นักเรียนใหม่เจ้า

[เก็จถะหวา]

เป๋นนักเรียนใหม่ อยากได้กำค่าว
ใจ๋ดีจุ่มย้าว เรียนค่าวตั้งนี้

บ่อเกยหัดเขียน ขอเปียนบ่อลี้
หวังว่าจะดี มีครูจ่วยสอน

ขอน้อมไหวสา มือประนมก๋ร
ปี้อ้ายเครือออน เปิ้นแนะนำหื้อ

ขอสักการะ ครูตี้สอนหื้อ
จะขอจำจื่อ ครูพูนอุดม

เปิ้นใจดีล้ำ ก้ำจ่วยสวยสม
ภาษานิยม กำเมืองว่าอั้น

ฮักษาเอาไว้ บ่าได้ขีดคั่น
เผยแพร่ตึงวัน ออนไลน์แหมซ้ำ

ขอฝากตัวไว้ จะได้เฮียนฮู้
ขอไหว้สาครู เต้าอี้ก่อนแล.....

[พูนอุดม.เวียงเขลางค์]

หันนักเรียนใหม่ ดีใจ๋ชุ่มย้าว ได้มาแวะเข้า แต่งค่าววจี๋
ได้อ่านค่าวแล้ว ก็ตึงสุขศรี ค่าวม่วนงันดี สำนวนไหลข้อน
รับไว้เป๋นศิษย์ จะแนะจะป้อน สอนฟรีบ่มี ขายซื้อ

หื้อหมั่นเข้ามา จุวันจุมื้อ จะจ๋ำจื่อได้ คารม
หัดแต่งหื้อนัก สำนวนเหมาะสม ครูพูนอุดม จะสอนหื้อเจ้า
มีตึงสัมผัส ต๋ามผังแบบเบ้า วรรณยุกต์มี แต๊ตั๊ก

แต่งวันละหน้อย บ่มีเว้นวรรค จะได้ค่าวสร้อย ซอใย
หัดแต่งกั๋นไป บ่ได้กีดกั้น วันนี้ขอวางลง ก่อนแลนายเหย

( ส่งอีเมลมาก็ได้ครับ ta_udln13@yahoo.com )

[ล้อเลื่อน]

ยินดีต้อนฮับ น้องเก็จถะหวา ขอเจิญเข้ามา ศึกษาร่วมห้อง

[เครือออน]

ปอซัดต๋าหัน บทบรรณค่าวจ๊อย ของนุชน้องหน้อย นามสร้อยบุปผา
รายนี้ตึงเหน็ด น้องเก็จถะหวา เป๋นกัลยา แม่ทาแห่งห้อง
เสียงเล่าลือจา นามากึกก้อง ทั่วท้องนภา บ้านแพะ

เพิ่นคงตั้งใจ๋ มาไจมาแวะ และเขียนค่าวสร้อย กระดาน
ยินดีแต๊เล้า ที่เจ้ามาขาน มาเต๊อะนงคราญ มาจ๋ารแต่งถ้อย
มาทำความเปียร มาเขียนวันหน้อย ร้อยวันปันวัน ชำนิ

ขอเก็จถะหวา มาช่วยเริ่มริ เริ่มสร้างว่าอั้น ค่าวซอ
ยินดีต้อนฮับ บังคับแก๋มขอ หมั่นมาเต๊อะนอ มาต่อค่าวสร้อย
รอเก็จถะหวา มาจ๋ากล่าวถ้อย พี่หนานจักคอย ตั๊ดนี้

ครูพูนอุดม เพิ่นจักช่วยจี๊ เครือออนจักจี้ แถมแฮง
อย่าระแวง ตังครูและข้า อย่าจ๊าเร่งมาไว ดอกไม้เก็จถะหวา.

[กันนา]

ยกมือสา วันตากราบนบ ท่านที่เคารพ ครูค่าวทั้งหลาย
ในโอกาสนี้ ขอจี้ขยาย เป๋นต๋าดีอาย กับตั๋วข้าเจ้า
จาติเกิดมา เป๋นคนเมืองเจ้า บ่าเกยเขียนค่าว สักกำ

ขอฝากศึกษา ขอมาช่วยก้ำ หื้อเขียนสักกำ หลั่งได้
หื้อหมู่พี่น้อง ตี่อยู่ไกล้ไกล ตี้ไหนตางใด ขอจ่วยเตื่อมตุ้ม
เขียนกลอนซอใย ตางใดก่อกุ้ม สอนเป๋นหมู่จุม เพื่อนพ้อง

[พูนอุดม.เวียงเขลางค์]

รับเป๋นลูกศิษย์ ลิขิตเขียนไว้ แต่งค่าวหื้อได้ สำนวนภาษา
หัดแต่งค่าวนี้ เอาไว้เต๊อะหนา คนชื่อกันนา ได้แต่งค่าวสร้อย
อ่านค่าวนงวัย ม่วนงันบ่หน้อย คนมาอ่านกอย ผ่อซ้อง

แต่งมาแหมเต๊อะ ไผบ่ขอร้อง สืบสานค่าวสร้อย ของดี
ค่าวล้านนานี้ มีศักดิ์มีศรี ย้อนว่ายังมี คนฮักค่าวสร้อย
เจ้าหมู่ตังหลาย เรียบเรียงคำถ้อย ตอบโต้กั๋นไป ม่วนนัก

[เครือออน]

ยินคำกันนา มาจ๋าเอ่ยตั๊ก สำนักค่าวสร้อย ครูพูน
ครูก็มาฮับ สนับสนุน เป๋นศิษย์ครูพูน อุดมค่าวห้อง
ยินดีแต๊หนา กันนามาถ้อง เครือออนขอฮอง ฮับไว้

จาติว่าเสือ มันขึ้นต้นไม้ จักเก่งบ่ได้ เหมือนแมว
แต่กันนาน้อง ช่ำชองทุกแถว จักเสือหรือแมว ผดแผวรอบด้าน
มาเต๊อะกันนา มาช่วยแปล๋งบ้าน แปล๋งเมืองล้านนา ปิ๊กฟื้น

มาฮ่วมหมู่เฮา ลำเนาเมืองปื๊น มาฟื้นค่าวสร้อย ล้านนา
ได้กันนาน้อง แลเก็จถะหวา มาช่วยแถมนา เชื่อว่าฟื้นได้.