ขอถ้องโตยคน

[จาวหละกอน]

สุริยา ไกกาก๊าดก๊อย ลับเหลี่ยมน้อย สุเมธเขาขอน
ตั๋วข้าม่อนน้อย ยอยบน๊บก๋ร ม่อนจาวหละกอน ขอสากราบไหว้
ปี้น้องตังหลาย ตึงเหนือแหละใต้ ตั่วล้านนาไทย เขตนี้
ตี้ได้จ่วยกั๋น บ่อลาหลีกหลี้ จากของอั้น บัวราณ
ของเก่าล้านนา สนุกสนาน ออกในต๋ำนาน แต่เก๊าแต่เหง้า
ค่าวจ้อยเมินมา สืบแต่แก่เฒ่า อุ๊ยป้าลุงเฮา แต่เนิ้น
กันบ่อฮักษา มันตึงบ่าเคิ้น สืบลูกเต้า จายยิง
คนบ่าเดี่ยวนี้ ไผบ่ออาสิง อู้ต๋ามความจริง ลืมเก๊าแหละเหง้า
ของเก่าเมินมา บ่อเป๋นแบบเบ้า ฟั่งสั๊วะตุมเอา ขว้างละ
หันของล้านนา เป๋นของขี้จ๊ะ ล้าสมัยอั้น เมินไป
ไปเอาของเปิ้น เป๋นอกเป๋นใจ๋ แล้วล้านนาไทย สูญหายเป่าจ้อย
ปี้น้องตังหลาย จุ๋งฟังข้าข้อย หยังมายินดี แต๊แต๊
อ้ายพูนอุดม บ่าเกยยอมแป้ เยี๊ยะเอาจ๋นได้ เนอนาย
กันหลับลุกเจ๊า กิ๋นผักยอดป๋าย ย้อนอ้ายเสียดาย ของดีเก๊าเหง้า
ตั้งเวปขึ้นมา หลายปี๋ขวบเข้า จ๋นปอใหญ่เอา ม้าวม้าว
ลูกศิษย์ลูกหา นักหนาอะค้าว ปอนับบ่อได้ หลายปัน
เมินนานมาแล้ว บ่อได้ปะกั๋น เป๋นสังจามัน หละกอนตู๋ข้า
หยังมาดีใจ๋ เจ้าเกี๋ยงกาบอ้า ได้ไขวาตา ตอบปิ๊ก
ได้มาแอ่วหา น้ำต๋าย้อยปิ๊กซิก เต๋มใจ๋ ตู๋ข้า คนโตน
ของเก่าเฮานี้ สืบหลานเหลนโหลน กะหล้างว่าโดน ใจ๋แห่งใหญ่น้อย
แวะมาแอ่วหา เนอตั๋วข้าข้อย กลั๋วโตษเต๊าดอย แหละฟ้า
บ่อได้แข่งขัน ประจันแข่งต้า หลอนผิดผลาดพลั้ง สูมา
ความฮู้บ่อนัก มอกปล๋ายปากก๋า ม่อนขอสูมา ผู้ฮู้แก่เฒ่า
ผะหูสุตตั๋ง ได้ฟังข้าเจ้า ยกปื้นตี๋นฟังเอา เต๊อะไท้
ขอเอาบุบผา มาลาดอกไม้ ลวดกราบไหว้ สูมา
หลอนผิดพลาดพลั้ง กำอู้กำจ๋า อะหังวันตา ไหว้สากราบไหว้

[เครือออน]

ได้ฟังกำขาน มาหวานแต๊ใบ้ เหมือนกิ๋นแต๋งลาย กะทิ

ค่าวสร้อยระบำ ท่านนั้นชำนิ ลิขิตขีดแต้ม ลวดลาย
ยอครูพูนเล้า แต่เก๊าสุดปลาย หละกอนเนอจาย สหายสองเถ้า
เครือออนไหว้สาธุ์ วันตาเน่อเจ้า จาวหละกอน รถม้า

วันนี้ดีใจ๋ ตี้ได้ท่านน้า เมธีแกว่นกล้า มาเติม
กระดานค่าวนี้ จักมีคนเสริม ฮ่วมกับคนเดิม แต่งเสริมค่าวสร้อย.

[ล้อเลื่อน]

ดีใจ๋แต๊หนา ได้มาต่อถ้อย คนจาวหละกอน รถม้า

แต่นี้ต่อไป คงไวบ่จ๊า มีคนนั่งถ้า หมู่เฮา
ห้องค่าวเฮานี้ คงบ่มีเหงา เหมือนกลิ่นดอกเปา เข้าฮูดังเผิ้ง
หอเฮือนโบราณ เสามันไหวเซิ้ง มาร่วมกั๋นเปิง จ้วยก๊ำ

ครูพูนอุดม อุดมเลิศล้ำ ปราชญ์ของจาวบ้าน คนเมือง
ศิษย์คนนาล้าน ต่อถ้องพ้องเสียง เวปค่าวคนเมือง ได้อยู่คู่บ้าน

[จาวหละกอน]

ยอผะหน๋มก๋ร เครือออนต่านไท้ ขอยกมือไหว้ ขอไป่มือสา
ตั๋วข้าม่อนน้อย ยังด้อยผะหญ๋า บ่อสมวาตา มาจ๋าว่าอู้
คารมณ์บ่อสม บ่อไหลหลิ่งหลู้ เหมือนนกเขากรู ลั่นฮ้อง
ขอคารวะ ฝากตั๋วเป๋นน้อง จ่างได้ก็เจ้า เครือออน
อันใดบ่อตั๊ด ขอวานบอกสอน ม่อนจาวหละกอน กว่าหวิดขาดบั้น
วิชาปัญญา ม่อนบ่อเถิงขั้น อย่าได้ตัดบัน ขว้างละ
ขอฝากเนื้อตั๋ว ขออิงเติกป๊ะ กะหล้างว่าได้ สักคน
เป๋นน้องใหม่แต๊ กำลังสับสน บ่าฮู้ลุ่มบน ขอฝากตั๋วข้า ขอฝากตั๋วข้า ก่อนแหละนาย

[เครือออน]

จาวหละกอน บทกล๋อนแกว่นกล้า จาใดว่ามา ฝากเนื้อ

ฝากตั๋วทำไม ป้อนายบ่าวเจื๊อ กระดานค่าวเอื้อ กวี
มาเต๊อะปี้ไท้ อย่าได้หลีกหนี มาเต๊อะคนดี ศรีหละกอนบ้าน
มาช่วยแต่งเสริม มาเติมเต๋มด้าน ในค่าวกระดาน แห่งนี้

ผิดถูกอย่างใด มาไขบอกจี๊ ป๋ะกั๋นตี้หนี้ เนอนาย
ยินดีจ้าดนัก มิตรฮักสหาย จาวหละกอนจาย อ้ายขอฮับต้อน.

[พูนอุดม.เวียงเขลางค์]

ดีใจ๋แต๊หนา คนมาไหลข้อน โฮงเฮียนค่าวซอ วันนี้

มีจาวหละกอน มาจ๋ากล่าวจี๊ ได้แต่งค่าวสร้อย คำงาม
น้องบ่าวมาตั๊ก ดีใจ๋ล้นหลาม อ่านค่าวจายฮาม ม่วนงันบ่หน้อย
หมั่นแว่เข้ามา ใจ๋ดีเป่งป้อย แต่งค่าวฮอมปอย ม่วนแต๊

ค่าวซอมีหลาย อ่านปอบ่แป๊ หลายคนแต่งค่าว ซอใย
เข้ามาแหมเต๊อะ แต่งค่าวเป๋นสาย เครือออนป้อจาย ก็หมั่นแว่เข้า
คนบ้านเดียวกั๋น บ่หมองหม่นเศร้า มีจาวหละกอน เอิ้นตั๊ก

หายหน้าไปเมิน แต่งค่าวหื้อนัก หื้อหมั่นมาหยื้อ มาไจ
ค่าวซอของมัก บ่ดีหนีไกล๋ แต่งค่าวซอใย ไปกั๋นหล้องหล้อง

มาแต่ง

[เครือออน]

หมู่เฮากึ๊ดเถิง กึ๊ดเติงจ้องจ้อง วันนี้ครูปอง ป้อกปิ๊ก

มาอู้เจิญจวน มวลสมาชิก แลลูกสิกข์เจ้า ครูพูน
กระดานค่าวนี้ บ่มีวันสูญ จำเริญเพิ่มพูน สมบูรณ์ไปหน้า
ครูแวะมาไจ ดีใจ๋แต๊ข้า คาระวันตา เน่อครับ

ขอหมั่นมาหา อย่าลาหนีลับ ขอกลับมาเหยี้ยม มาไจ
เครือออนม่อนนี้ บ่หนีไปไหน เวียนวนอยู่ใน กระดานค่าวสร้อย.