ยกค่าวหงายขึ้น คืนคง
หื้อมันบรรลุ วัตถุผะสงค์ ค่าวนั้นดำรง คงอยู่คู่บ้าน.

[หรรษา]

คนเสียแข้งขา นั้นนายังห้าน ค่าวจักสำฮาน ม่วนนัก

ต้องหมั่นมาจ๋า เฮฮาฟูมฟัก จึงจักรุ่งขึ้น ไปนาน
ฮอมวันบาทวรรค สำนักอาจ๋ารย์ หื้ออยู่นานนาน สืบสานไปหน้า
เครือออนหรรษา ยังรออยู่ถ้า ต้อนฮับคนมา เอ่ยตั๊ก

อยู่ในเกหา ล้านนาสำนัก ค่าวจ๊อยแห่งเจ้า ครูพูน
เจิญมาแวะเน้น ขีดเส้นอุดหนุน บ่หื้อขาดทุน กับค่าวซอสร้อย.

[ล้อเลื่อน]

หลายวันบ่มา หรรษาระห้อย เป๋นยามนั่งคอย สำนัก

ยินดีแต๊หนา ได้เข้ามาตั๊ก เป๋นคนต่อถ้อย ร้อยความ
จะหมั่นมาแวะ มาตั้งคำถาม ป้อคนรูปงาม จุ่งรออยู่ถ้า
เสร็จงานแล้วหนอ จะห่อเสื้อผ้า มาอาศัยนอน ห้องนี้

ไผๆคนไหน ตี้หายหลีกลี้ ปล่อยหื้อห้องนี้ ระทม
คนเก่าหื้องว๊าย คนใหม่ผสม จ้วยกั๋นระดม ชมรมค่าวถ้อง

[หรรษา]

บ่แชเฉลือน ล้อเลื่อนมาห้อง เอ่ยจ๋าทำนอง หยอกล้อ

บอกว่าว่างก๋าร จะขานบ่ท้อ พักหอห่อเสื้อ อาภร
มาอยู่ห้องนี้ บ่ลี้หายถอน ขนครัวมานอน แซมซอนอยู่หนี้
แต๊กาลุงเหย เอ่ยมาตะกี้ หรรษายินดี จ้าดนัก

ต่อไปนี้หนา สุขขาแต๊ตั้ก สำนักบ่จ้อย โรยรา
มาเต๊อะๆ มาแนบอิงฝา ขนครัวย้ายมา หรรษารอถ้า

[เพลงซอ]

แม้นว่าอยู่ไกล๋ อยู่หล่ายโลกหล้า จักหาเวลา นอนพัก

อยู่ในห้องหอ ค่าวซอสำนัก เอื้อนเอ่ยจ๋าตั๊ก วาที
เมินนานมาครั้ง ใช่อ้างลาหนี เวลาบ่มี บ่าดายเจ้าข้า
การหลวงการหลาย มันยายมาถ้า เกาะกุ๋มรุมรา บ่หน้อย

เมื่อใดกั๋นหา มันจาสุดซ้อย มันจะเป่งป้อย วางวาย
จะได้มานั่ง ต้อนรับสหาย ตึงยิงและจาย ตี่ไหลเข้าห้อง

[หรรษา]

เพลงซอก๋ารหลาย มากมายเกี่ยวข้อง ก๋ารซอทำนอง อื่อจ๊อย

เงินทองลาภไหล หาเจ้าปี้น้อย หลายแสนบ่ด้อย เนอนาย
งานนักอย่างนี้ เงินเก็บมีหลาย เพลงซออ้ายนาย แบ่งมาก็ได้
ป้อเลี้ยงทศรรห์ เจยบันไจ้ไจ้ ป้อศรีทรามวัย เงินล้าน

หันท่าหรรษา จะขอยอมก๊าน ไปเ๋ป๋นลูกบ้าน คงดี
ยอมเป๋นลูกน้อง ท่าจะสุขศรี จะหันว่าดี ก่อเจ้าปี้อ้าย.

[เพลงซอ]

อู้หย้อก่อหา หรรษาบ้านใต้ อ้ายปุ๋นดีอาย น้องไท้

น้องยอมลดตั๋ว มาหนั่วซ้อนต๊าย เพลงซอปี้อ้าย ยินดี
เงินทองของใจ๊ เก็บไว้หลายปี๋ หากว่าน้องมี ใจ๋มาจ่วยเฝ้า
คงต้องรบก๋วน จวนตั๋วน้องเหน้า มาจ่วยแบ่งเบา ภาระ

สตังค์ออกเหนา เขาว่าขี้จ๊ะ ขอตั๋วน้องหล้า จ่วยกำ
จ่วยซักล้างซ้วย มาจ่วยกั๋นก๋ำ สะอาดดีงาม เงินคำแหวนแก้ว