โบราณคดีสัญจร ล้านนาสู่ศรีวิชัย

โดย ป้าลาวัณย์

ไหว้วอนขอ มีอยอกราบนบ นึกถึงท่านเจ้า อินทา
เทพารักษ์ มเหสิกขา กราบไหว้วันทา ปวงเทพทั้งนั้น
ขอมาจ้วยกึ้ด ค่าวฮี้อกับฉัน วิงวอนเทวัญ ท่านไท้

บ่เกยเขียนค่าว กำเมืองนั้นไซร้ ตั้งใจ๋จะได้ ลองดู
วันตี้สามนั้น รายก๋านงามหรู เปิ้นปาไปดู ของดีเมืองใต้
ออกจากบ้านเฮา บิ่นหน้าล่องใต้ รถตวยกันไป เป็นถ้อย

ปี้น้องหมู่เฮา ซอกซอนบ่หน้อย รวมแล้วกว่าร้อย คนนา
ล้วนแต่ใฝ่ใจ๋ ในก๋านศึกษา โบราณนานมา ตวยผ่อบ่ยั้ง
บ้านเฮาเป๋นอี้ บ้านปี้เป๋นหยัง เอามาเอี่ยงกัน ผ่อลอ

บ้านเปิ้นเมืองเฮา เอามากึ้ดผ่อ ต่างกันตั้ดข้อ คดีใด
เมืองนอกเมืองนา ยังไปแอ่วได้ ไก๋สุดไก๋ไซร้ ดั้นเมฆตวยตาง
เต้าใดเต้ากั๋น คนไทยเหียอย่าง จ่ายจ๋นปอจ๋าง โหลดโหล้

เซาะไปเต๊อะปี้ ถึงปี๋โจ้โหว้ บ้านไผบ่สู้ เมืองไทย
ใคร่กิ๋นได้กิ๋น ใคร่ใจ๊ได้ใจ๊ จะเอาจะใด ตวยใจ๋บ่อั้น
ยามนึ่งยามสาม ต๋ามจ๋นแจ้งนั้น บ่เกยอดอยาก ปากแห้ง

แลงวันตี้สาม ยามตะวันแลง เดือนก่ยังแจ้ง บ่ตัน
หมู่เฮาร่วมร้อย ก้อย ๆ มากั๋น ตื้พิพิธภัณฑ์ เจียงใหม่ว่าอั้น
กั้นถึงสองทุ่ม หมู่เฮาทั้งนั้น ก็ปากั๋นดั้น เตียวตาง

สี่กันโตยกั๋น เส้นตางตี้ผ่าน เดือนแจ้งจ่างป่าง ม่วนแต๊
จ๋นต๊าวฮอดแจ้ง ตะวันแมนแจ๊ะแฮะ เมืองกอกนั่นแน้ ถึงเอา
โรงแรมเวียงใต้ ตี้หมายกำเก๊า เพื่อฮื่อหมู่เฮา ซ่วยหน้า

กิ๋นข้าวงายแล้ว ทักทายทั่วหน้า เจ้าหน้าที่เปิ้น แนะนำ
เสร็จแล้วขะใจ๋ ขึ้นไปประจ๋ำ ตี้ไผตี้มัน เป๋นถับเป๋นถ้อย
หมู่เฮาเรียบร้อย ไปกั๋นเป๋นถ้อย ต่ำหนวดนายฮ้อย นำพา

ตี้หมายต่อไป ของเฮาตางหน้า เพชรบุรีนั้นหนา นครคีรี
เปิ้นฮ้องเขาวัง พระที่นั่งตี้ มีมาแต่เดิมที เป๋นตี้ตื่นต๋า
วังเก่าทั้งนั้น ตี้เฮาทัศนา สมใจ๋สมต๋า แต้นอ

กว่าเฮาจะถึง ชุมพรนั้นน่อ เวลานั้นก่ เจ็ดโมง
ค่ำมืดตึ้ดตื๋อ จันทร์สมนั้นจื้อ โรงแรมจัดฮื่อ เฮานอนคืนนี้
สะลีกับหมอน นอนกั๋นดิบดี บ่ตันอิ่มเต๋มตี้ ฮ้องลุก

ตี๋ห้าแต๊ ๆ เปิ้นโทรฯมาปลุก จ๋ำเป๋นต้องลุก จากตี้นอน
กิ๋นข้าวเจ๊าแล้ว จะแวะไปก่อน กรมหลวงชุมพร ศาลเจ้า
เสร็จแล้วล่องใต้ ไปตางเมืองเก่า ดินแดนพระเจ้า ไชยา

ไหว้พระกั๋นแล้ว ก่ไปไหว้สา พุทธทาสเจ้านา ตี้สวนโมกข์
ท่านป่วยอาพาธ หมู่เฮาเศร้าโศก ขอฮี้อเปิ้นหายโรค ของเปิ้นเวย ๆ
กิ๋นข้าวตอนแล้ว หนตางแฮ๋มไก๋ หมู่เฮาขะใจ๋ ขึ้นรถ

กว่าจะถึงเมืองตรัง ตี้บ้านนายก เวลาก่ตก แลงไป
คุณแม่นายก เต๋มอกเต๋มใจ๋ ใคร่ฮู้อันใด ก่เจิญถามได้
โรงแรมธรรมรินทร์ บ่ไก๋บ่ใก้ หมู่เฮาได้อยู่ ในเมือง

เจ๊าวันตี้หก ตกเป๋นวันต่อเนื่อง เฮาจะไปเมือง พัทลุง
แล้วไปสงขลา ทอดผ้าป่าแล้วมุ่ง ต่อไปถึงกรุง ฮ้องว่าหาดใหญ่
ตุ๊กอกตุ๊กใจ๋ เปิ้นปาไปไจ กีฬาคนใต้ จื้นจม

อกสั่นขวัญแขวน ใจเต้นโต้บ ๆ ปากั๋นไปจม ผ่องัว
หันเป๋นของม่วน จวนกั๋นไปมั่ว ใส่งัวจนกั๋น พนันเต้าใด
ลูกเล็กเด็กแดง แตงตวยก่อได้ ปลูกฝังนิสัย นักพนัน.

เว้นจากเว้นจี๋ เสียทีได้หัน ติดต๋าไปพลัน แฮ๋มเมิน
คืนนี้เฮานอน บ่ต้องกั๋วเคิ้น โรงแรมของเปิ้น ใหญ่แต๊ ๆนา
จื้อว่าเซ็นทรัล บ่ต้องสังก๋า เปิ้นปาเฮามา หาดใหญ่

แฮ๋มวันเฮาไป สุดเขตเมืองใต้ ข้ามไปมาเลย์ ซื้อคัว
ม่วนกั๋นไปทั่ว ได้คอบได้คัว ตุ๊กตั้วเต๋มใจ๋ เอาไปฝากบ้าน
ค่ำแล้วกิ๋นข้าว อาหารคาวหวาน เบตงบ่ก๊าน ไผเลย

จากนั้นเฮาไป ปัตตานีเมืองใหญ่ อยู่จายแดนไทย ตางใต้
เลี้ยวไปสงขลา แล้วมาเกาะยอ ผ่อกันไปทั่ว มะกั๋วขาดทุน
แล้วไปหาดแก้ว เตียวเล่นกั๋นแล้ว ก่อไปชมวิว กิ๋นข้าว

ตื่นเจ๊าเฮาวุ่น มะรุ่นมะจุ๋น ของตุนไว้นัก ตะวา
ต้องฟั่งเซาะหา หีบห่อเอามา เป๋นดีสังก๋า เอาไปจะได
เฮาไปไหว้พระ รวดเร็วทันใจ๋ เสร็จแล้วรีบไป ตำหนักไท

กินข้าวตอนแล้ว บ่ต้องสงสัย หมู่เฮาฟั่งไป ท่าเฮือ
ลงเฮือเฟอรรี่ เซาะตี้เหน็ด ๆ หัวเฮือเบ็ดเสร็จ นั่งได้หลายคน
ข้ามไปสมุย บ่ตันแดดฮ่ม บ่ตันได้จ่ม ถึงตี้

เสียทีตี้มา คืนเดียวตะอี้ ก็เลยหันก้า โรงแรม
ได้จื้อว่ามา ถ้าจะเป๋นของแถม พักแรมคืนเดียว ก่อต้องปิ้กเมือ
เสียเวลาถ้าเฮือ ปอก้ายปอเบื่อ ปิ้กไปได้ก้า หินตาหินยาย

วันนี้ตี้สิบ กำหนดปิ้กเมื่องาย หมู่เฮากัวขวาย กั๊นเฮ่ง
ตื่นกั๋นตี๋สี่ ทะเหล็ดเถ็ดเก้ง แต่แล้วก่อมา ถ้าเฮือจ๋นขวาย
บ่มาแล้วสมุย เกยมาลุยตะก่อน คราวนี้มันฮ้อน เหลือทน

ปิ้กจากสมุย กะลุยฮื่อจ้น ย่นหนทางวัน ปิ้กบ้าน
วันนี้ก๋ายเป๋น คณะกรรมก๋าน สำรวจตรวจทาง สายใต้จ๋นแลง
กว่าเฮาจะถึง ได้กิ๋นข้าวแห้ง แถมเหม็นขี้หมู ตวยนา

เจ๊าวันสุดต๊าย บ่ต้องสังก๋า ทุกคนทั่วหน้า ยิ้มแย้ม
จะได้ปิ้กบ้าน บ่เมินมาแฮ๋ม กะตะวันแลง ถึงบ้านเฮา
ลูกหลานพร้อมหน้า แม่ไปแอ่วมา ของฝากเต๋มซ้า สำฮาญ

ขออวยพร คณะทำงาน โบราญสัญจร จากเหนือ
ปาเฮามาเพื่อ เฮียนฮู้ของดี บ้านปี้เมืองน้อง ล่องไปภาคใต้
แปดวันแปดคืน เตียวตางจั๊ดไก๋ เป๋นตี้ติดใจ๋ แต๊นอ

ลูกหลานบนรถ เอาอกเอาใจ๋ ใค่กิ๋นอันใด บอกมา
ข้าวเหนาะน้ำเหนาะ เซาะหาจ๋นได้ บ่หมีอันใด ขัดข้องเลยนา
ไปถึงตี้ไหน บ่อต้องมาต๊า เซาะหาเอามา จ๋นได้

ผู้ฮู้ตังหลาย หมุนเวียนมาไจ ป้อนใส่ความฮู้ หมู่เฮา
เอากำเหน็ด ๆ เข็ดเขี้ยวแต่เจ๊า หมู่เฮาซอบใจ๋ ใค่หัวจ๋นไห้
เป๋นตี้ม่วนใจ๋ ตางไก๋เป๋นใก้ ห้าพันกิโลได้ ลัดนี้วมือ

ขอบอกขอบใจ๋ หมู่เปิ้นตี้ฮื้อ ความฮู้เป๋นปึ้ก ปิ้กบ้าน
อยู่ดีมีสุข สนุกสนาน เบิกบานเต๋มตี้ คดีสัญจร
วันหน้าฟ้าใหม่ คงได้แอ่วฮ่อน คณะสัญจร โตยคน.

                                      ลาวัณย์ จรรย์สืบศรี 
                                                   มิย. 2539