แม่ดอยหล่อ ป้อหางดง

โฮงเฮียนค่าวออนไลน์

แม่ดอยหล่อ ป้อหางดง

Postโดย ล้อเลื่อน » Sat Jan 22, 2011 9:30 am

ขออนุญาติเรียบแบบ หนุ่มพร้าว สาวฝาง :razz:

บานบ่ฮู้โรย สวยบ่ฮู้แป๊ บ่ฮู้จะแก้ ความฮักในใจ๋
เมื่อมาป๊บน้อง จิตต้องหลงใหล จะย๊ะจะใด ในใจ๋ของอ้าย
เฮาสองคน ต่างคนต่างหม้าย ต่างก็เดียวดาย อ้างว้าง

ค่ำคืนอกเอ๋ย หนาวเหมยน้ำค้าง หาคนแนบข้าง บ่มี
ใคร่ได้ตั๋วน้อง มาเป๋นแม่ศรี เป๋นคู่ชีวี เป๋นศรีแม่บ้าน
ป้อฮ้างหางดง ลุ่มหลงเสี้ยงถ้าน ลมฮักปาปาน มาป๊บ

ดอยหล่อบ้านสาว ทางยาวหลายทบ แต่ใจ๋ไปข้อง ผูกพัน
เพราะลูกเฮานั้น สองคนเพื่อนกั๋น เฮียนสถาบัน เดียวกั๋นเนอเจ้า
หากเฮากับสู เอ็นดูลูกเต้า สมควรตี้เฮา ฮ่วมฮัก

คนเฮาเกิดมา เวลาบ่นัก บ่ควรอยู่เศร้า หมองตรม
ครอบครัวเฮานั้น ควรมาผสม ดอยหล่อจื้นจม หางดงจื้นสู้
ตั๋วอ้ายนี้นา สล่าแป๋งตู้ แป๋งตึงหอเฮือน บ้านพัก

ส่วนตั๋วบัวบาน ก๋านงานก่นัก ปลูกผักบะเต้า หอมเตียม
ขอเจิญน้องย้าย เงินอ้ายบ่เขียม เลิกปลูกหอมเตียม มาจ้วยแป๋งตู้
ลูกเฮาสองคน ก่คงชอบสู้ อยู่ฮ่วมชายคา ม่วนล้ำ

อยู่อย่างสุขใจ๋ เย็นใสเหมือนน้ำ บ่หื้อกลืนกล้ำ ทรวงใน
รถยังมีล้อ หม้อยังมีไห นีออนมีไฟ บ่ไม้ขัดข้อง
อ้ายขอเอาต๋น เป๋นคนปกป้อง จะสร้างครรลอง ชีวิต

จะเอาหลักธรรม มานำความคิด บ่ผิดจากข้าง ทางดี
จะเป๋นร่มไม้ หื้อได้สุขขี จะเป๋นนที ยามตี๋เหี่ยวแห้ง
ถ้าฟ้ามืดดำ จะทำหื้อแจ้ง เอาแสงฮักนำ ผ่านฮ้าย

ย้ายมาเต๊อะหนา จะปาน้องย้าย มาอยู่บ้านอ้าย หางดง
จะมีลูกรัก แหมซักโขยง หื้อจาวหางดง ลือกั๋นทั่วหน้า
ทองสองสลูง บอกลุงกับป้า ไปขอกานดา พรุ่งนี้

แม่อุ๊ยสมศรี เข้ามาแน่ะจี๊ หื้อไปวันนี้ กั๋นเลย
ป๋ออุ๊ยน้อยต๊ะ บอกอ้ายหลานเอ๋ย ป้ออุ๊ยคุ้นเคย คนดอยหล่อหั้น
อุ๊ยปั๋นหล่ายดอย อุ๊ยมอยคอสั้น เพื่อนกั๋นในวัน ร่วมรบ

ต๋อนเป๋นทหาร หมู่กั๋นพร้อมครบ เดี๋ยวนี้อยู่ดี ก่อจา
เฮาไปพรุ่งนี้ วันดีก่หา เรื่องเจรจา ขออุ๊ยเป๋นต้น
ปี้น้องตังจาย ต่างก็ยู้โหย้น หื้อสมกมล จื้นจู๊

น้องว่าจาใด ตั๋วอ้ายใคร่ฮู้ ปี้น้องเปิ้นอู้ หยั่งใด
ตกลงเต๊อะน้อง หื้อไปวันไหน อ้ายพร้อมจะไป แต่งดองน้องหล้า
คงบ่ต้องรอ ไปถึงปี๋หน้า ใจ๋อ้ายนี้นา มันฮ้อน

แม่หอแม่เฮือน ก่เตรียมรำฟ้อน ในวันฮับต้อน สองเฮา
ลูกสองคนนั้น มันคงบ่เหงา เมื่อครอบครัวเฮา อยู่กั๋นพร้อมหน้า
ต๋อนนี้นะเหรอ ลูกเธอลูกข้า แล้วหาลูกเฮา แหมคน

ถ้าตั้งใจ๋แป๋ง มันตึงบ่ป๊น จะขอคนหล้า เป๋นญิง
เอาไว้เปิ้งปิง เมื่อสองเฮาเถ้า เต้านี้ก่อนแล...


User avatar
ล้อเลื่อน
 
ตอบ: 1163
สมัครสมาชิก: Sun Apr 18, 2010 6:17 am
ที่อยู่: อ.ลำลูกกา จ.ปทุมธานี

กลับไปหน้า กระดานค่าว

ผู้ที่กำลัง online

ผู้ที่กำลังอ่าน forum นี้: สมาชิก Google [Bot] และ ผู้เยี่ยมชม 1 คน