รับสมัครนักเรียนค่าว รุ่น 7 ปี 2553

[พูนอุดม.เวียงเขลางค์]

( ขัดเกลาหื้อหรรษา)
หากม่อนแต่งผิดเพี้ยน...............สำนวน
ได้แต่งเป๋นขบวน......................แบบเบ้า
ม่อนขอเปิ่งรบก๋วน.....................ครูท่าน สอนแล
หวังต่อถ้อยแท้เล้า.....................สืบถ้อยกะโลง

[เครือออน]

เจตน์จงของท่านไท้...คุณครู พูนอุดม
ปรับแต่งกะโลงดู.......เยี่ยมแล้
หรรษาเพ่งพิศดู.........ตั๋วอย่าง เต๊อะนา
พิศผ่อต๋ามไท้แก้........เที่ยงแท้มรรคผล.

[พูนอุดม.เวียงเขลางค์]

เครือออนแต่งถูกต้อง.....ตำรา
สัมผัสเอกโทกา...........ครบถ้วน
กะโลงม่วนแท้นา........เอิ้นบอก
ขอชื่นชมนั้นล้วน........ช่วยล้านนาเฮา

[เครือออน]

ยินดีเป๋นยิ่งแล้ว.......ครูเยิน ยอเฮย
เป็นมิ่งขวัญจำเริญ...แก่ข้าฯ
ขอครูหมั่นมาเอิน.....ทุกบ่อย เนอวอน
ตั๋วม่อนจักน้อมถ้า....ท่านไท้มาสอน

[หรรษา]

ขอขอบคุณยิ่งนัก..............ครูเฮย
ตี่ครูบ่ละเลย....................คว่างซัด
ม่อนจะบ่อยู่เฉย................จะฝึก ไปแล
บทบาทไหนแผกปัด...........ขอครูจ่วยขัดเกลา

[พูนอุดม.เวียงเขลางค์]

ขอขอบคุณยิ่งล้น...............ครูเฮย
ตี่บ่ปล่อยละเลย....................คว่างแล้ว
ม่อนจะบ่อยู่เฉย...................จะฝึก ไปแล
บทบาทไหนได้แคล้ว...........จ่วยหื้อขัดเกลา

[หรรษา]

ฝึกเขียนเฮียนยากล้ำ................กะโลง
หวังสืบสานจรรโลง...................แบบเบ้า
กลั๋วสูญหายจากโขง.................เตศต๊อง เมืองเฮา
หัดเขียนอยู่นั่งเฝ้า....................ปอเลอะกระดาน


ยากแต๊ๆครับ

[พูนอุดม.เวียงเขลางค์]

ฝึกเขียนเฮียนยากล้ำ................กะโลง
หวังสืบสานจรรโลง...................แบบเบ้า
กลั๋วปุดขาดจากโขง.................ขอบเขต เมืองเฮา
หัดเขียนอยู่นั่งเฝ้า....................เลอะเปื้อนกระดาน

แต่งกะโลงยากแท้..............แนวทาง
โทเอกต้องจับวาง..............นั่นนี้
ตึงสัมผัสอิงอ้าง...............ตามจุด ดีแล
จะค่อยเดินได้ชี้...............คล่องขึ้นครรลอง

[เครือออน]

เปียรเฮียนเขียนแต่งแต้ม...ตึงวัน
และหมั่นสังเกตบรรณ.......ถี่ถ้อย
เมินไปย่อมชำนาญ..........การแต่ง กะโลงนา
หัดจื่อจ๋ำสร้อยร้อย...........แต่งถ้อยสะสวย

[เครือออน]

นรชนบนแหล่งหล้า......สงสาร
สัตว์สิ่งเหลือประมาณ...ทั่วท้วน
หากมีซึ่งลมปาน.........ชีพอยู่
คนหมู่สัตว์ถ้วนล้วน......เหล่าถ้วนทุกขัง

ดังคำผราชญ์แต่งแต้ม...คำสอน
ทุกข์พ่อทุกข์มารดร.......ท่านไท้
สิบเดือนแห่งอุทร.........อันแม่ ทุกข์นา
เกิดแต่ครรภ์แล้วไซร้....แม่นได้ทุกขัง

ยังชีพยืนอยู่ได้.........ทุกขัง
ลางพ่องต๋ายวันบัง.....เกิดหั้น
ลางคนบ่จีรัง.............เด็กอ่อน ต๋ายนา
ต๋ายหนุ่มต๋ายเถ้านั้น...แม่นหมั้นทุกขัง

ยังชีพยืนอยู่ได้.........ทุกขัง
เจ็บป่วยมาเบียดบัง...จ่องข้อง
ฮักษาซึ่งก๋ายัง.........ลางป่วย ลางดี
ก๋ายป่วยใจ๋ไข้ฟ้อง....แม่นต้องทุกขัง

ยังชีพยืนอยู่ได้..............ทุกขัง
เด็กอ่อนหนังก๋ายัง.........เต่งเหลื้อม
เติบใหญ่ไป่จีรัง.............หยาบเหี่ยว
จักเหนี่ยวหนังหื้อเซื้อม...เหนื่อยเคื้อมทุกขัง

ฟังเถิดเกิดแก่เถ้า.......เจ็บต๋าย
ใผว่ามันสบาย...........ไป่ได้
เป็นทุกข์อยู่จ๋นวาย.....ต๋ายนั่น เลยนา
ต๋ายก่อนต๋ายได้ไซร้...แม่นได้สุขขัง

[พูนอุดม.เวียงเขลางค์]

เครือออนได้แต่งแต้ม........กะโลง
โทเอกได้เชื่อมโยง...........ถูกต้อง
ตึงสัมผัสเขตโขง..............เหมาะเจาะ
สอบผ่านแบบเบ้าซ้อง........ผ่านแล้วต๋ามเกณฑ์

[เครือออน]

ยลยินคำท่านเจ้า..........ครูพูน อุดมเฮย
บอกแต่งได้สมบูรณ์......ว่าอั้น
เครือออนขอบพระคุณ...พูนท่าน อุดมนา
ครูเก่งคอยแต้มปั้น........ม่อนนั้นจึงสม

[เพลงซอ]

แต่งแต้มกะโลงแก้ว กวี
เพลงซอขอลาที ว่างเว้น
พื้นความรู้บ่มี มันยากแต๊นา
อยากจะเขียนขีดเล่น ก่อยเม้นกำลูน


5 เพลงซอแต่งกะโลง บ่จ้างคับ บ่ได้สักน้อย หากเป็นซอ เป็นค่าวเป็นจ้อยนี่ได้อยู่

[เครือออน]

ก๋ายใจ๋มันบ่ได้........แยกกั๋น
มันอยู่สองปองปัน...เกี่ยวข้อง
ใจ๋กึ๊ดสิ่งใดพลัน......ส่งต่อ ก๋ายนา
ก๋ายบ่าวใจ๋เจ้าเค้า...ปิ่นเกล้าพุทธ์สอน

วอนไทยตังไพร่เจ้า...เศิกษา
จ๋อมปิ่นพระพุทธา.....สั่งไว้
ผะดาสิ่งใดนา..........เกิดแต่ ใจ๋เฮย
ใจ๋หนึ่งกึ๊ดแล้วไซร้....สั่งได้ก๋ายเสริม

เติมแถมนัยหนึ่งนั้น...ธัมมา
ธัมม์อื่นตังหลายนา...จื่อไว้
ธัมม์เกิดแต่จิตต๋า......เป๋นใหญ่
ทุกสิ่งเสร็จได้ไซร้.....ป่องได้โดยใจ๋

ใจ๋สำคัญยิ่งแล้ว....ระวัง
ใจ๋นิ่งทรงพลัง.......แน่ไส้
ใจ๋ดีก่อกำลัง........จักผ่อง พฤตินา
ใจ๋นิ่งใจ๋แผ้วไซร้...ย่อมได้มรรคผล

คนใดใจบิ่่นบ้า...ระวัง
ใจ๋บิ่นทรงพลัง...แน่ไส้
ใจ๋ผีก่อกำลัง.....จักเสื่อม พฤตินา
ใจ๋บิ่นใจ๋บ้าใบ้....ห่อนได้มรรคผล

[หรรษา]

อภัยหื้อจิ่มเต๊อะ..........จาวเฮา
ม่อนบ่ได้มาเกลา.........เขียนแต้ม
เวียกก๋ารมาก๋วนเก๋า......เลยพัก กะโลง
ว่างก๋ารก่อยนั่งแอ้ม......เนอเจ้า นายเฮย


ก๋ารอันตี่ว่านั้น...........ดังมี
จักไขเป๋นวาตี............ดั่งอี้
แม่อุ๊ยจื่อบุญมี...........ตกหั้น บันได
ม่อนเลยบ่ลบลี้..........นั่งเฝ้าคุณยาย


ว่างเว้นเมื่อใดจา...........ก่อยเข้า
ฝึกกะโลงแบบเบ้า.........กล๋อนสาส์น
วันนี้ลาครูเจ้า...............หลายวันจิ่มนา
ว่างแล้วก่อยมาขาน.......ฝึกกั๋นวันลูน

ช่วงนี้ผมลาพักแหมสักหว่างเน้อครับ แม่อุ๊ยสบายดีแล้วเมื่อใด ผมก่อยมาเฮียนใหม่ครับผม

[เครือออน]

เพลงซอบอกพ่อไว้......ขอลา
ใจ๋หวั่นไหวในครา........เมื่ออั้น
หรรษาพร่ำมาลา.........แถมหนึ่ง คนแล
เหลือม่อนคนเดียวนั้น...อยู่หั้นใจ๋เหงา

[หรรษา]

บ่ใจ่ขอลาลับ.............หนีหาย
แค่ช่วงนี้บ่าดาย..........หายจ้อย
กะโลงค่าวบ่มาย.........ยังอยู่คงเดิม
กันว่างจักต่อถ้อย........เรียงร้อยสืบสาน

[เครือออน]

หรรษามาเอ่ยถ้อย......ขานไข
เพียงช่วงเดียวขอไป....อยู่เฝ้า
คุณยายตกบันได........เจ็บนัก แก่นา
ยายห่อมหายแล้วเล้า...จักเข้ามาเขียน

เปียรเอาเต๊อะอยู่เฝ้า....ยายหรรษ์
ยายห่อมหายเร็วพลัน...เน่อเจ้า
ฮักษ์ยายกี่คืนวัน.........สุดแต่ หรรษ์นา
ยายห่อมหายแล้วเล้า...ค่อยเข้ามาเขียน

[หรรษา]

ป้อเครือออนเจ้าเฮย..............ไขขาน
กะโลงตอบยังหลาน...............ม่อนข้า
เป๋นแนวหื้อสืบสาน................ต่ำนาน กะโลง
ถึงแม้ม่อนเฮียนจ๊า................แต่ใจ๋ป่ำเปียร

[เพลงซอ]

หรรษามาจ๋าตั๊ก พาที
มาเอื้อนเอ่ยวาที แม่นตั๊ด
คุณยายจื่อบุญมี ฮ่อมหาย มายแควน
หื้อเจ้ายอดเมืองแมน ย้อนเข้ามาใจ

เพลงซอหาได้หลีกลี้ หนีไป
ยังมีใจ๋อาลัย ห้องนี้
เพียงแต่ยังบ่ได้ ขานไข คำกลอน
เพลงซอกว่าจะเขียน เปียรได้ ยากเฮย

วุ๊ย ยากแต๊เฮยเฮา!!!

[หรรษา]

ผมก็ว่าว่ายากนัก................กะโลง แต่งเฮย
เขียนนับหนึ่งบรรจง.............บาทถ้อย
ลางเตื่อผมมึนงง.................ยากแต๊ นักแก
ปั๋ญญาผมมันด้อย...............บ่เกิ่งก้อยเพลงซอ

[เครือออน]

เจิงบทกลแต่งถ้อย.....กะโลง
ตั๋วม่อนฝึกเฮียนโฮง...ที่หนี้
ครูพูนเพิ่นจรรโรง......โคลงสี่ กะโลงจัย
จิตจ่อแบบเบ้าชี้........ถี่แจ้งแผงผัง

ที่หนี้ : http://poonudom.khonmuang.com/kalong.html

[หรรษา]

ก่อยหมั่นและนั่งใกล้..............ฮ่ำเฮียน
มันบ่เกิ๋นเกิ๋นความเพียร........ ..อยู่สู้
ขะแนมอ่านและเขียน.............ฝึกแต่ง ไปเนอ
สักวันย่อมหื้อฮู้.....................แต่งอู้ ได้แล

[เครือออน]

อู้มานั้นแม่นแล้ว......หรรษา
เปียรย่อมสำเร็จนา...ว่าอั้น
จักยากอย่างใดจา....เปียรต่อ
จักก่อเกิดสิ่งนั้น.......ดั่งอั้นใจ๋หมาย

[หรรษา]

อาศัยความแก่นนั้น...........บ่ถอย
เปียรต่อก่อยต๋ามฮอย.......เริ่มสร้าง
แบบผังเก่าเดิมคอย..........อยู่หั้น แต่เมิน
อยู่ตี่เฮาแล้วนั้น...............ก่อยค้นสืบเฮียน