เจิญเฮาพี่น้อง มาถ้องค่าวกั๋น ตั๊ดนี้ตึงวัน หันโตยก่อเจ้า

[เครือออน]

หลายวันมา ได้ลาหลีกลี้ หายจากที่นี่ เพราะมีเวียกก๋าร
อันที่จริ๋งแล้ว แวะแอ่วเหมือนกั๋น กึ๊ดแต่งบ่ตัน ได้แต่อ่านถ้อย
หากปล่อยเมินไป กลั๋วหายเสียจ้อย เหมือนเครือบ่านอย เหียวม้าน

ผ่อเหมือนมันเขียว แต่เหียวบนฮ้าน บ่งอกกิ่งก้าน ตายลง
แถมนัยหนึ่งนั้น มันขัดผะสงค์ ค่าวที่เขียนลง บ่ตรงหัวข้อ
อ่านกระทู้ใด ก็ไหลมาป้อ อู้หยอกกั๋นนอ ม่วนล้ำ

อ่านถ้อยหลายอัน มันวนเวียนซ้ำ ทำหื้อหัวข้อ เปลี่ยนนัย
จึ่งมาได้กึ๊ด จักยึดอันไหน จักเอาอันใด เอาไว้ต่อถ้อย
ผ่อกระทู้ใด ก็หลายบ่หน้อย จึงขอวางฮอย ใหม่นี้

เป๋นที่ปะกัน เติงตันบอกจี๊ ปะกั๋นที่นี่ หนึ่งอัน
เจิญเฮาพี่น้อง มาถ้องค่าวกั๋น ตัดนี้ตึงวัน หันโตยก่อเจ้า

[บุคคลทั่วไป]

หันตวยแต๊หนา จะมานั่งเฝ้า เจิญเต๊อะหมู่เฮา ปี้น้อง

ต่อถ้องคล้องใจ๋ ในหมู่เพื่อนพ้อง เปิดกระทู้ห้อง ออนเครือ
มาต่อมาล้อ มาจ้อคำเหนือ ฮ่วมกั๋นลงเรือ เครือออนปี้อ้าย
มาฝังเสาธง ปั้กลงติ้ดป้าย ฮ่วมสาธยาย ตั๊ดนี้

ไผมีปั๋ญหา มาจ๋ากล่าวจี๊ ถามตอบตี้นี่ เนอนาย
เจิญกั๋นนะครับ มิตรฮักสหาย ตึงญิงตึงจาย ต๋ามสบายนะเจ้า.

[หน้อยต๊ะเวียงต๋าน]

จุมกั๋นหลายหลาย มายายมาเข้า ห้องนี้ห้องเดียว ก่อฮ๊ะ

เหมือนว่าป๊ะกั๋น เป๋นหมู่คณะ มาจุมมาถ้อง ห้องเดียว
จะได้ผูกมัด ผูกฝั้นเป๋นเกลี๋ยว ลงเรือลำเดียว ใจ้ก่อป้อเฒ่า

เฮียนฮู้จื่อจ๋ำ ตำนองแบบเบ้า ของเมืองเหนือเฮา ตั๊ดนี้

ใจ้ก่อจาหา จ้วยจ๋าบอกจี๊ ม่อนก้อกึ้ดอี้ มาเมิน
เพียงมาห้องนี้ จั้งดีเหลือเกิ๋น ได้ม่วนได้เพลิน ตอบถ้องฟู่อู้
เผียบได้ป๊บกั๋น มากมายหลายผู้ มาป๊ะป๊บจู ปี้น้อง

ในตี้แห่งเดียว ใจ๋เกี่ยวจ่องก๊อง เมื่อมาแห่งห้อง นี้กา
อย่างว่าหน้อยต๊ะ ไค่ป๊ะหรรษา สบลี้ปิมปา เพลงซอก้อได้
ป๊ะจาวหละกอน เครือออนบ้านใกล้ ใจ้ก่อป้อนาย ไค่ฮู้

[หน้อยต๊ะเวียงต๋าน]

เงียบปิ้งเย็นวอย หายสอยคุดคู้ ไปดูบอลโลก อั้นกา
เครือออนสบลี้ ปี้หน้อยหรรษา ไผตึงบ่มา ฟู่จ๋าตอบถ้อง
ไปอยู่ตี้ไหน บ่มาแวะข้อง ม่อนข้าฯมากอง ตั๊ดนี้

กาว่าเสียใจ๋ ตี้ทีมเปื้อนซี้ บ่ได้เป๋นแชมป์ ฟุตบอล
ปากั๋นพลิกล๊อค ภาพมันโตยหลอน จ๋นป้อเครือออน เซาซึมโสกไหม้
เพลงซอก่อกลื๋น ข้าวปอบ่ได้ ทีมฮักป้อนาย พ่ายแพ้

จาวหละกอนแหม หลบเหมือนกับแย้ ยินเสียงฟ้าฮ้อง คำราม
ปิมปาน้องฮัก บ่มาตั๊กถาม หรือกะลังดาม หัวใจ๋เป๋นไข้
ส่วนตั๋วหน้อยต๊ะ ว่าจะบ่ใกล้ ยังเสียเงินไป หลายปึ๊ก.

[เพลงซอ]

เขาไปเชียร์บอล อดนอนต๋อนดึก เหื่อย้อยปึกซึก ลงปัง
ทีมไหนแป้ก๊าน มันอนิจจั๋ง พ่องเสี้ยงสตังค์ บ่นักก็น้อย
น้อยต๊ะเวียงต๋าน ขานมาเป็นถ้อย บอกมาหื้อกอย ห้องนี้

เครือออนป้อจ๋า ได้มากล่าวจี้ ขอเป็นห้องนี้ ก็ปอ
ที่ผ่านมานั้น มันหลายแต๊หนอ สุดแต่เพลงซอ ขอหลีกทางเต้น

[เครือออน]

มากั๋นหลวงหลาย เรียงรายเป๋นเส้น ปากั๋นเข้าเวร มาตั๊ก

ยินดีจ้าดหลาย สหายที่ฮัก สำนักแหล่งหล้า เมธี
ที่ได้เวียนแวะ และฮับไมถี ข้าแสนยินดี ที่ได้ฮับต้อน
เฮามาฮอมสุม เป๋นกลุ่มเป๋นก้อน มาเฝิกสุนทร ค่าวจ๊อย

เป๋นก๋ารเศิกษา หาคำเรียงร้อย สื่อสารตอบถ้อย ไปมา
กระดานค่าวนี้ เป๋นที่หรรษา เมธีล้านนา ปากั๋นมาถ้อง

[เพลงซอ]

กำอู้ฟู่จ๋า ไหลมาหลิ่งหล้อง ดังกั๊บก๋างกอง ของแต๊

หื้อมันม่วนใจ๋ ไผบ่ท้อแท้ ต่างได้เล็งแล เมียงมอง
เพื่อหื้อห้องนี้ อย่ามีหม่นหมอง ต่างใจ๊ออออง สมองต่องเต้น
ข่าวสารอันใด บรรยายเป็นเส้น หื้อเป็นประเด็น ความฮู้

บางพ่องยะการ ทำงานคุดคู้ บ่ได้จ๋าอู้ คนใด
ข่าวสารตังนอก ไผบ่บอกไผ หากเข้ามาใน จักได้ถี่แจ้ง

[เครือออน]

มาช่วยกั๋นเสริม มาเติมแต่งแถ้ง สื่อสารปั๋นแปง แหล่งรู้

มาจ๋ารแต้มเขียน เกษียนกระทู้ ฮ่ำเป๋นคำอู้ สู่ฟัง
กะโลงค่าวนี้ จักมีความหวัง คงฟื้นคืนยัง มาดังใหม่ได้
ขอเจิญสหาย ตังหลายเหนือใต้ ออกตกทั่วไป ทุกทิศ

มาเล่าอู้จ๋า เปิกษามิ่งมิตร ชีวิตเล่าได้ ร้ายดี
เรื่องของมนุษย์ บรุษอิตถี จักทุกข์หรือมี ที่นี่รับต้อน.

[หน้อยต๊ะเวียงต๋าน]

ก๋ำไฮมากหลาย ซื้อขายไหลข้อน แบกปิ้กหาบคอน เต๋มซ้า

บ่ากลั๋วปุ้ดตืน คืนหื้อลูกค้า เมื่อมาเปิดอ้า ความใน
ค่าวซอค่าวจ๊อย ค่าวสร้อยผูกสาย ผิดถูกอย่างใด จ้วยไขจ้วยแก้
ต้กแต่งแป๋งต๋าม หื้องามแพ้แหล้ ผ่องามนักแก หนาครับ

ตั๋วปี้ฮู้สอง ตั๋วน้องยอมฮับ จึ่งนับว่าได้ เมที
ปุจฉาจ๋าฮ้อง ต๋ามห้องวิถี เป๋นแนวกวี วลีตอบถ้อง

[เครือออน]

คนหล่อมาถาม คนงามมาจ้อง คนแก่มาลอง จ๋าตั๊ก

มาเต๊อะหมู่เฮา แวะเข้ามาพัก สำนักค่าวสร้อย กระดาน
มาเฝิกเขียนคัด มาหัดขับขาน มาซ้อมชำนาญ มาจ๋ารแต่งถ้อย
เฮามาปะกั๋น สักวันละหน้อย หื้อหมั่นมากอย มาแวะ

ลูกสิกข์มาขาน อาจ๋ารย์มาแนะ และกวีกล้า มานำ
เล่าสาระตุ๊กข์ สุขดิบบุญกั๋มม์ เฮาใผกระตำ นำมาแต่งแต้ม.

[เพลงซอ]

ไหลเข้ามาจู ดูเหมือนกู้แอ้ม จ่วยกั๋นมาแซม บางครั้ง

เหนื่อยอิดอ่อนใจ๋ หื้อไหลมายั้ง จะยืนจะนั่ง หลับนอน
ผักผ่อนก๋ายใจ๋ ลูบไล้บทกล๋อน เจ๊าสายบ่ายตอน หื้อมานอนเหล้น
อากาศเป็นใจ๋ ฝนสายเป็นเส้น สมควรพักเอน เมาะม้อย

ปล่อยต๋ามอารมณ์ จื่นจมอ่อนช้อย ไปตามลมจอย บางเบา
รับรองห้องนี้ คลี่ความเงียบเหงา เป็นเปื่อนหมู่เฮา คลายเหงาบ่น้อย

[เครือออน]

นับเป๋นสนาม ไว้จามต่อถ้อย เขียนค่าวโพสต์ลอย ลัดฟ้า

เล่าเรื่องตังหลาย งัวควายจ๊างม้า ต้นไม้ใบหญ้า หินธาร
ลาภยศสุขทุกข์ สนุกสนาน สมบูรณ์กันดาร มาจ๋ารเล่าถ้อย
น้อยต๊ะเวียงต๋าน ก็หวานบ่หน้อย เพลงซอก็คอย เวียนตั๊ก

เหลือแถมหลายคน ศิษย์ก้นสำนัก แห่งครูพูนเจ้า อุดม
เพื่อนเฮาใกล้ชิด สนิทสนม หายไปกับลม บ่สมใฝ่อ้าง.

[ล้อเลื่อน]

สงสัยแต้นา ว่าคนข้างๆ จะปลดละวาง เสียแล้ว

ขอแซวหรรษา หนุ่มหน้าแอ๊บแบ๊ว ไปหาแหม่งแก้ว แล้วกา
จึงบ่มาโพสต์ ตอบทู้อู้จ๋า ง่อมหาแต๊นา สังมาหายจ้อย
ปล่อยห้องหมองเหงา ซบเซาละห้อย เหมือนเคลือบ่านอย เหี่ยวม้าน

ป้อหนานออนเคลือ เอื้อเฟื้อแป๋งฮ้าน ปลูกบ่านอยบ้าน ดินซุย
ปี้อ้านหน้อยต๊ะ เข้ามาใส่ปุ๋ย เพลงซอก็ลุย ถูกใจ๋หลายถ้อย
หยอดกำหวานๆ เหมือนต๋าลป๋นอ้อย อ่านแล้วก็พลอย ลืมตุ๊กข์

เล่นบอลทรัพย์จ๋าง เสียตางค์เป๋นปุ๊ก ล้อเลื่อนอ่อนเปลี้ย เสียแฮง
ฟื้นแล้ววันนี้ ฟั่งรี่มาแป๋ง ขอแซวแฮงๆ หรรษาซักหน้อย

[เครือออน]

ล้อเลื่อนเข้ามา อู้จ๋าตอบถ้อย เหมือนเครือบ่านอย ได้น้ำ

มันจุ้มหัวใจ๋ ปายในเจ้นล้ำ เหมือนน้ำฮดต้น บ่านอย
เครือตี้เหี่ยวม้าน มันฟื้นคืนถอย ยอดเขียวชูลอย ดอกนอยคลี่อ้า
หรรษามารอ ล้อเลื่อนมาถ้า คนละเวลา ห่อนป๊ะ

นัดกั๋นดีดี มีวิริยะ จักป๊ะกั๋นเข้า สักวัน
ล้อเลื่อนน้อยต๊ะ หรรษาทศรรห์ นัดกันสักวัน ป๊ะกั๋นตี้หนี้.

[หรรษา]

เวลาตรงกั๋น มันยากผี้หลี้ จะเยี๊ยะใดดี ปี่น้อง

บางวันเพลงซอ มารอร่ำร้อง คนอื่นบ่ถ้อง แวะเวียน
บางวันลุงล้อ มาแวะอ่านเขียน คนซ้ำบ่เวียน เข้ามาตอบถ้อง
บางวันเครือออน รออยู่ในห้อง เอ่ยหลายทำนอง อยู่ไป๊

บางวันหรรษา ก็มาเขียนไว้ มิตรค่าวบ่ได้ ตอบเลย
เวลาว่างนั้น ตรงกั๋นนั้นเหย วิดวิดเลยเลย ขาดขาดก้อมก้อม.

[หน้อยต๊ะเวียงต๋าน]

บ่มีวิดเลย บ่มีขาดก้อม เผียบเฮาต๋อมฮอม สาระ

ได้มาฟู่จ๋า มาคารวะ มาเอ่ยวาทะ วาที
เอื้อนเอ่ยปากตั๊ก สำนักเมถี กำสุนทรี วลีค่าวสร้อย
วิสัชปุจฉา ปัญหาถ้องถ้อย เผียบฮอมงานปอย ค่าวจ๊อย

เครือออนป้อหนาน หรรษาปี้น้อย ลุงล้อต่อถ้อย เพลงซอ
ม่อนข้าฯหน้อยต๊ะ มาหาแล้วหนอ ขอยกมือยอ จุ้ต้านจุ้ผู้.

[ล้อเลื่อน]

ดีเจชุมชน ได้วลมาอู้ มาจ้วยฟื้นฟู ค่าวจ๊อย

วันนี้ป่ะกั๋น เดิมพันสองร้อย จะนั่งต่อถ้อย หน้าคอมฯ
มาเจอหน้อยต๊ะ เฮาฟั่งมาต๋อม ล้อตึงบ่ยอม ขอรออยู่ถ้า
เจิญเลยเพื่อนฝูง พร้อมลุงและป้า มาถ้องวาจา กั๋นเต๊อะ

เมธีจายญิง มาอิงเติกเม๊อะ สวะก๋ารไว้หั้น ก่อนนา
มารำมาฟ้อน ก่อนเข้าพรรษา วันดองวันดา เจิญมาต่องถ้อง

[เครือออน]

เครือออนนี้หนอ ตึงบ่ขัดข้อง มาถ้องตึงวัน ตั๊ดนี้

ล้อเลื่อนมาดา หรรษามาจี๊ หน้อยต๊ะมาจี้ เพลงซอ
วะสาปี๋นี้ ตุ๊ปี้เปิ้นขอ ไปวัดกั๋นนอ ตุ๊ขอจาวบ้าน
เมาเวียกเมาก๋าร กั๋นจ๋นเสี้ยงถ้าน อ้างก๋ารอ้างงาน หนีวัด

วันพระวันศีล มันอัตคัด ไปวัดสี่ห้า หกคน
คนบ่าเดี่ยวนี้ ล่นหนี้กุศล เมืองฟ้าเมืองบน บ่สนใจ๋สร้าง.

[หน้อยต๊ะเวียงต๋าน]

ตี้บ่ได้ไป บ่ได้กล่าวอ้าง จะบอกหื้อฟัง หนาครับ

ใจ๋มันบ่ฮอม บ่พร้อมจะฮับ ศิลแปดศิลห้า ฟังธรรม
เมื่อไปนั่งวัด ใจ๋หวิ้ดใจ๋หวาม กึ้ดหาคนงาม ตี้อยู่บ้านใต้
กลั๋วคนตี้เขา อยู่บ้านใกล้ๆ จะไปแวะใจ นาฏน้อง

กราบแต่ละที ใจ๋นี้ฮ่ำฮ้อง กลั๋วเขามาข้อง แวะใจ
ปวดหัวเจ้นล้ำ คนมีเมียหลาย ละวุ่นละวาย เหมือนปล๋าไหลข้อน
ตะวาโทรฯมา ว่ารถไปซ่อม เปิ้นเอาก้ามือ เจ็ดร้อย

บ้านเหนือโทรมา หาตั๋วปี้หน้อย ขอเปลี่ยนสายสร้อย ข้อมือ
บ้านกล๋างมาอ้อน ขอเปลี่ยนมือถือ ไห้อยู่ฮือฮือ จะซื้อจ๋นได้
มีบ้านกล๋างเหนือ มีตึงบ้านใต้ จะไปอย่างใด เล่าครับ

เมียแต่ละคน สวยงามกำชับ หุ่นสูงนุ่งสั้น เอวลอย
เมียหลายคนล้ำ จ๋นเขาปอขอย ป้อหนานกึ้ดกอย จะไปไหนได้.

[หรรษา]

กิ๊กอยู่บ้านเหนือ แฟนอยู่บ้านใต้ น้อยต๊ะเล่าไป จะนั้น

จะแต๊ก่อหา เจ้าราปี้จั๊น เรื่องนั้น ว่าอั้น กิ๊กแฟน
คนเข้าวัดนั้น อะหยั๋งมาแก๋น อ้างเอาเรื่องแฟน เข้ามาขวางกั้น
อู้เหล้นบ่าดาย เนอเจ้าดอกฝั้น หยอกกั๋นแล้วพลัน หัวเราะ

หื้อหน้าต๋าใส ยิ้มไปสมเพราะ ขอดเขาะหลั่งต้อม กำซอ
วะสาปี๋นี้ ผมก็ตึงขอ หมู่เฮาจ่างซอ ไปวัดก่อเจ้า.

[หน้อยต๊ะเวียงต๋าน]

มันมีแต้หนา หรรษาหนุ่มเหน้า ข้ออ้างคนเฮา หนีวัด

เป๋นเพียงหนึ่งเดียว ตี้หันชัดชัด เอ่ยอ้างเรื่องกิ้ก เรื่องเมีย
ข้ออ้างต่อนั้น เลื่อนล้อป้อเสือ ขอได้จุนเจือ ตี้ป้อเกยอ้าง
อ้างดีล้ำเหลือ แม่เสืออยู่ข้าง เป่าหูจ๋นนาง มูบมู้

จ๋นเชื่องซึมเซา หมู่เฮาไค่ฮู้ กำตี้อ้างอู้ กับนาง
ไปขวาไปซ้าย ไปหน้าไปหลัง หยังมาเจื้อฟัง เพราะหยังปี้ข้า

[หรรษา]

บ่ได้ว่ากั๋น เนอเจ้าเมฆฝ้า ตี่อ้างเอ่ยมา ก่อนนั้น

เรื่องวัดเรื่องวา นั้นกาปี้จั๊น บ่ว่างจากอั้น เวลา
ก็จ่างมันเต๊อะ วันหน้าก่อยสา ย้อนว่าเวลา มันฮัดหนีบแหน้น
ผมก็เหมือนกั๋น บ่ตันได้แหง้น ลางเตื่อยังแควน ห่อนพัก

ลางเตื่อนั้นหนา เวลาบ่นัก เลยมักบ่เข้า วัดวา
ลางเตื่อว่างแล้ว ข่วงแก้วไหว้สา เป๋นบางเวลา ก่อยสากราบเกล้า.

[เครือออน]

จักปล่อยเวลา ดาฮอดเฮาเถ้า หันท่าบ่เลา แน่ซัด

สั่งสมบุญญา ป๋ารมีทัศ ต้องห้ดแต่หน้อย รามคน
ไปวัดนั้นไซร้ ได้บุญกุศล บ่หมายไปบน ก็คนรอบข้าง
จักสุขารมณ์ จักสมใฝ่อ้าง ก็ด้วยหนตาง สายวัด

วัดสะอาดใจ๋ วัดก๋ายเคร่งครัด วัดมีพระเจ้า วัดวา
วัดอันใดนั้น สำคัญกว่าหา วัดที่ศรัทธา ฤๅวัดข่วงแก้ว.

[หรรษา]

วัดเป๋นสถาน เบิกบานผ่องแผ้ว จะหื้อมีแวว ส่องวับ

อยู่ตี่ศรัทธา เราราเน้อครับ จะขับเคลื่อนด้วย พลัง
ถ้าวัดมีไว้ เปล่าดายขลึมขัง ก็เริ่มรุงรัง หาสังบ่ได้
วัดจะสดใส หื้อหมั่นไปไหว้ ศรัทธานอกใน บ่ละ

วัดก็จะเป๋น ตี่เย็นเปิ่งปะ สังฆะสอนหื้อ ต๋ามแนว
วิถีจาวพุทธ วิมุตเป๋นแถว ถูกเส้นต๋ามแนว พุทธศาสน์หั้น.

[ล้อเลื่อน]

จะไปวัดไหน มีใจ๋เตี้ยงหมั้น ยึดมั่นในบรรพ์ พุทธะ

จะเล่าหื้อฟัง ต๋อนยังหนุ่มนะ ได้ปาสาวหน้อย ทำบุญ
พระเต้สธรรมะ หื้อละเมถุน สองมือยังดุน วุ่นอยู่รอบข้าง
กลั๋วเป๋นบาปหนา ดั่งกำพระอ้าง จึ่งจุ๋งมือนาง ออกวัด

พอออกวัดมา หมามันไล่ฟัด ไล่กั่ดตั๋วข้า คนเดียว
ไค่ไห้ไค่ฮ้อง หน้าปองจ๊ำเขียว เกิ่งร่นเกิ่งเตว เหลียวหลังเหลียวหน้า
ความอายขึ้นเศียร เฮาเหมือนคนบ้า หลายวันบ่มา ก๋ายวัด

วันพระแล้วหนาว เมื่อสาวมานัด ไปวัดกับเจ้า ก่อจา
เฮาบอกวันนี้ ปี้บ่อว่างหนา ความจริงนั้นนา เฮากลั๋วหมาโก้ง